FAARSO 148 - Qullaawa Maxaafa

KALAQAMU BAALU MAGANO GALATO

¹ Kaaliiqa galattesi! Iima heedhinoonni kalaqami baalu, Kaaliiqa gordoho heedhine galattesi.

² Sokkaano baala galattesi; gordoho heedhinoonniri olantosi baala galattesi.

³ Arrishshonna aganu galattesi; xabbinanni beeddahe baala galattesi;

⁴ Iima heedhinoonni gorduwa galattesi; gordoho heedhinoonni wayibba galattesi.

⁵ Isi hajajeenna kalaqaminore ikkino daafira, baalunku Kaaliiqi su'ma galato.

⁶ Isi hajajonni base basente kaajje hee'ranno; uyinoonninsa hajajo horonta didiiganno.

⁷ Baaru giddo moyichinna jawu baari diime, Kaaliiqa baattote aana heedhine galatte.

⁸ Belequnna kaade, bullaame kaadenna gomichu, hajajosi wonshitinanniri, jawaata bubbe baala Kaaliiqa galatte.

⁹ Gaarranna ilaalla, laalanno jajjinna dubbu haqqe baala galattesi.

¹⁰ Gaxigalunna mini saada, godowunni hadhinannirinna, qoolunni buubbinanni kalaqami baalu, Kaaliiqa galattesi.

¹¹ Mootenna mannu baalu, daanyuwanna gashshaano baalu galattesi.

¹² Qeedhonna seennu, geerrunna ooso baalu galattesi.

¹³ Su'misi wole su'muwanni rooranno; ayirrinyisino baattotenna gordoho aleenniiti. Kunnira, wo'munku Kaaliiqi su'ma galato.

¹⁴ Isi fiixa ikkitinori, lowo geeshsha baxannonsari Israeelete gosa, jawaata manna assinonsari iso galatto. Kaaliiqi galatamo!