FAARSO 28 - Qullaawa Maxaafa

KAA'LO AFI'RATE SHIQINSHOONNI HUUCCATTO

DAAWITI FAARSO

¹ Kaaliiqa golo'ya eeggate, ate woshshi'reemmo; huuccatto'ya macciishsha gibbootie; sammi yite giwittoero kayinni bale ea'yaati.

² Anga'ya Qullaawu Minikki widira kayiseemmo yannara, kaa'lote huucci'reemmo huuccatto macciishshie.

³ Cubbaataammunna busha assitannori ledo goshooshshe huntootie; wodaninsara bunshe amadde heedhe, jaallansa arrawinsanni doggannori ledo huntootie.

⁴ Loosinsanna bunshensa garinni uyinsa; angansa loosi garinni dawarinsa; assitino beebba uminsara qolinsa.

⁵ Insa Kaaliiqi loosonna assino coye baala lashshi assitino daafira, hiiqqaqqe tugannonsata ikkinnina, galagalche dikayisannonsa.

⁶ Huuccatto'ya macciishshinoena, Kaaliiqi galatamo.

⁷ Kaaliiqi wolqa'yaatinna wonqo'yaati; wodani'yanni iso hexxeemmo. Kaa'lannoe daafira tashshi yaannae, galatu faarso faarseemmosi.

⁸ Kaaliiqi mannisira wolqansaati; buurinosi mootera gatote qiishooti.

⁹ Mannakki gatisi; utuwakkino maassi'ri; allaalinsa; hegere geeshsha hanqaffe amadinsa.