FAARSO 136 - Qullaawa Maxaafa

GALATU FAARSO

¹ Shaqqado ikkinohura Kaaliiqa galattesi; bagamannokkihu baxillisino hegerehona.

² Maganna baalanta roorino Magano galattesi; bagamannokkihu baxillisino hegerehona.

³ Mootoollate Mooticha Magano galattesi; bagamannokkihu baxillisino hegerehona.

⁴ Callichisi jajjabba maalale assanno; bagamannokkihu baxillisino hegerehona.

⁵ Ogimmasinni gordo kalaqino; bagamannokkihu baxillisino hegerehona.

⁶ Baatto diimete wayi aana uurrisino; bagamannokkihu baxillisino hegerehona.

⁷ Arrishshonna agana kalaqino; bagamannokkihu baxillisino hegerehona.

⁸ Arrishsho barra xabbanno gede assino; bagamannokkihu baxillisino hegerehona.

⁹ Aganunna beeddahe hashsha xabbanno gede assino; bagamannokkihu baxillisino hegerehona.

¹⁰ Gibitsennita bayirraadda labballi ooso shiino; bagamannokkihu baxillisino hegerehona.

¹¹ Israeelete manna Gibitsete gobbanni haa're fushshino; bagamannokkihu baxillisino hegerehona.

¹² Jawaata angasinni wolqaataame cigilesinni konne assino; bagamannokkihu baxillisino hegerehona.

¹³ Duumo Baara lamewa badino; bagamannokkihu baxillisino hegerehona.

¹⁴ Mannasi mereeroonni qole sayisino; bagamannokkihu baxillisino hegerehona.

¹⁵ Gibitsete mootenna olantosi kayinni Duumu Baari giddo hunino; bagamannokkihu baxillisino hegerehona.

¹⁶ Mannasi halallitte gobbara massagino; bagamannokkihu baxillisino hegerehona.

¹⁷ Wolqaataamma mootoolla shiino; bagamannokkihu baxillisino hegerehona.

¹⁸ Jajjabba mootoollano hunino; bagamannokkihu baxillisino hegerehona.

¹⁹ Amooraawootu moote Sewooni shiino; bagamannokkihu baxillisino hegerehona.

²⁰ Baasaani moote Aagi shiino; bagamannokkihu baxillisino hegerehona.

²¹ Baattonsa baala mannisira ragisiisino; bagamannokkihu baxillisino hegerehona.

²² Soqqamaanchisira Israeelira uyinosi; bagamannokkihu baxillisino hegerehona.

²³ Qeelammummo yannara dihawinonke; bagamannokkihu baxillisino hegerehona.

²⁴ Diinnanke anganni gatise fushshinonke; bagamannokkihu baxillisino hegerehona.

²⁵ Lubbotenni noo kalaqami baalaho sagale aanno; bagamannokkihu baxillisino hegerehona.

²⁶ Gordu Maganira galata uuyyesi; bagamannokkihu baxillisino hegerehona.