FAARSO 62 - Qullaawa Maxaafa

MAGANU AGAROOSHSHE HAWAQI'RA

FAARSAANOTE ROORRICHIRA EDOOTAAMITA DAAWITI FAARSO

¹ Gatisannoehu Magano calla ikkinohura, cince iso agadheemmo.

² Isi callu golo'yaati; gatisaancho'yaatinna, qiisho'yaati; kunnira, dargi'yanni ayino milli diassannoe.

³ Haawiino mininna uwara rahino huxxi gedee mancho gawajjitinanni; ki'ne baalunku mamooti geeshsha heedhinanni?

⁴ Ayirrinyesi moofisate amaalantinanni; kapho coyi'rate hagiidhitinanni; afii'nenni maassidhinanni; wodani'nenni kayinni runtinanni.

⁵ Hexxeemmohu isootina, lubbo'ya, ati sammi yite Magano calla agadhi.

⁶ Isi callu golo'yaatinna gatisaancho'yaati; isi qiisho'yaatina dargi'yanni milli assannoehu dihee'ranno.

⁷ Gato'yanna ayirrinyi'ya Maganunniiti; isi qiisho'yaatinna jawaata golo'yaati.

⁸ Manna! Wo'manka woyite iso addaxxe; isi golonkeetina, qarra'ne baala isira hasaaphe.

⁹ Mannu baalu fooraru gedeeho; afi'rinohuno hooginohuno baalunku mullareeti; keennanni woyite shote baino. Foollanni fooli geeshsha nafa di"ikkino.

¹⁰ Wolqisa'nenni adawadhitinoonte; saantine duubbinara heddinoonte; jiro afidhiniro nafa, ise addaxxitinoonte.

^11-12 Maganu, «Wolqanna bagamannokki baxilli aneho» yee coyi'ranna lame hige macciishshoommo. Mootichu, mittu mittunkura loosisi garinni aanno.