FULO 2 - Qullaawa Maxaafa

MUSE ILAMI

¹ Mittu Leewi ga're manchi ga'resi giddonni galte adhino.

² Iseno gedensaanni godobbe labbaa beetto iltusi; qaaqqu xuma ikkino daafira, xawo fushshitukkinni 3 agana maaxxu.

³ Ikkeennano hakkuyi aleenni maaxa dandiitannokkita affe, leemmunni seekkinoonni gimboola haadhe wayi eannokki gede aanaho suwe gante, qaaqqo gimboolu giddo worte wayi gama noo haqali giddo massite wortu.

⁴ Qaaqqu rodoono xeertote heedhe, ikkannore la'anni uurritu.

⁵ Hatte yannara, Feriooni beetto biso hayishshidhara wayi lagira dirritu; soqqamannose seennino wayi gama ha'ramanni no; iseno hedeweelcho haqalu mereero noo gimboola affe, soqqamaanchose sokke abbisiissu.

⁶ Fantanno woyite qaaqqu giddo no; qaaqqu wi'lanni noo daafira lowo geeshsha mararte, «Kuni Ibiraawootu qaaqqooti» yitu.

⁷ Hatte yannara qaaqqu rodoo mootete beettora, «Qaaqqo qansite lossitannoheta Ibiraawootu meenti giddonni mitte awuutte lossitannota woshshe abboheni?» yite xa'mituse.

⁸ Mootete beettono, «Ee! Marte abbie» yiteenna, ise kayinni qaaqqu ama woshshite abbitu.

⁹ Mootete beettono mancho, «Konne qaaqqo haadhe qansitanni lossie; daafurikki waagano eemmahena» yituse. Manchono qaaqqo haadhe qansitu.

¹⁰ Lophihu gedensaanni, qaaqqo mootete beettowa haadhe abbiteenna, «Feriooni beetto beettooti» yinanna hee'ri. Iseno, «Wayi giddonni fushshoommaha ikkino daafira, su'masi Muse yeemma» yitu.

MUSE MIDIYAAMI GOBBA FULE BAI

¹¹ Muse wedellicha ikkihu gedensaanni, fule fiixasi towatanno woyite, gadadinseennansa kaajjado looso loossanni noota afi; hakkuyi aanano, mittu Gibitsichi mitto fiixasi Ibiraawicha gananna lai.

¹² Museno kawanna ka'a lae mannu nookkita afihu gedensaanni, Gibitsicha shee shaafu giddo madaare ha'ri.

¹³ Layinki barrano hakkiira maranno woyite, lamu Ibiraawooti ganantanna afi; sao assinoha bade afihu gedensaanni, «Fiixakki mayira ganatto?» yee xa'misi.

¹⁴ Manchuno, «Ninkera roorrichanna yoo yaattoha asse worinohehu ayeti? Woy Gibitsicha shiitto gede aneno shaattoera hasi'roo?» yiisi. Museno lowo geeshsha waajje, «Hada assoommore mannu afe kaino» yee hedi.

¹⁵ Ferioonino konne coye macciishshihu gedensaanni, Muse shaara hasi. Muse kayinni Midiyaami yinanni gobba fule bae mitte bue gama ofolli.

¹⁶ Hattenne gobbara 7 seenne afi'rinohu Yootoori yinannihu mittu qeesichi no. Seennuno anninsa ge'reewiranna meira waa badiroho wore toohara hakkiira dayi.

¹⁷ Uminsa saada allaa'lite noori dagge konne seenne shorritunsa. Muse kayinni seenne allaalaasinete anganni gatise saadansara waa toohi.

¹⁸ Seennuno anninsawa Raagueeliwa mare iilli. Isino, «Techo hiitto yannantenni higgini?» yee xa'minsa.

¹⁹ Insano, «Mittu Gibitsichu allaalaasinete anganni gatise, waano hinkiile saadankeno toohino» yee dawarisi.

²⁰ Anninsano, «Xa hiikko nooyya? Mayira agurtine dagginisi? Sagale itona martine woshshesi» yiinsa.

²¹ Museno kunni qeesichi minira ha're ledosi hee'ri; qeesichuno mitte Siphaara yinanni beetto uyisi.

²² Iseno labbaa beetto iltusi; Museno, «Ani manni gobba manchooti» yaanni beettisira su'ma Gershoomi yee fushshi.

²³ Lowo diri gedensaanni Gibitsete moote reyi; Israeelete manni kayinni borojjimmate gadadi giddo hee're kaa'lo afi'rate raari; raarensano Maganunniwa iillitu.

²⁴ Maganuno urattonsa macciishshe Abirihaami, Yisihaaqinna Yaiqoobi ledo eino gondooro hedi.

²⁵ Maganu Israeelete manni widira lae, shettote giddo noota afe kaa'lansara hasi'ri.