FULO 32 - Qullaawa Maxaafa

CULKUNNI SEEKKINOONNI SIITO

¹ Muse ilaalu aana keeshshita mannu Aarooniwa shiqe, «Hakku Gibitsetenni fushshinkehu Muse maikkinoro dianfoommona, ka'e albaanni ha'ranno magano seekkinke» yitusi.

² Aaroonino, «Meenti'nenna seenni'ne maccara noota culku qalawattanna ooso'ne maccara noo bilicuwa fushshitine abbe» yiinsa.

³ Mannu baalunku maccansara noota culku qalawatta fushshe Aarooniwa abbi.

⁴ Isino qalawatta angansanni haa're giiratenni daashshe siitu misile seekkinsa. Mannu mimmitoho, «Israeele, kuni Gibitsete gobbanni fushshe abbinonke maganooti» yii.

⁵ Hakkunni gedensaanni, Aarooni siitu misilera albaanni qole kakkalote darga seekke, «Ga'a Kaaliiqi ayyaanaati» yee lallawi.

⁶ Layinki soodo gutte ka'e, shilqonnitanna mittimmate kakkalo shiqishshu. Mannuno ofolle itihunna agihu gedensaanni sirbaho kai.

⁷ Kaaliiqi Musera, «Gibitsetenni fushshittohu mannikki cubbo loose aneno agurinona rakke dirri.

⁸ Ani hajajoommonsa doogowiinni hakkawoyintenni agurte fulte, daashshine seekkinoonnita siitu misile seekkidhe magansidhino; kakkalono shiqishshe, ‹Israeele, kuni Gibitsete gobbanni fushshe abbinonke maganooti?› yitino.

⁹ Kuni manni mokkookka ikkinota ani afoommo;

¹⁰ lowo geeshsha aaramoommo daafira, konne manna huneemmona agurie; atenna ate godowa kayinni bati'ra gosa asseemmo'ne» yiisi.

¹¹ Muse kayinni Kaaliiqi Maganisira eegamanni, «Kaaliiqa'ya, jawanna wolqaataame angakkinni Gibitsetenni fushshootto mannira togo mayira hanqitto?

¹² Gibitsootu, ‹Ilaallate mereero shee gudansaranna baattote aaninni hunara fushshinonsa!› yitanno gede mayira assattonke? Ballo mannakki hanqite guddootina aguri.

¹³ ‹Sircho'ne gordu beeddahe gede batiseemmo; tenne kulummo'ne baatto baala sirchi'nera hegere iqqa asse eemmo› yite su'mikkinni xaarte soqqamaasinekkira Abirihaamira, Yisihaaqiranna Yaiqoobira oottonsa hexxo qaagi» yii.

¹⁴ Kaaliiqino hanqosi agure, mannu goofannokki gede assi.

¹⁵ Museno lamenka widoonni borreessinoonnita 2 boncoonni kinna haa're ilaalu iiminni dirri.

¹⁶ Tenne bocantino kinna seekkinohunna aanansa borreessinohu Maganoho.

¹⁷ Iyyaasuno mannu canco macciishshe Musera, «Qachu giddo olu luuli no» yiisi.

¹⁸ Museno, «Kuni luuli sirbunniho ikkinnina, qeeltinori qeexaala woy, qeelantinori wi'la di"ikkino» yii.

¹⁹ Yiintenni gede qacha mare iillanni hee'renni, siitonna sirba lae lowo geeshsha aarami. Haa're abbinota lamenta boncoonni kinnano ilaalu hunda ole cancani.

²⁰ Seekkidhino siitono haa're giire, cancane bullee asse wayinni bulbule Israeelete mannira hayikkisi.

²¹ Aaroonino, «Kuni manni ma"asseennaheeti kageeshshi cubbo loosara worte laittohu?» yee xa'mi.

²² Aaroonino daware, «Mooticha'ya anera hanqitootie; kuni manni bunshe assate murci'rinoha ikkinota ati afootto.

²³ Insano, ‹Hakku Gibitsetenni fushshinonke manchi Muse maikkinoro dianfoommona, ka'e albaanni ha'rannoha magano seekkinke› yitinoe.

²⁴ Anino, insa giddonni culka afi'rinohu haa're anewa abbanno gede kuloommonsa; insano abbiteenna haa're giirate tugeenna tini siitu misile fultino» yee dawari.

²⁵ Muse, Aarooni manna facci asse agure diinu albaanni shollanno gede assinota afe,

²⁶ qachu furchora uurre, «Kaaliiqiha ikkinohu baalu anewa dayo!» yii. Hatto yiita Leewaawootu baalunku isiwa shiqqi yitu.

²⁷ Museno, «Israeelete Magani Kaaliiqi, ‹Baalunku bise'ne suxxitine, qachaho kawiidi furchonni ka'iidite geeshsha ha'rantinanni rodoo'ne, elo'nenna olliicho'ne shiiyye› yiino'ne» yiinsa.

²⁸ Leewaawootuno Muse yiino gede assite hakko barra 3,000 manna shitu.

²⁹ Museno Leewaawootaho, «Techo ooso'nenna roduuwa'ne shitine Kaaliiqira qeesimmatenni soqqamate ki'nenee baddinoonni daafira, Kaaliiqi maassi'rino'ne» yiinsa.

³⁰ Muse layinki barra kae mannaho, «Ki'ne lowo cubbo loossinoonnina, miteekke eegama'ya lae cubbo'ne agurannoha ikkiro, hanni ani kayinni galagale ilaala Kaaliiqiwa mareemmo» yiinsa.

³¹ Muse galagale Kaaliiqiwa mare, «Bayisibaona, kuni manni lowo cubbo loosino; magansi'rara yee culkunni magano seekki'rino.

³² Xa kayinni eeggatena konne cubbo agurinsa; agurattonsakkiha ikkiro kayinni, su'ma'ya mannikki su'ma borreessootto maxaafi giddonni hooli» yii.

³³ Kaaliiqi Musera, «Maxaafi'ya giddonni cubbo loossinori su'malla huneemmo.

³⁴ Xa ha'ri; konne mannano kuloommohe widira qolte haadhe massi! Kuneeti sokkaasinchi'ya albakkiinni ha'ranno; konne manna cubbinsa daafira qorichisheemmo barri kayinni daanno» yiisi.

³⁵ Aarooni siitu misile seekkannonsa gede assitino daafira, Kaaliiqi jaddote dhibbinni ganinsa.