FAARSO 17 - Qullaawa Maxaafa

KEERAANCHU MANCHI HUUCCATTO

DAAWITI HUUCCATTO

¹ Kaaliiqa ballo, keeraanchu wodaninni shiqishi'reemmota eeggo'ya, xagarro nookki afiinni fultannota huuccatto'ya macciishshie.

² Halaalaancho yoo atewiinni fulto! Illekkino taashshite la'o!

³ Wodana'ya fonqolootto; hashshano qonqolchite laoottoe; kayinnilla mitte bunsheno diafoottoe; arrawi'yano sao dicoyi'rino.

⁴ Ani wolootu assitannore diasseemmo; qaalikki daafira yee bunshete doogonni xooqoommo.

⁵ Wo'manka woyite doogokki aana noommo; doogokki aaninnino wirri yee diegennoommo.

⁶ Magano'ya, macciishshattoe daafira ate woshshi'reemmo; maccakki ane widira qolte, huuccatto'ya macciishshie.

⁷ Addaxxitannohere baarigaarransa anganni gatisattohu, dhaggenniha baxillekki leellishie.

⁸ Illete diikkichi gede assite agarie; qoolikki giddo maaxie.

⁹ Shetissannoe cubbaataammiwiinninna, shitaera hassannoe baarigaarrawiinni gatisie.

¹⁰ Godowa kaajjite, boo'natenni coyidhanno.

¹¹ Ane sarraaqqe tuggannoe doogo hasidhanni, higummowa higganni gaangeessitannoe.

¹² Bibbidara rie agarino doobbiichi gede, insano ane amaddaera gaa'lite agartanno.

¹³ Kaaliiqa ballo, dagge olante uullate ganinsa; bisekkinni bushu manniwiinni gatisie.

¹⁴ Kaaliiqa, kunni manniwiinni gatisie; tenne gobba coyi injiinonsa manniwiinni agarie. Gamba assootto qoomaminni godowansa duushshi; insa oosonsara ikke gateenna, oosonsa oosora duu'nitanno.

¹⁵ Ani kayinni ate albaanni keeraancho ikkoommohura, baqqi yee ate afeemmo woyite kassi yeemmo.