FAARSO 42 - Qullaawa Maxaafa

GAFA 2 ( Far 42—72 ) MAGANO SINSINNAAWA

FAARSAANOTE ROORRICHIRA QORE OOSO ROSIISHSHA

¹ Bulaa buichote waa sinsinnaabbannonte gede, Magano! Hattonni lubbo'ya ate sinsinnaabbanno.

² «Mamoote iilleemma? Magani'ya albano mamoote laeemma?» yite, lubbo'ya heeshshote Magano goodhanno.

³ Baarigaarra'ya wo'manka woyite, «Maganikki hiikko no?» yitannae, hashshanna barra hindiiddo sagale ikkitue.

⁴ Ani albaanni hige lowo manni ledo Maganu Minira ha'ranna, ayyaana ayirrissannori galatu faarsonni Magano galattino; konne coye qaaganna wodani'ya dadillunni hiiqqami.

⁵ Lubbo'ya ballo, mayira dadillatta? Mayirano daassattae? Xaano galagale Magano gatisaancho'ya galaxxeemmona, atino iso hexxi.

⁶ Magano'ya ballo, lubbo'ya daassitannae, Yordaanoosi gobbara Hermooni Mizaari Ilaalira hee're qaageemmohe.

⁷ Foonchikki huuronni diime mimmito woshshitanni, dambalikkinna lolahikki baalu aana'yaanni hige sai.

⁸ Kaaliiqi barra, bagamannokki baxillesi soyannoe; hashsha faarso aannoe; tinino, heeshsho'ya Maganira shiqishi'reemmo huuccattooti.

⁹ Magano, «Ati digolo'yaati? Mayira hawittoe? Baarigaarra'ya gadadishshinni kainohunni, yaadanni hee'reemmohu mayiraati?» yeemmosi.

¹⁰ Baarigaarra'ya wo'manka woyite, «Maganikki hiikko no?» yite yaachishshannae, manninati'ya yaaddotenni manii'ri.

¹¹ Lubbo'ya ballo, mayira dadillatta? Mayira daassattae? Xaano galagale Magano gatisaancho'ya galaxxeemmona, atino iso hexxi.