FAARSO 55 - Qullaawa Maxaafa

JAALU GIWINOSI MANCHI HUUCCATTO

FAARSAANOTE ROORRICHIRA BAGANUNNI DAAWITI FAARSONNA ROSIISHSHA

¹ Magano'ya ballo, huuccatto'ya macciishshi; eegama'yano lashshi assitooti.

² Seekkite macciishshite dawarie; yaaddotenni kainohunni quuroommo;

³ baarigaarra'ya waajjishiishshinni kainohunni masoommo; bushuullu gadadishshinni kainohunni hiiqqamoommo; aana'ya qarra abbitanno; hanqitannoe; gibbannoe.

⁴ Wodanu shafamie; reyote waajjilli doyissie.

⁵ Waajjillunna masillu dayie; qarruno beeshshe amadie.

⁶ Lembooli gede qoola afi'roommoro, buuwe bae fooliishshi'reemmohu baino!

⁷ Mayi xeerti're ha're, halallitte gobbara ofollo;

⁸ hombobolattetenna wolqaataame bubbewiinni, mayi rahe xooqe bae hee'reemmowa afi'ro!

⁹ Mooticha'ya ballo, assinanni beebbanna gibbo katamu giddo afoommona, hedonsa diigi; afoonna arrawo soorrinsa.

¹⁰ Xagarronna qarru katamu giddo no; insano, hashshanna barra katamu huxxa doyitanno.

¹¹ Base baalate bunshe no; xagarronna hanaaqu dikkonsara dihooganno.

¹² Baarigaaru xonoomme"ero cinceemmo; giwannoehu aana'ya boo'noommero, albisinni shawwu yeemmo.

¹³ Konne coye assattohu kayinni, darawo'ya, miila'yanna jaala'ya ikkoottohu ateeti;

¹⁴ wolootu ledo mitteenni Maganu minira ha'nanna, hagiidhinanni wodaninketa hasaamboommo.

¹⁵ Minensanna mereeronsa bunshe noo daafira, baarigaarra'yara reyo daggonsa; yanni-male reyito insa.

¹⁶ Ani kayinni Magani'ya Kaaliiqiwa hige raareemmo; isino macciishshe gatisannoe.

¹⁷ Soodo, barranna hashsha isira qaxxadheemmo; isino qoonqo'ya macciishshanno.

¹⁸ Batinyu diini ledo olameemmowiinni, hobbaase qolannoe.

¹⁹ Bunshete doogonsanni higgannokkihuranna Maganono waajjitannokki daafira, hundunni kayise gashshino Magani huuccatto'ya macciishshe shollishannonsa.

²⁰ Jaali'ya baxillaanosi aana kai; gondoorono diigi.

²¹ Afiisi buuroho; wodanisira kayinni koma wo'mitino; qaalisi owaataho; kayinnilla bisete gede murannoho.

²² Isi irkisannohena, yaaddokki Maganu aana tugi; isi keeraancho qeelamara wore dila"anno.

²³ Magano, ati kayinni bushuulle qile balera tugi; manna shitannorinna dogaasine taaloote dirono diheedhanno; ani kayinni ate hexxeemmo.