FAARSO 78 - Qullaawa Maxaafa

MAGANU MANNASI MASSAGANNO GARA

ASAAFI ROSIISHSHA

¹ Manna'ya, rosiiseemmo'nere macciishshe; macca'neno qaali'ya widira qolle.

² Coye'ya maammaashshunni hanafeemmo; hundinni kayise maaxamino coye xawiseemmo.

³ Kuni macciishshinoommohunna anfoommohu, ninkera annuwanke kultinonkeho.

⁴ Kaaliiqi wolqa, loosino loosonna assino dhagge, oosonkera dimaanxeemmo; dagganno ilamarano kulleemmo.

⁵ Yaiqoobira hajajo, Israeelete seera uyino; annuwankeno oosonsara rosiissanno gede hajajino.

⁶ Hatto assinohuno, dagganno ilama affe, oosonsara rosiissanno gedeeti.

⁷ Kunni garinni Magano hexxitanno. Isi assinore baala dihabbanno; hajajosino ayirrissanno.

⁸ Albi akaakkansa gede haxawarrootanna maahoyye gibbinore di"ikkitanno; albiri kaajjite Magano diaddaxxitinoreeti; Maganohono ammanantino gedeenni diheedhino.

⁹ Efireemi ooso olu bagado amaxxite heedhenni, olu barra badhera higge xooqqino.

¹⁰ Maganu ledo e'ino gondooro diagadhino; seerisi garinni gala gibbino.

¹¹ Loosino loosonna leellishinonsa dhaggeno habbino.

¹² Gibitsete gobbara Tsoaani yinanni xawira, annuwansa la'anna Maganu maalale loosino.

¹³ Baara lamewa beehe, waa gammalu gede asse uurrise giddoonni qole sayisinonsa.

¹⁴ Barra gomichunni, hashsha giirate xawaabbinni massaginonsa.

¹⁵ Halallitte gobbara kinna dare, baattote giddonni lowo waa uyinonsa.

¹⁶ Kinchu giddonni buicho fushshino; waano xashshimma lolaasino.

¹⁷ Insa kayinni, cubbo cubbu aana leddanni Magano hanqissu; halallitte gobbara Wo'munkura Aliidihura hajajama gibbu.

¹⁸ Halchitino sagale aannonsa gede qarrissanni, guulte Magano jiffu.

¹⁹ «Halallitte gobbara sagale qixxeessara dandaannoni?

²⁰ Kincho ganeenna wayi xashshimma lolahino; buddeenano hatto asse aara dandaannoni? Mannisira maalano qixxeessa dandaannoni?» yitanni Maganu aana busha coyidhino.

²¹ Kaaliiqi konne coye macciishshe hanqi; mannisi aana giira bushshi; hanqisino insa aana lexxi.

²² Kuni ikkinohuno, iso addaxxanna, gatisannonsatano ammana gibbinohuraati.

²³ Ikkollana kayinni gomicho iiminni hajajino; gordu waalchuwa fanino.

²⁴ Ittanno gede, «Menna» yinanni sagale xeenimma dirrisinonsa; gordu sagaleno uyinonsa.

²⁵ Kunni garinni mannu sokkaasinete sagale itino; Maganuno, ikkite gattanno geeshshi sagale soyinonsa.

²⁶ Gordunni soojjaati bubbe bubbissanno gede assi; wolqasinni wodiidi bubbe soyi.

²⁷ Maala bushshimma, intanni ceano baaru shaafi gede asse dirrisinonsa.

²⁸ Tenne ceano qachinsa mereero, dukkannansa gaangaawira dirrisinonsa.

²⁹ Maganu halchonsa wonsheenna, insano itte lowo geeshsha duubbu.

³⁰ Ikkollana kayinni, halchitinore ee hee'reennansanni, ittannorino afiinsara hee'reennanni,

³¹ Maganu hanqi aanansa dirri; insa giddonnino umo afidhinore shii; Israeelete giddonni wedella gudi.

³² Hatto assanni hee'reennanni cubbo loosa diagurtino; assino maalalennino iso diaddaxxatino.

³³ Kunnira, dirinsa yaaddotenni goofanno gede assino; barrinsano mulenni qocci yii.

³⁴ Insa giddonni gama shiita, gattinori isiwa higgino; aagintaabbanni iso huuccidhanno.

³⁵ Maganu golonsa ikkinota, Wo'munkura Aliidi Magani gatisaanchonsa ikkinota qaaggu.

