FAARSO 69 - Qullaawa Maxaafa

KAA'LO AFI'RATE SHIQINSHANNI HUUCCATTO

FAARSAANOTE ROORRICHIRA BUUDU XURUMBINNI DAAWIT FAARSO

¹ Magano ballo! Wayi kokke iillinoena gatisie.

² Leepho egemmitue; kaxxe uurreemmowano hoogummo. Diimete giddora eummo; lolahuno iimaanni hige saie.

³ Woxaratate batinyinni daafuroommo; kokkeno mooltue; Magano'ya agadhanna ille xissitue.

⁴ Beebbatenni gibbannoeri umi'ya dananchi kiironni roortino; huntaera hassannoeri baarigaarra'ya wolqissinoe; adhoommokkiha qoli yitanni giddeessitue.

⁵ Magano'ya ballo, hambe'ya egennootto; cubbi'yano atera digo'linohe.

⁶ Olantote Mooticha Magano! Hexxitannoheri anenni kainohunni saalfattoonke; Israeelete Magano! Hasidhannoheri anenni kainohunni shollitoonke.

⁷ Ate daafira xonnannae cincoommona, saaluno ille beeshshinoena.

⁸ Roduuwi'yara allaggicho, ayiddi'yara wosincho ikkoommo.

⁹ Minikki laala amaddinoe; xontannoheri xonono aana'ya ubbino.

¹⁰ Manninate'ya qatumatenni hunquffi assoommo; kunninni kainohunni mannu xoninoe.

¹¹ Xiddu uddano uddi'rummota, haariintanni oso'litue.

¹² Nafara ofoltannori anerella assitanno; dimbaasine ane su'minni sirbitanno.

¹³ Kaaliiqa'ya, ani kayinni macciishshate hasi'ratto yannara, ate huucci'reemmo; Magano, ati gatisate ootto hexxo wonshattoha ikkoottohura, bagamannokkihu baxillikki deerrinni dawarie.

¹⁴ Rirriwu egemmannoekki gede agarie; gibbannoeriwiinninna diimetenni gatisie.

¹⁵ Lolahu aanaanni hige saoonke"e; diimeno egemmitoonke"e; baleno giddora qo'lite cufidhoonke"e.

¹⁶ Kaaliiqa! Bagamannokki baxillikkira yite dawarie; mararrokki batinyinni anewa higge lai.

¹⁷ Ane borojjichikkira albakki maaxxootie; lowo geeshsha shetoommona rakke dawarie.

¹⁸ Anewa dagge gatisie; baarigaarra'ya anganni wodie.

¹⁹ Ati xonama'ya, saalfata'yanna sholla'ya afootto; shetissannoere baala ati affanni nootto.

²⁰ Xono wodana madiissitinoe; hexxono mudhoommo; mararannoeha hasi're hoogoommo; sheshifachishannoehano diafi'roommo.

²¹ Hudi'rummota qaraartino sagale uyitinoe; goo'rummota shiisha hayikkissinoe.

²² Hurbaatinsa bagado ikkonsa; kakkalote sagale huntannota ikkitonsa.

²³ La'annokki gede illensa tunsito; wo'manka woyite badhensa ukkito.

²⁴ Aarikki aanansa dirro; buwannohu hanqikki haa'ronsa.

²⁵ Heedhanno gobba onto; minensa galannohu hoogo.

²⁶ Ati ganoottonsare gadadissannonsa; ati madiissoottorira qarra leddanno.

²⁷ Cubbonsa sammi yite cori; maarono uyitootinsa.

²⁸ Heeshshote maxaafi giddonni huninsa; keeraanote ledo su'minsa borreessamoonke.

²⁹ Ani qarraataamohonna madaanchoho; Magano'ya ballo, gatisaanchimmakkinni agarie.

³⁰ Magano faarsotenni galateemmo, galatu faarsonni lowimmasi lallaweemmo.

³¹ Kuni coyi saada kakkalatenninna, woraamo gorratenni roore Magano tashshi assanno.

³² Konne coye affanno woyite qarraataammu hagiidhitanno; Magano magansidhannori jawaattanno.

³³ Maganu gadadaammu huuccatto macciishshanno; usurame nooha mannasi sammi yee diaguranno.

³⁴ Gordunna baatto, baarunna giddosi noohu baalu galatannosi.

³⁵ Maganu Tsiyooni gatisanno; Yihudu katamma galagalche minanno; mannisino hakkiicho hee'ranno; baattono amadanno.

³⁶ Soqqamaanosi sirchino hattenne baatto ragi'ranno; iso baxxannori hakkiicho heedhanno.