FAARSO 56 - Qullaawa Maxaafa

MAGANO ADDAXXA

FAARSAANOTE ROORRICHITA GEETI FILISXEEMOOTU AMADDUSI WARO XEERTOTE HAQQE AANA NOO LEMBOOLI GARINNI FAARSINOONNITA DAAWITITA MURGOTE FAARSO

¹ Magano! Mannu xiiwannoena, baarigaarra'yano wo'ma woyite gadadissannoena mararie.

² Insa barra wo'ma miiccannoe; qassannoerino kiiro haammataho.

³ Waajjillu amadannoe yannara, ate addaxxeemmo.

⁴ Uyinoe hexxo daafira Magano galaxxeemmo; iso addaxxeemmo daafira diwaajjeemmo. Mannu ma"assannoe?

⁵ Baarigaarra'ya barra wo'ma qarra kalaqqannoe; anera busha coye calla maltanno.

⁶ Gamba yite gaa'lite agartannoe; shitaera hasidhe ani asseemmore baala la'anno.

⁷ Magano ballo, assitanno bunshera qorichishittonsakkinni agurtooti; hattenne daga hanqikkinni gani.

⁸ Mageeshsha qarramoommoro ati afootto; mageeshshi hindiiddo du'noommoro egennootto. Baalunku coyi maxaafikkirawe borreessame no!

⁹ Ate woshshi'reemmo woyite, baarigaarra'ya badhera higganno; kunninni Maganu ledo'ya noota afeemmo.

¹⁰ Uyinoe hexxo daafira, Magano galaxxeemmo; uyinoe hexxo daafira Kaaliiqa galaxxeemmo.

¹¹ Iso addaxxeemmo daafira diwaajjeemmo; mannu ma"assannoe?

¹² Magano! Xa'noommohe xano atera uyi'reemmo; galatu afanshano abbi'reemmohe.

¹³ Lubbo'ya reyotenni, lekka'ya gufi're uwatenni agarootto; heeshshote xawaabbi giddo ate albaanni ha'rameemmo.