FAARSO 73 - Qullaawa Maxaafa

GAFA 3 ( Far 73—89 ) MAGANU TAASHSHA

ASAAFI FAARSO

¹ Maganu wodana subbinorira, Israeelete hiittoo shaqqadooti!

² Ani kayinni gufi're hoogoommo; uwammora shiimurilla gatinoe.

³ Bushuulleho qiniinonsata afe, hattenne boonaleeyye lae hinaasummo.

⁴ Jawaatoota ikkitino daafira, dhibbunna qarru diamadannonsa.

⁵ Mannu gede diqarrantanno; wolu gede digawajjantanno.

⁶ Kunnira, boo'na irridhu; saonna sarxe haraqidhu.

⁷ Illensa coomu ketti assino; wodaninsara bunshe wo'mitino.

⁸ Bunshetenni ceeggifattanni coyidhanno; boo'natenni woloota okkitanno.

⁹ Maganu aana busha coyidhanno; mannu aanano afii-wo'ma coyidhanno.

¹⁰ Kunninni kainohunni, Maganu manni nafa insawa higanno; insa yiture baala macciishshanno.

¹¹ Insano, «Maganu ma afino? Wo'munkura Aliidihu egenninori nooni?» yitanno.

¹² Kuneeti bushuullu togooreeti; jirote aana jirolla lexxitanno.

¹³ Anino wodana'ya beebba qarrisoommo; beebballa cubbo qorophoommo.

¹⁴ Barra wo'ma shetto afoommo; soodanno kiiro qi'miidamoommo.

¹⁵ Hatto yee coyi'roommoha ikkoommero, mannikkira sao asse hoogoommo.

¹⁶ Konne coye afammora hedoommo; kuni kayinni anera qarraho.

¹⁷ Qullaawu Minikkira eummohu gedensaanni, cubbaataammu gawalo afoommo.

¹⁸ Insa lixu giddo worootto; ubbe gooffanno gede assitto.

¹⁹ Hedeweelcho ba'u; higgannokki gede ikkite gooffu.

²⁰ Ati ka"atto woyite, haaqii'noonni haaqee gede hawantanno.

²¹ Wodani'ya aaramanno yannara, giddo'ya fooggaltanno woyite,

²² afoommori nookkiha jallaaga ikkummo; ate albaannino saadate gedeeho.

²³ Ikkirono wo'manka woyite ani ate ledo noommo; atino qiniiticho anga'ya amadoottoe.

²⁴ Amaalekkinni massagoottoe; gedensaannino ayirrinyunni atewa gamba assittoe.

²⁵ Gordoho ate ka'a ayi nooe? Baattote aanano ate afi'rummohu ka'a wolu ma"assannoe?

²⁶ Maali'yanna wodani'ya goofiro nafa, Magani'ya kayinni wodani'yara jawaantete; hegere geeshsha kaayyo'yaati.

²⁷ Kuneeti atewiinni faffannori ba'anno; ate agurtannore baala hunatto.

²⁸ Anera kayinni Maganunniwa gamba yaa woyyitannoe; Tsiyooni waalchira uurre dhaggenniha loososi kulate, Mooticha Magano golo'ya assi'roommo.