FAARSO 50 - Qullaawa Maxaafa

HALAALAANCHO MAGANSI'RA

ASAAFI FAARSO

¹ Magannate Magani Kaaliiqi coyi'ranno; soojjaatinni galchimira baattote aaninni manna baala woshshanno.

² Maganu xummesira kullanniri nookki katamira, Tsiyooni hee're xawanno.

³ Maganinke daanno; sammi diyaanno; ittanno giira albasiinni no; wolqaataame bubbe gaangaawisira no.

⁴ Mannisira yoo yaanno yannara, gordonna baatto naqaashshe asse kiidhe,

⁵ «Kakkalotenni ledo'ya gondooro e'inore, dooraminoha manna'ya anewa gamba asse» yaanno.

⁶ Maganu yoo yaannoha ikkino daafira, gorduno halaalaanchimmasi farchi'ranno.

⁷ Manna'ya kuleemmo'nena, macciishshe"e; Israeele ki'ne aana naqqaseemmona, macciishshe; Maganu ani Magano'neeti.

⁸ Wo'manka woyite albi'yara shiqishshinanni fushshaatenna, shilqote kakkalo'ne diabbooshshi'roommo.

⁹ Lali'ne giddonni woraamo, mei'ne giddonni goco dihasi'roommo.

¹⁰ Dubbu moyichi baalunna kume ilaalla aana noo saada baala anete.

¹¹ Gaaru cea baalanta egennoommo; dubbu kalaqami baalu aneho.

¹² Baattonna aanase noori baalu aneha ikkino daafira, hudi're ki'nera diku'leemmo.

¹³ Woraamu maala iteemmoni? Meichu mundee ageemmoni?

¹⁴ Maganoho galatu kakkalo kakkalle; Wo'munkura Aliidihura xano'ne uyidhe.

¹⁵ Qarru barra woshshidhe"e; anino gatiseemmo'ne; ki'neno ayirrissinannie.

¹⁶ Maganu kayinni bunshe assitannore, «Seejjo'ya gibbinoonni; hajajo'yano mishshinoonnina,

¹⁷ seejjeemmo'neta gibbinoonni; hajajo'yano mishshinoonni.

¹⁸ Mooraancho affinanni woyite ledo doddinanni; hoshsha'neno foortannori ledooti.

¹⁹ Afii'nera bunshe batidhino; arrawi'ne sarraaqo coyi'ranno.

²⁰ Ofoltine fiixa'ne he'mitinanni; ama'ne beettono su'ma huntinanni.

²¹ Konne baala assitinanna sammi yee laummota, ane ki'ne gedeeha assitine kiirtinoonnie; xa kayinni xawoho abbooshshi're, la'inanna borooreemmo'ne.

²² Ki'ne ane habbinanniri, xa yeemmota wodanche; ka'a woyite kayinni huneemmo'ne; gatisanno'nehuno dihee'ranno.

²³ Ayirrisannoehu galata kakkalannoe; hajajamannoehurano ani gatisaanchimma'ya leellisheemmosi» yaanno.