³⁶ Ikkeennano, afiinsanni awaawurtinosi; arrawinsannino dogginosi.

³⁷ Wodaninsa isi ledo dino; ledosi e'ino gondooro diayirrissino.

³⁸ Isi kayinni maarannoho; cubbonsa agurinonsata ikkinnina dihuninonsa; batinye hige hanqosi hoolino; duucha hige aarasi ittisino.

³⁹ Fule galagale higannokki fooli gede, reyitannore ikkitinota qaagino.

⁴⁰ Halallitte baattora batinye higge hajajama gibbinosi; moola gobbara duucha higge dadillissinosi.

⁴¹ Marro higge Magano jiffinosi; Israeelenniha Qullaawa Magano aarsitinosi.

⁴² Insa wolqasi habbino; diininsa anganni gatisinsa barrita diqaaggino.

⁴³ Gibitsete Tsoaani xawira assinoha, maala'linannihanna dhaggeeffantanniha loososi habbino.

⁴⁴ Hadhannota wayibbansano mundeete soorrino; bu'ansano aggannokki gede assino.

⁴⁵ Mundeensa xuuxanno gede toronde, baatto huntanno gede beche'naama soyino.

⁴⁶ Gidensa itanno gedenna, jajjansa gudanno gede kanchafare soyino.

⁴⁷ Woyinete kaashsho kaadetenni, laaltanno haqqe qorrunni gudi.

⁴⁸ Saadansa kaadetenni, ge'reewonsano banqotenni shii.

⁴⁹ Hanqisi qoomama aanansa dirrisino; qoomamanna qarra reyote sokkaasinera soyino.

⁵⁰ Hanqosi di"ittisino; insano reyotenni digatisino; lubbonsa qoomamunni shiino.

⁵¹ Umo ilantinota Gibitsete ooso baala shee gudino.

⁵² Hakkunni gedensaanni, mannasi ge'reewu gede asse massage fushshino; halallitte gobbara albaanni hige haa're ha'rinonsa.

⁵³ Keerunni haa're ha'rinonsa; insano diwaajjitino; diinnansa kayinni baaru egemmino.

⁵⁴ Qullaawa baatto, isi umisi amadinotewa, ilaalaame gobba haa're abbinsa.

⁵⁵ Mannisi alba hige ha'ri deerrinni, daga albinsanni shorrino; baattono siiwotenni beehinonsa. Dagate minnano mannisira uyino.

⁵⁶ Insa kayinni Wo'munkura Aliidi Magano jiffinosi; maahoyye gibbinosi; hajajosino diayirrissino.

⁵⁷ Annuwansa gede maahoyye gibbe badhe wodhitinosi; shokkashshu maxxi gede hexxinannikkire ikkitino.

⁵⁸ Gaaraho magansidhannowa hanqissinosi; seekkinoonni misillanni aarsitinosi.

⁵⁹ Maganuno konne assoote lae hanqe, Israeelete manna horonta giwi.

⁶⁰ Mannu mereero worinoha dukkanasi, galanno darga Seelo agurino.

⁶¹ Wolqasi malaate qafadisiisino; ayirrinyisi egenshiishsha ikkinoha, Taaboota diinaho sayise uyino.

⁶² Mannisira lowo geeshsha hanqe, diinu shaannonsa gede assino.

⁶³ Wedellansa giira itte shitu; seennensano adhannohu hoogi.

⁶⁴ Qeesootansano bagadu shiino; meentinsano wi'la didandiino.

⁶⁵ Mootichuno goxanotenni kainohu gede ikke kai; woyinete xajje agino bareedi gede ikki.

⁶⁶ Baarigaarrasi badheegise shorri; hegere saalira tuginsa.

⁶⁷ Yooseefi sircho didoorino; Efireemi ga'reno dihasi'rino.

⁶⁸ Kayinnilla Yihudu ga'renna, baxinoha Tsiyooni Ilaala doorino.

⁶⁹ Hakkiicho, gordoho nooha minesi lawannoha, Qullaawa Mine mi'nino; baattote gede hegerera kaajje hee'ranno gede assino.

⁷⁰ Borojjichosi Daawiti doodhino; ge'reewu allaalewiinni haa'rinosi.

⁷¹ Ge'reewo allaalannowiinni abbe, Israeelete mootenna Maganu manna agarannoha assinosi.

⁷² Daawitino taalu wodaninni agarinonsa; hayyotenni massaginonsa.