FULO 15 - Qullaawa Maxaafa

MUSE FAARSO

¹ Hakkunni gedensaanni, Musenna Israeelete manni kunninni aante noo faarso Kaaliiqira faarsitu: Faradonna faradaasine baaru giddo hune, lowo qeelle uyinonkena, Kaaliiqira faarseemmo.

² Kaaliiqa faarseemmohu wolqa'ya ikkinohuraati; diini'ya anganni gatisinoehuno isooti. Isi Magano'yaatina galaxxeemmosi; anni'ya Maganootina, ayirrisi'reemmosi.

³ Kaaliiqi gaaramannoho; su'misino Kaaliiqaati.

⁴ Ferioonita faradi gaarenna olantosi baaru giddo huni; doorantinori gaadu hajajaano Duumu Baari giddo egemmante gattu.

⁵ Diimete wayi aanansa kamballi yii; kinchu gede hunda dirritu.

⁶ Kaaliiqa, qiniiticho angakki, ayirradotenna wolqaataamete; diina gante butu assitanno.

⁷ Aanakki ka'inore baala xirchikkinni hunitto; hanqikki dirre giira galawa ittannohu gede assinsa.

⁸ Foolikkinni waa mittowa duunitto; lolahanni noohu gammalu gede hossi yee uurri; diimete giddo noo baarino gei.

⁹ Diinu, «Shorre amadeemmonsa; jironsa beeqqeemmo; halchoommoreno adheemmo; bise'ya kou giddonni fushshe shakki asseemmonsa» yiino.

¹⁰ Mitte higge foolootto fooli baaru giddo huninsa; lowo wayi giddo kinchu gede ikkite egemmantu.

¹¹ Kaaliiqa, magannate giddo ate gedeehu ayi no? Maala'linanni qullaambehu, waajjishanno xirchihu, dhagge loosannohu ate gedeehu ayi no?

¹² Qiniiticho angakki kayisittota, baatto egemmitunsa.

¹³ Bagamannokki baxillikkinni gatisoottoha mannakki haadhe fushshootto; wolqakkinni, hee'rattowa qullaawu dargira haadhe ha'rootto.

¹⁴ Daga tenne macciishshite, waajjite huxidhu; Filisxeemootano waajjillu amadinsa.

¹⁵ Edoomi roorrooti massu; Moaabi wolqaataammi huxidhu; Kana"aanootu daaqqu.

¹⁶ Kaaliiqa, borojjimmatenni fushshoottohu mannikki, sae ha'ra geeshsha, waajjillunna masillu amadinsa; wolqakki waajjitino daafira, kinchu gede sammi yitu.

¹⁷ Kunnira, ati mannakki haadhe ha'ratto; ate ilaali aana massite worattonsa; hakkuno hee'rattora doodhootto dargaati; Qullaawu Mini angakki mintinoho.

¹⁸ Kaaliiqa, ati hegere geeshsha moohatto.

MAARIYAAMI FAARSO

¹⁹ Israeelete manni baaru giddoonni hige moola baatto kaxxanni fuli; Kaaliiqi kayinni Feriooni, faradi gaare, faradunna faradaasine baaru giddora e'uta, waa aanansa kamballi assi.

²⁰ Aarooni rodoo himanaancho Maariyaami dibbe haadhe fultuta, wolu meentino dibbe gananninna hechemmo kadanni hoodese fuli.

²¹ Maariyaamino faarsitanni, «Faradonna faradaasine baaru giddo hune, qeelle haraqi'rinona Kaaliiqira faarse» yitu.

QARAARINO WAA

²² Muse Israeele Duumu Baari giddoonni qole, Shuuri yinannita halallitte gobba haa're massi; 3 barra wo'ma halallitte gobbara hadhanni waa diafidhino.

²³ Maara yinanniwa iillitanno woyite, hakkiicho noo wayi qaraarannoha ikkino daafira aga didandiitino; konne darga Maara yinannihu iseraati.

²⁴ Mannuno, «Maa ango?» yaanni Musera gungumi.

²⁵ Museno Kaaliiqiwa hige raareenna, Kaaliiqi mitto haqqicho leellishisi; haqqicho haa're wayi aana tugita wayi coommi. Hakkiicho Kaaliiqi heedhanno seera uyinsa; insano jife lainsa.

²⁶ Isino, «Ki'ne qaale'ya seekkitine ayirrissiniro, ane albaanni dancha coye assitiniro, hajajo'ya agadhitiniro, woga'ya baala wonshitiniro, Gibitsootaho abboommo dhibbinni diganeemmo'ne. Ani Kaaliiqi hursaancho'neeti» yiinsa.

²⁷ Hakkunni gedensaanni, ka'e Eliimi yinanniwa daggu; hakkiicho 12 wayi bu'anna 70 saattu haqqe no. Insano hakko wayi gama baxxisidhu.