FAARSO 5 - Qullaawa Maxaafa

EEGGOTE HUUCCATTO

SUUSULLETENNI FAARSAANOTE ROORRICHITA DAAWIT FAARSO

¹ Kaaliiqa ballo, yeemmore macciishshie; uratto'yano lashshi assitooti.

² Magano moote'ya, ate huucci'reemmona, kaa'lote raareemmo raare macciishshie.

³ Kaaliiqa, soodimaroho qoonqo'ya macciishshatto. Anino soodimaroho huuccatto'ya atewo shiqishi're dawaro agadheemmo.

⁴ Ati bunshe baxattokki Maganootina, bunshe assitannori ate ledo diheedhanno.

⁵ Boonaleeyye albakkiinni diuurritanno; bunshe assitannore baala giwatto.

⁶ Kapho coyidhannore hunatto; mararro nookkirenna xagaraamma hashakkidhe giwatto.

⁷ Ani kayinni bati'ra maarokkinni kainohunni minikkira e"eemmo. Ate ayirrisatenni Qullaawu Minikkira e"e kumbuuleemmo.

⁸ Kaaliiqa eeggote! Baarigaaru batirinoe daafira, keeraanchimmakkinni massagie; ha'reemmo doogono suwisie.

⁹ Baarigaarra'ya afiira halaalu dinona, wodaninsanni bao calla heddanno; kokkensa fa'nantino waamma gedeete; arrawinsannino manna dogganno.

¹⁰ Magano'ya ballo, assitino bunshera qorichishinsa; bunshensa batidhinohuranna maahoyye gibbinohura, uminsa gano huntonsa; atino albikkinni hoolinsa.

¹¹ Ate addaxxitannorira baalaho kayinni tashshi yaannonsa; hegerera hagiirrunni faarsitanno; baxxannohere baala agarattonsa; insano wo'manka woyite hagiidhitanno.

¹² Kaaliiqa, ati keeraano maassi'ratto; wonqote gede baxillikkinni golattonsa.