HIZIQEELI 1 - Qullaawa Maxaafa

HIZIQEELIRA UMO LEELTINO AJUUJA ( 1:1—7:27 ) HIZIQEELI MAGANU AYIRRINYE LAI

¹ Sajjiikki diro shoolki aganira ontikki barra, Baabilooni gobbara Kebaari Wayi mule Yihudunni qafadantinori ledo hee're gordu fa'nameenna, Magano ajuujatenni afoommo.

² Kuni coyi ikkinohu, moote Yoakiini qafadamihunni ontikki dirooti.

³ Kaaliiqi qaali ani hakko Kebaari Wayi mule hee'reenna ane Buuzi beetti qeesichu Hiziqeeliwa dayi. Hatte yannara, ane wolqasi irkisse nooe.

⁴ Iima qole laummo woyite, wolqaataame bubbe aliyye raginni dagganni no; banaqono lowo gomichi giddo blicci yitanni no. Gomichu qooxeessira noo gordi duu'mi; banqo beleqqanno woyite, camote gedee blicceessi leellanno.

⁵ Bubbete mereerono, manna lawannoha 4 kalaqama afoommo.

⁶ Mittu mittunkura shoolu shoolu albinna, shoolu shoolu qooli noonsa.

⁷ Lekkuwansa suwaddate; lekkuwansa hoowi boottate culunqa lawanno; fiinoonni camo gede cala cala yaanno.

⁸ Shoolu albinsanna shoolu qoolinsa aana, mittu mittunku qoolira woroonni mannunnita labbanno anguwa noonsa.

⁹ Lamu lamu kalaqami qoolla mimmitunnita kissanni no. Mittu mittunku alba higge subbe hadhanni no; raga baala ha'ranno woyite mittu mittunku kalaqami alba wirri diyaanno.

¹⁰ Mittu mittunku kalaqamira shoolu addi addi albi noonsa. Albinsano, albiido mannunniha, qiniitiido doobbiichunniha, gurayido bootunniha, badhiido qole allamurchunniha lawanno.

¹¹ Mittu mittunku kalaqamihu lamu qooli iima hige wanga yee, aane noo kalaqami qoolla qacce kisanno; gatinohu lamu qooli kayinni, erame bisonsa diwanno.

¹² Mittu mittunku alba higge subbe hadhanni no. Raga baala ha'ranno woyite mittu mittunku kalaqami wirri yiikkinni ayyaanu ha'rannowa hige ha'ri.

¹³ Daninsano, kashilunna buwanno caabbichi gedeeho; mereeronsa bubbanno giira millissanni no. Xawaabbuno wara'a yiinoho; giirate giddonnino banqo fultu.

¹⁴ Kalaqamuno, giirate xoxini gede ka'anna kawa kukkubbi.

¹⁵ Shoolenka kalaqama la"anni hee're, shoolunkura mule noota shoole lami-qale afoommo.

¹⁶ Shoolente qale dani, ayirrado dilqa lawanno; shoolente dani mittoho; mitte mittenti lami-qale mimmitoho giddoonni qolle sayinse xaadinse seekkinoonnita labbanno.

¹⁷ Tini shoolenti qale, shoolunku kalaqami ha'ranno raga baala doyitanno.

¹⁸ Tini qalla seeddaannatenna waajjishshannote; gooro baalate illuwa wo'mite noonsa.

¹⁹ Kalaqamu kuni ha'ranno woyite, qalla hoodensa hadhanno. Kalaqamu iima hige ka"anno yannarano, qalla iima higge ka'anno.

²⁰ Ayyaanu ha'ranno raga baala kalaqamuno ha'ri. Kalaqama massaginte gede, hakku ayyaani giddonsa noohura, qallano insa hadhuwa higge hadhu.

²¹ Kalaqamu ha'ranno woyitenna uurranno woyite, qallano kalaqamu ikkita ikkitanno.

²² Kalaqamu umira aleenni, hincilaallote gede xawannohu qalcho lawannori no.

²³ Qalchoho woroonni noohu mittu mittunku kalaqami qotisira noohu ledo taalo lame qoola wanga asse no. Gattinori lamu qoolinni bisonsa diphite uurrite no.

²⁴ Buubbanno yannara, qoollansa luulo macciishshoommo. Luuluno baaru dambali, lowo olantonna Wo'manka Dandaanno Maganihu gedeeho. Buuwa agurtanno woyite qoollansa gamba assidhanno.

²⁵ Hatte yannara, uminsara aleenni noo qalchi giddonni luulo macciishshoommo.

²⁶ Qalchoho aleenni bulu dilqinni seekkinoonnihu, ayirrado barcima lawannori no. Ayirradu barcimira mancho lawannohu ofolle no.

²⁷ Hakku manchi, halli ale, giirate giddo noo camo gede xawanno. Halli woro, giirate buwano lawanno. Gaangaawisirano wara'a yiino xawaabbi leellanno.

²⁸ Hakku xawaabbino, xeenu gedensaanni fultanno magani-seemo gede batinye dana afi'rinoho. Kuni wara'a yiino xawaabbino, Kaaliiqi ayirrinye leellishanno. Ani konne baala laummo yannara, alba hige gombisame hee're, mitte huuro macciishshoommo.