FAARSO 91 - Qullaawa Maxaafa

MAGANU AGARAANCHONKEETI

¹ Wo'munkura Aliidiha golosi assi'rannohu, Wo'manka Dandaanno Magani hunda caa'lanno.

² Kaaliiqano, «Ati qiisho'yaatinna golo'yaati; hexxeemmohe Maganooti» yaanno.

³ Isi ugaaxaasinete woshshaadowiinninna, bushu dhibbinni gatisannohe.

⁴ Qoolisinni golannohe; towatannohe daafira keere hee'ratto; halaalisi ha'lannohe; agarannohe.

⁵ Hashsha dagganno dano, barra kaattanno koottalla,

⁶ tunsichunni daanno qoomama, qa'eessunni dagganno bala diwaajjatto.

⁷ Mulekki kumu, qiniitekkiinni tonnu kumi uwanno; ate mulira kayinni mitturino shiqqi diyaanno.

⁸ Maganu bushuulle qorichishanna, illekki callatenni la"atto.

^9-10 Kaaliiqi agaraanchokki, Wo'munkura Aliidihu golokki ikkino daafira, bushu coyi atewa shiqqi diyaanno; qoomamuno minikkira dieanno.

¹¹ Ha'rittowa baala agartannohe gede, sokkaasinesi hajajannohe.

¹² Kinchu gane gawajjannohekki gede, angansa woroonni worte kayissannohe.

¹³ Doobbiichonna buute kadde uurratto; waajjishanno doobbiichinna harfaamu hamashshira aanaanni ha'ratto.

¹⁴ Maganu, «Isi ane baxanno daafira agareemmosi; su'ma'ya ayirrisanno daafira goleemmosi.

¹⁵ Woshshi'rannoe woyite, ‹Yee› yeemmosi; qarramanno yannara ledosi hee'reemmo; gatiseemmosi; ayirrado asseemmosi.

¹⁶ Diro furmanno gede asseemmosi; gatisaanchimma'yano leellisheemmosi» yaanno.