FULO 14 - Qullaawa Maxaafa

DUUMO BAARA TAYISE SA"A

¹ Hakkunni gedensaanni Kaaliiqi Musera,

² «Israeele galagalte higge Migidoolinna Baaru mereero Pihahirooti albaanni Baalitsefooni mule baxxisidhanno gede kulinsa.

³ Ferioonira, Israeelete manni raataawanni halalla shete nooha lawannosi.

⁴ Anino wodanasi dilleesseemmo daafira shorranno'ne; Feriooninna olantosi baala qeela kayinni, anera ayirrinye uyitannoe; hatte yannara, Gibitsootu ani Kaaliiqa ikkoommota affanno» yiisi. Israeeleno kulloonninsa gede assitu.

⁵ Gibitsete moote mannu fule ha'rinota afihu gedensaanni, isinna ledosi gashshaano hedonsa soorrite, «Konne manna isi mayira agurrummo? Israeelootu fulte hadhanno gede assine soqqamannonkeha dihoogankeetiyya!» yitu.

⁶ Feriooni faradu gaare biddi assiise, olantosino kayisi'ri.

⁷ Lee xibbe jawaata faradu gaare ledo, Gibitsete noo faradi gaare baala koorsiise, mitte mittentera hajajannoha wori.

⁸ Kaaliiqi Feriooni wodana dilleessino daafira, bashshi assitukkinni hadhanni noo Israeele hordofi.

⁹ Gibitsete olanto faradonna faradi gaare goluffe faana gantu. Baaru mule Pihahirooti albaanni Baalitsefooni mule baxxisidhe noowa iillitunsa.

¹⁰ Israeelootu Feriooninna olantosi hordoffanni noonsata affe, lowo geeshsha waajjitu; kunnira, kaa'lannonsa gede Kaaliiqiwa higge raartu.

¹¹ Museno qolte, «Gibitsete waammate dargi hoogeennaatini halalla reyinammora fushshittonkehu? Gibitsetenni haadhe fushshiteennanke dayinonke coye lai!

¹² Kuni coyi ikkannota Gibitsete hee'nenni dikulloommohe? ‹Halalla marre reyinammontenni angansa galloommoro woyyannona agurinke› diyinoommohe?» yitusi.

¹³ Museno mannaho, «Waajjitinoontena heedhinoonniwa uurre; kore techo affinanni Gibitsoota layinkita diaffinannina, Kaaliiqi ki'ne gatisate assannore la'inannina agarre.

¹⁴ Kaaliiqi gaaramanno'nena, ki'ne sammi yitinella la'e» yiinsa.

¹⁵ Kaaliiqino Muse, «Anewa higge mayira raaratto? Israeelete mannira ha'rona kuli.

¹⁶ Atino siqqokki haadhe, baaru aanira qolte diriirsi; wayino lamewa beehamanno; Israeeleno moola baatto kaxxitanni giddoonni higge sa'anno.

¹⁷ Anino Gibitsootu wodana dilleesseemmo; insano hoode'ne e'anno; Feriooninna olantosi, faradi gaaresino qeele ayirrinye adheemmo.

¹⁸ Qeeleemmonsa yannara Gibitsootu ani Kaaliiqa ikkoommota affanno» yiisi.

¹⁹ Israeelete olantora albaanni ha'ranni noohu Maganu sokkaasinchi badhensaanni sai; gomichu heelliichono badhensaanni sa'e,

²⁰ Gibitsootunna Israeelete mereero uurritu; gomichuno Gibitsootaho tunsiisi; Israeelete widoonni kayinni xawi; kunnira hashsha wo'ma Gibitsete olanto Israeelootunniwa gamba yitukkinni galtu.

²¹ Museno angasi baaru aana diriirsi; Kaaliiqino wolqaataame soojjaati bubbe abbeenna hashsha wo'ma bubbissanni galte baara lamewa badde baatto mooshshitu.

²² Israeelete mannino baaru giddoonni moola baatto kaxxanni sai; wayino guraanninna qiniiteenni gammalu gede ikke uurri.

²³ Gibitsootu, Feriooni faradinna faradi gaare, faradaasine baalu shorritanni hoodensa baaru giddora e'u.

²⁴ Duu'mo saaqqukkinni Kaaliiqi giiratenna gomichu heelliicho iima hee're Gibitsete olanto lae, garu ba"annonsa gede assi.

²⁵ Faradi gaarete qale amadeenna milli yaa hooggu; Gibitsootuno, «Kaaliiqi Israeelootaho gaaramanni noo daafira, kawiinni xoonqo» yitu.

²⁶ Kaaliiqi Muse, «Wayi Gibitsootu, faradi gaarensanna faradaasinensa aana kamballi yaanno gede, angakki baaru aana diriirsi» yii.

²⁷ Muse angasi baaru aana diriirseenna, baaru soodita dargisira higi; Gibitsootuno fulte xooqqara wo'naa'liturono, Kaaliiqi kayinni baaru giddo huninsa.

²⁸ Wayino dargisira hige hoodensa e'inore faradi gaare, faradaasinenna Feriooni olanto baala mittu nafa gattukkinni egemmi.

²⁹ Israeelete manni kayinni, baaru giddoonni moola baatto kaxxe sa"anno yannara, wayi guransaanninna qiniitensaanni gammalu gede ikke uurri.

³⁰ Kaaliiqi hakko barra Israeele kunni garinni Gibitsootu anganni gatise fushshinsa. Insano wayi fushshe tuginoha Gibitsootu reeshsha baaru gama affu.

³¹ Israeeleno Kaaliiqi Gibitsootu aana leellishinota jawaata wolqasi affe waajjitu; Kaaliiqanna soqqamaanchosi Museno ammantu.