FAARSO 90 - Qullaawa Maxaafa

GAFA 4 MANNU HEESHSHO

MAGANU MANCHI MUSE HUUCCATTO

¹ Mooticha'ya ati ilamate ilamara hee'neemmowaati.

² Ilaalla kalaqantara albaanni, baattono safantara albaanni, hegere hegerera ati Maganoho.

³ Manna galagalchite bushshu giddora qolatto; «Manna galagalte dayottowa higi!» yaatto.

⁴ Ate illera kumu diri mittu barri gedeeti; hashshi baqqinati gedeeti.

⁵ Ninke albakkiinni haaqeete gedeeti; lolahu gede hedeweelcho haadhe ha'rattonke. Ninke soodo mudhanno hayisso gedeereeti.

⁶ Hayisso soodo mudhe, hawarro mooltanno.

⁷ Hanqikki gudinonke; aarikki egemminonke.

⁸ Cubbonke albakkiinni worootto; golloommota saonke nafa afootto.

⁹ Aarikkinni kainohunni heeshshonke hara'mitino; dirinke foolu gede, hakkawoyintenni goofino.

¹⁰ Hee'neemmohu 70 dirooti; bati'raa bati'riro 80 ikkanno; ikki garano ikkiro, heeshshonke qarru wo'minote; dirinke rahe goofannoho; ninkeno sa'neemmoreeti.

¹¹ Hanqikki jawaante afinohu ayeti? Aarikki, ninke ate waajjineemmohe geeshshiho.

¹² Egennaamma ikkineemmo gede, dirinke harancho ikkinota rosiisinke.

¹³ Hanqikki mamooti geeshsha keeshshanno? Kaaliiqa ballo, soqqamaanokkira alba higinke.

¹⁴ Dirinke baalunni tashshi yaannonke gedenna, hagiidhineemmo gede, soodo soodontenni bagamannokki baxillikkinni duushshinke.

¹⁵ Qarra afisittonke diri deerrinni, bunshe anfummo bikkinni hagiirre uyinke.

¹⁶ Ninke soqqamaanokki jawaata loosokki la'neemmo gedenna, oosonke ayirrado wolqakki affanno gede assi.

¹⁷ Mooticha Maganonke, ninkera ate elle ikkitonke; assi'neemmore baala qineessinke.