FAARSO 37 - Qullaawa Maxaafa

BUSHUNNA DANCHU MANNI GAWALO

DAAWITI FAARSO

¹ Hayissote gede rakke mooltannorenna, darote gede giggiltannore ikkitinohura,

² busha manna la'e giirantooti; bunshe assitannore hinaassooti.

³ Uullate aana keere hee'ratto gede, Kaaliiqa addaxxi; dancha coyeno assi.

⁴ Kaaliiqinni tashshi yoohe; isino wodanikki halcho wonshannohe.

⁵ Doogokki Kaaliiqira eeggo uyi'ri; iso addaxxi; isino towatannohe.

⁶ Keeraanchimmakki xawaabbu gede, halaalekkino barri arrishsho gede xawisanno.

⁷ Cincite Kaaliiqi assannore agadhi; wolootu duroo'mituro, bunshe assitannorira qiniinsaro giirantooti.

⁸ Ateno bunshete giddora eessannohena, fooggaltooti; hanqonna giirama aguri.

⁹ Bunshe assitannori murantanno; Kaaliiqa hexxitannori kayinni baatto ragidhanno.

¹⁰ Bushuullu shiima yannalla keeshshitanno; dargaho la'e hoogatto.

¹¹ Shaqqaddu kayinni baatto ragidhanno; atootenna keere afidhe hagiidhitanno.

¹² Bushu manchi keeraanchoho busha malanno; mulla kae suume ga'mi'ranno.

¹³ Kaaliiqi kayinni, barru iillinosita afino daafira, oso'lannosi.

¹⁴ Buxanenna gadadaamma shitara, dancha loossannore gorritara, bisensa fushshitanno; digaanansa gonnitanno.

¹⁵ Insa uminsa bise shitannonsa; digaaninsano hiiqqamanno.

¹⁶ Keeraanchunniti shiima jiro, bushuullunnita lowo jiro roortanno.

¹⁷ Bushuullu cigile hiiqqantanno; keeraano kayinni Kaaliiqi irkisannonsa.

¹⁸ Kaaliiqi keeraano towatannonsa; iqqinsano geedonniho.

¹⁹ Bushu diri dayenna disaalfattanno; hudete yannarano ikkitanno geeshshi sagale afidhanno.

²⁰ Bushuullu kayinni gooffanno; Kaaliiqi baarigaarra daraarote gede giggiltanno; wiliilete gede ikkite ba'anno.

²¹ Bushu liqii'rannota ikkinnina diqolanno; keeraanchu kayinni shooshaqanno; wolehono aanno.

²² Kaaliiqi maassi'rinonsari baatto ragidhanno; ruminonsari kayinni murantanno.

²³ Kaaliiqi mannu qaafo suwisanno; ha'rinshonsannino hagiidhanno.

²⁴ Kaaliiqi irkisannonsa daafira, gufidhuro nafa diubbanno.

²⁵ Anje'yanni kayise techo geedhimma'ya geeshsha, keeraanchu tugamanna, sirchisino hudi're huucci'ranna afe diegennoommo.

²⁶ Isi wo'ma woyite callano aanno; liqiissannono; oososino maassantanno.

²⁷ Bunshetewiinni xooqqe, dancha coye assittoro, sirchikkino baattote aana geedanno.

²⁸ Kaaliiqi halaale baxanno daafira, keeraano dihunanno; keeraano hegerera heedhanno; bushuullu sirchi kayinni ba"anno.

²⁹ Keeraano baatto ragidhanno; ise aanano hegerera heedhanno.

³⁰ Keeraanchu afii hayyo rosiisanno; arrawisino taalo coyi'ranno.

³¹ Maganisi seera agadhanno; doogosi aaninni wirri diyaanno.

³² Bushu keeraancho duganno; shaasira hasi'ranno.

³³ Kaaliiqi kayinni keeraancho sayise diaannosi; yoote shiqe digaramanno.

³⁴ Kaaliiqa hexxittoro, hajajosino wonshittoro, baatto ragisiiseennahe ayirratto; bushuulluno ba'anna illekkinni la"atto.

³⁵ Bushunna kaajjadu manchi ayirre, Libaanoosi daguwi gede bati'rinoha afoommo;

³⁶ Higummo woyite kayinni dino; dargaho lae hoogoommo.

³⁷ Danchanna keeraancho mancho seekkite lai; gibbonna giwansho baxannokki manchi, sircho sa"anno.

³⁸ Sao assannohu co'o yee ba"anno; bushu sirchino muramanno.

³⁹ Keeraanote gatonsa Kaaliiqiwiinni dagganno; qarrinsa yannara isi qiishonsaati.

⁴⁰ Isiwa eeggo e'anno daafira, Kaaliiqi kaa'le gatisannonsa; bushuullu angannino fushshannonsa.