FAARSO 80 - Qullaawa Maxaafa

ISRAEELE HAAROO'MITANNO GEDE SHIQINSHOONNI HUUCCATTO

FAARSAANOTE ROORRICHIRA BUUDU XURUMBINNI ASAAFITA GALATA KULATE FAARSO

¹ Yooseefi sircho ge'reewu gede massagattohu, Israeelete allaalaancho ballo, macciishshinke! Kirubeeli iimaanni ayirradu barcimikkira ofolte leelli.

² Efireemira Biiniyaamiranna Minaasera wolqakki leellishi; ninkeno gatisate amo.

³ Magano ballo, haaroonsinke; ganteemmo gede maarokki leellishinke.

⁴ Olantote Magano Kaaliiqa ballo, mannikki huuccatto macciishsha gibbeenna, hanqikki buwannohu mamooti geeshshaati?

⁵ Dadille sagalimma itisoottonke; hindiiddo woyya finiinchira wonshite hayikkisoottonke.

⁶ Qooxeessinkera heedhanno gosa, hettissannonke gede assoottonke; diininkeno qacifatinonke.

⁷ Olantote Magano, haaroonsinke; ganteemmo gede maarokki leellishinke.

⁸ Gibitsetenni woyinete kaashsho abbootto; daga shorrite hunte ise kaasootto.

⁹ Dargano maxarte seekkoottose; rumushshiseno baatto raqqe eino; iseno gobba wo'mitino.

¹⁰ Caalise ilaalla guggushshino; sinnaseno jajjabba daguwa caalshiishshino.

¹¹ Sinnaseno Mediteraaniyu Baari geeshsha, caaffaseno Efiraaxisi Wayi geeshsha iillitu.

¹² Huxxase mayira diigge hunitto? Kune sa"aahu baalu laalose tattayisi'ranno.

¹³ Dubbu manchaame kakkaddannose; dubbu moyichino itannose.

¹⁴ Olantote Magano ballo, xaate higinke; gordoho heedhe kawa higge lainke. Tenne woyinete haqqichono towati.

¹⁵ Tenne haqqicho angakkinni kaasi'rootto; kaajjite lophitanno gede assootto.

¹⁶ Baarigaarrase buqqisse giirate tugginosena, insa hanqikkinni gudi.

¹⁷ Doodhootto manchonna, jawaata assoottota gosakki gatisi.

¹⁸ Xaate kunni ka'a atewiinni difanfeemmona, lubbotenni worinke; ninkeno ate magansi'neemmo.

¹⁹ Olantote Magano Kaaliiqa ballo, haaroonsinke! Ganteemmo gede maarokki leellishinke.