FAARSO 86 - Qullaawa Maxaafa

KAA'LO AFI'RATE SHIQINSHOONNI HUUCCATTO

DAAWITI HUUCCATTO

¹ Kaaliiqa, ani wolqiweelohonna gadadaamohona, macciishshite dawarie.

² Atera aamamoommohona lubbo'ya agarie; Magano'ya ballo, hexxeemmoheha ane borojjichokki gatisie.

³ Mooticha'ya ballo, barra wo'ma ate woxarateemmona mararie.

⁴ Mooticha'ya ballo, ate huucci'reemmona, ane borojjichokki hagiirsiisie.

⁵ Ati shaqqadohonna cubbono agurattohona, woshshidhannoherira baalaho bagamannokkiha baxillekki leellishattonsa.

⁶ Kaaliiqa'ya ballo, huuccatto'ya widira maccakki qoli; woxarata'yano macciishshie.

⁷ Huucci'reemmore wonshattoe daafira, qarrameemmo barra ate woshshi'reemmo.

⁸ Mooticha! Magannate giddo ate lawannohu dino; ati loosatto looso loosa dandaannohu dino.

⁹ Mooticha, kalaqoottonsa daga baala, dagge albakkiinni kumbuultanno; su'makkino ayirrissanno.

¹⁰ Magano, ati jawaho; maala'linanni coye assatto; Maganu ate callaati.

¹¹ Kaaliiqa ballo, halaalikkinni qaafeemmo gede doogokki rosiisie; ate ayirrisate beehaminokki wodana uyie.

¹² Mooticha Magano'ya, wo'mu wodani'yanni galata eemmohe; su'makkino hegere geeshsha ayirriseemmo.

¹³ Bagamannokkihu baxillikki anera bati'ra ikkino daafira, lubbo'ya balete afiinni gatisootto.

¹⁴ Magano! Boonaleeyye aana'ya ka'inoe; atere haja assitannokkiri kaajjaddu shitaera hassinoe;

¹⁵ Mooticha'ya, ati maarattohanna mararattoho; hanqate muddamattokkiho; bagamannokkihu baxillikkinna halaalikki bati'raho.

¹⁶ Soqqamaanchokki beettira ane soqqamaanchikkira, alba higge mararie; jawaachishie; gatisie.

¹⁷ Kaaliiqa ballo, ellekki malaate leellishie; ati kaa'lattoetanna jawaachishattoeta, gibbannoeri affe saalfattanno.