FAARSO 24 - Qullaawa Maxaafa

KAALIIQI AYIRRADO MOOTEETI

DAAWITI FAARSO

¹ Baattonna aanase noori baalu Kaaliiqiho; tini gobbanna giddose hee'rannohu baalu isiho.

² Isi baaru aana xintinosena, batidhino wayibba aanano uurrisinose.

³ Kaaliiqi ilaali iimira fulannohu ayeti? Qullaawa dargasi ea dandaannohu ayeti?

⁴ Hakkiira mara dandaannohu, angasi keeraabbinoho; wodana xalalinoho; kaphu maganna magansi'rannokkiho; kaphunni xaarannokkiho.

⁵ Togoo manchi Kaaliiqi anganni atoote afi'ranno; gatisaanchu Maganisi keereensannosi.

⁶ Maganunniwa gamba yaannohunna, Yaiqoobi Magano hasi'rannohu hattoo manchooti.

⁷ Ayirradu moote eona, ki'ne waalchuwa gotti yiiyye; ki'ne bi're hundi cufannano hala'le.

⁸ Kuni ayirradu moote ayeti? Jawaatu wolqaataami Kaaliiqaati; wolqaataamu olamaanchi Kaaliiqaati.

⁹ Ayirradu moote eona, ki'ne waalchuwa gotti yiiyye; ki'ne bi're hundi cufannano hala'le.

¹⁰ Kuni ayirradu moote ayeti? Olantote Magani Kaaliiqi; isi ayirrado mooteeti.