FULO 29 - Qullaawa Maxaafa

QEESIMMATE SOQQANSHORA BANDANNI GARA

¹ «Anera qeesimmatenni soqqantanno gede badatto yannara, muso afidhinokkire 1 middichanna 2 ge'rechu goco qixxeessi.

² Dancha qamade bullee liinse shiishshukkinni zayitetenni, zayite nookkihanna zayite aanaho worroonniha shaalado tima qixxeessinona.

³ Kore haadhe saffeho worte, 1 middichanna 2 ge'rechu gocca shiqishi.

⁴ Aarooninna oososino Dukkanu xullichira haadhe abbite bisonsa hayishshi.

⁵ Aaroonira qeesimmate imaana shamise, gagasu uddanora giddoyidi qamise, gagasu uddanonna gagasu kiiseno uddisiisse, goonde seekkinoonnita hallo usudhinanni uddano qodhisiisi.

⁶ Xaanxoonni koffiyano umoho worisi; qullaawa ba'lattono koffiyu aana wori.

⁷ Buurranni zayite haadhe umisira dunte buuri.

⁸ Oososino abbite shamissa uddisiisinsa.

⁹ Hallu uddano xaaxxe, seeda koffiyano umoho worinsa; qeesimmano geedonnita ikkitannonsa; kunni garinni Aarooninna oososi qeese assatto.

¹⁰ «Ati middicha Xaadu Dukkani albira haadhe shiqishsheenna, Aarooninna oososi angansa middichu umi aana wortona.

¹¹ Middicha Dukkanu xullichira ane albaanni gorri.

¹² Mundee angichunni haadhe kakkallanni buudda aana gani; gattinota kakkallanni dargira woroonni duni.

¹³ Godowiru cooma, qaccete afalenna lamenka mule coomunku ledo mitteenni kakkallanni darga massite shilqishi.

¹⁴ Middichu maala, goganna cuma kayinni qachaho gobbaanni fushshite xiniinsi; kuni qeesootu cubbo agursiisate kakkalo ikkanno.

¹⁵ «Mitto ge'rechu goco qixxeessiteenna, Aarooninna oososi gocu umi aana angansa wortona.

¹⁶ Gocono gorrite mundee kakkallanni darga shoolunku midaadira wixi.

¹⁷ Maalano fiixi fiixisi garinni murmuri; godowirenna dadubba hayishshite murmurootto maali ledonna umu ledo mitteenni wori.

¹⁸ Ge'rechu goco gudisse kakkallanni darga shilqishi; tini kakkalo su'niitannotenna anera tashshi yitannote.

¹⁹ «Layinki gocono abbiteenna Aarooninna oososi angansa gocu umi aana wortona.

²⁰ Gocono gorrite, mundee haadhe Aarooni oosora, qiniiticho macca qaccera, qiniiticho angaranna qiniiticho lekkahura lowiidi qubbichira gani.

²¹ Kakkallanni darga noo mundeenna buurranni zayite haadhe, Aarooninna imaanisi aana, hattono oososinna imaaninsa aana wixi. Hakkunni gedensaanni, Aarooni, oososinna imaaninsano anera baxxinoha ikkanno.

²² «Kuni goci qeesimmanniha ikkino daafira, gocunniha cooma, farro, godowiru cooma, qaccete afale, coomunku ledo lamenka mulenna qiniiticho tafa haa'ri.

²³ Anera albaanni saffeho worroonniha mitto tima, mitto zayitete timanna mitto shaalado tima haadhe,

²⁴ wo'manka Aarooninna oososi anga worteenna, addi fushshaate assite shiqishshannoe gede assi.

²⁵ Angansanni haadhe kakkallanni darga shilqinshanni kakkalo ledo anera su'niitanno gede assite shilqishi; kuni anera shilqote fushshaateeti.

²⁶ «Aarooni qeesimmara gorrinoonni goci racho haadhe, addi fushshaate assite ane albira shiqishi; kuni ate qeechaati.

²⁷ Qeesimmate seerira shiqinshoonni goci giddonni fushshinoonni rachonna qiniiticho tafa, anera addi fushshaate assite shiqishi; kunino Aarooninna oososi qeecha ikkona.

²⁸ Israeele mittimmate kakkalo shiqishidhanno woyite, rachonna qiniitichu tafi hegere geeshsha qeesootu qeechaati. Kuni, Israeele ane Kaaliiqira uyidhanno fushshaateeti.

²⁹ «Qullaawu Aarooni imaani isi gedensaanni oososi bande qeesimmate buurranni yannara insaha ikkona.

³⁰ Oososi giddonni isi darga qeesimmate buuramannohu Aarooni beetti soqqamaera Qullaawu Dukkani giddora Qullaawu Dargira eanno yannara, konne imaana 7 barra uddi'rona.

³¹ «Qeesimmate maassora gorrinoonni goci maala massite qullaawa darga gafi.

³² Aarooninna oososi gocu maalanna saffeho noo sagale Dukkanu xullichira ofolte ittona.

³³ Qeesimmate maasso yannara cubbo agursiisate seerira shiqinshanniha ittona; qoromboonnita ikkitino daafira wolu manni itoonke.

³⁴ Qeesimmate maassora gorrinoonni maali woy sagale galturo giiri; qoromboonnita ikkitino daafira ita dihasiissanno.

³⁵ «Hajajoommohe garinni Aarooninna oososi qeesimmate 7 barra maassi'ratto.

³⁶ Cubbo agursiisate, barru barrunkunni middicha kakkali; tini kakkalo kakkallanni darga keereensitanno; zayite buurte kakkallanni dargano qullaawa assi.

³⁷ Lamalanka barra kakkallanni darga keereensite qullaawa assi; kakkallanni darga kisannohu baalu lagaawanno.

³⁸ «Barru barrunkunni 2 mittu dirita ge'reewu gocca abbite kakkallanni darga kakkalatto.

³⁹ Mitto goco soodo fushshaate assite shiqishatto; layinkiha hawarro fushshaate assite shiqishatto.

⁴⁰ Mittu goci ledo mitte kiilo ikkitannota fila qamadete bullee mitte litire xalala zayitenni liinsoonnitanna anganniri fushshaatira mitte litire woyinete xajje shiqishi.

⁴¹ Layinki goco hawarro shiqishi; soodoha shiqishatto garinni gidunna anganniri fushshaati ledo shiqishi; kuni ane Kaaliiqira su'naannoha sagalete fushshaate ikkanno.

⁴² Xaadu Dukkani xullichira manni'yanni xaade ate ledo hasaaweemmo yannara, ane albira shiqinshanniti shilqote kakkalo ilamate ilamara roso ikkito'ne.

⁴³ Israeelete manni ledo hakkiicho xaadeemmo; Dukkanuno ani hakko heera'yanni keeraa'minoha ikkanno.

⁴⁴ Dukkananna kakkallanni darga qullaawa asseemmo; Aarooninna oososino qeesimmate baxxitinore asseemmo.

⁴⁵ Israeelete manni mereero hee'reemmo; insarano Maganonsa ikkeemmo.

⁴⁶ Insano mereeronsa hee'reemmo gede Gibitsetenni fushshoommonsahu Maganinsa Kaaliiqi ane ikkoommota affanno. Ani Kaaliiqi Maganonsaati.