FULO 24 - Qullaawa Maxaafa

KAALIIQI MANNISIRA EINO GONDOORO DHAAWI

¹ Kaaliiqi Musera, «Ati ani noommowa amo; Aarooni, Naadaabi, Abihunna Israeelete giddonnino 70 geerra haadhe abbiteenna, fafowa heedhe heeshshi yite kumbuulto ikkinnina,

² shiqqi yitoonke. Ati callu anewa shiqqi yii. Wolu manni ilaalu iimira giddoonke yii» yiisi.

³ Museno daye, mannaho Kaaliiqi yiinorenna wogasi baala kulinsa. Mannuno mitto afoo ikke, «Kaaliiqi yiinonkere baala wonshineemmo» yee dawari.

⁴ Museno Kaaliiqi yiinore borreessi; soodo gute kae, ilaalu hunda kakkalote darga seekke, tonaa lamente Israeelete ga're su'munni, 12 sooddiyye uurrisi.

⁵ Gudinse shilqinshanniteranna mittimmate kakkalora Kaaliiqira middoota shiqishshannore Israeelete wedella soyi.

⁶ Museno gama mundee bade gawatete wori; gattino mundee haa're kakkalote darga wixi.

⁷ Kaaliiqi hajajo borreessinoonniha Gondooru maxaafano haa're mannaho nabbawi. Mannuno, «Kaaliiqi yiinore baala assineemmo; hajajosino wonshineemmo» yii.

⁸ Museno mundee haa're mannu aana wixanni, «Kaaliiqi ki'nera hajajo uyi'ne yannara eino gondoori mundee tenneeti» yii.

⁹ Muse, Aarooni, Naadaabi, Abihunna Israeelete manni giddonnino 70 geerri ilaalu aanira fulte,

¹⁰ Israeelete Magano la'u. Lekkasira woroonni gordu gede xawannohu bulu kinchi no.

¹¹ Maganuno kore Israeelete roorroota digawajjinonsa; insano Magano la'u; albasiinni itte aggu.

MUSE SIINA ILAALI AANA

¹² Kaaliiqi Musera, «Ani noommowa ilaalu iimira fulte, hakkiicho agari. Mannaho rosiisattora borreessoommo seeranna hajajo amadinoha 2 boncoonni kincho eemmohe» yiisi.

¹³ Kunnira Musenna kaa'laanchisi Iyyaasu qixxaabbu. Museno Maganu Ilaali iimira fuli.

¹⁴ Geerrahono, «Hingammo geeshsha konniicho agarre. Aarooninna Hoorino ledo'ne noona, coyi hee'ri'nero insawa massidhe» yiinsa.

¹⁵ Muse ilaalu iimira fulita, ilaala gomichu guggushshi.

¹⁶ Kaaliiqi ayirrinye leellishannohu bilicci yaanno xawaabbi ilaalu aanira dirri. Gomichu ilaala 6 barra wo'ma guggushshi. Lamalki barra Kaaliiqi gomichu giddo hee're Muse woshshi.

¹⁷ Ilaalu aana noohu Kaaliiqihu ayirrinyu xawaabbi Israeelete mannira bubbanno giira gede ikke leellinsa.

¹⁸ Muse ilaalu iimira fulanni hee'reenna gomichu guggushshisi. Hakkiicho 40 barranna 40 hashsha keeshshi.