FAARSO 142 - Qullaawa Maxaafa

KAALIIQI KAA'LO AFI'RATE SHIQINSHOONNI HUUCCATTO

DAAWITI FAARSO. GODU GIDDO HEE'RE HUUCCI'RINO HUUCCATTO

¹ Qoonqo'ya naggi asse Kaaliiqiwa hige raareemmo; kaa'lannoe gede woxarateemmo.

² Laala'ya baala albisira shiqishi'reemmo; mitiimma'ya baala ku'leemmosi.

³ Hexxo mudheemmo woyite ma"assa hasiissannoero afino; baarigaarra'ya ha'reemmo doogora woshshaado wortue.

⁴ Wirri yee laeemmo woyite go'leemmowa hoogummo; kaa'lannoehu mittu manchino dino; agarannoehunna towatannoehu dino.

⁵ Kaaliiqa'ya ballo, kaa'lattoe gede atewa hige raareemmo; Kaaliiqa'ya agaraanchi'ya ateeti; tenne gobbara hasi'reemmohu ate callaati.

⁶ Qarru giddo itame noommo daafira, kaa'lattoera atewa hige raareemmo woyite, macciishshie; lowo geeshsha wolqissinoena diinna'yawiinni gatisie.

⁷ Assoottoe shaqqilli daafira mannikki mereero galateemmohe gede, usuru mininni fushshie.