FAARSO 119 - Qullaawa Maxaafa

KAALIIQI SEERA

¹ Suwashsho doogo hadhannorinna, Kaaliiqi seeri garinni heedhannori baraadhinoreeti.

² Hajajosi wonshitannorinna, wo'mu wodaninni iso hasidhannori baraadhinoreeti.

³ Insa so'ro diloossanno; Kaaliiqi hedo gede ikkite heedhanno.

⁴ Kaaliiqa! Ati seera oottonke; xeinsummokkinni hajajammeemmo gedeno kuloottonke.

⁵ Wogakki agadhatenni ammanamoommoha ikkate, lowo geeshsha halchoommo.

⁶ Hajajokki baala seekke agadhummoro, saalu horonta diamadannoe.

⁷ Halaalaancho yookki afoommo deerrinni, keeraanchu wodaninni galaxxeemmohe.

⁸ Wogakki ayirriseemmo; horontanni callachishshootie.

KAALIIQI SEERIRA HAJAJAMA

⁹ Wedellu heeshshonsa hiitto assite keereensidhanno? Wogasi agadhatenniiti.

¹⁰ Ate wo'mu wodani'yanni hasi'reemmo daafira, hajajokki wonsheemmo gede kaa'lie.

¹¹ Cubbo looseemmokki gede, qaalekki wodani'yara wodhoommo.

¹² Kaaliiqa'ya, galaxxeemmohe; wogakki rosiisie.

¹³ Yootto yoo baala marro hige, aneneewa hasaaweemmo.

¹⁴ Hajajokki wonsha, lowo jiro afi'rantenni roore tashshi assitanno.

¹⁵ Wogakki buuxeemmo; rosiishshakkino hiinceemmo.

¹⁶ Wogakki tashshi assitannoe; qaalekkino dihaweemmo.

KAALIIQI SEERINNI AFI'NANNI HAGIIRRE

¹⁷ Lubbotenni hee'reemmo gedenna, ate woga agadheemmo gede, ane soqqamaanchikkirano dancha coye assie.

¹⁸ Seerikki giddo nooha dhaggete halaale laeemmo gede, ille'ya fanie.

¹⁹ Ani baattote aana harancho yannalla hee'reemmona, hajajokki maaxxootie.

²⁰ Lubbo'ya yookki affara yite, wo'manka woyite quqquxantu.

²¹ Hajajokki wonshitannokki boonaleeyye, ati rufoottoreetinna rumoottoreeti.

²² Ani hajajokki agadhoommo daafira, xononsanna mishshonsa aani'yanni hoolie.

²³ Roorrootu gamba yite anera gano gantanno; ani soqqamaanchikki kayinni wogakki buuxanni noommo.

²⁴ Hajajokki hagiirsiissannoe; amaaltannoetino iseeti.

KAALIIQI SEERA WONSHATE MURCI'RA

²⁵ Qeelame reyote meddi yoommo; oottoehu hexxote qaali garinni heeshsho'ya haaroonsie.

²⁶ Assoommore baala atera ku'loommo; atino macciishshoottoena, xaate wogakki rosiisie.

²⁷ Wogakki wodancheemmo gede kaa'lie; anino dhaggenniha loosokki marro hige hedeemmo.

²⁸ Dadillunni kainohunni lubbo daaqque; qaalikki garinni wolqa'ya haaroonsie.

²⁹ Kapho anewiinni xeertisi; shaqqillikkinni seerakki rosiisie.

³⁰ Hajajama doodhoommo; yookki garinni hee'rate murci'roommo.

³¹ Kaaliiqa! Hajajokki gede ikkoommona, saalfateemmo gede assitootie.

³² Roore wodancha aattoe daafira, hajajokki jaate wonsheemmo.

WODANCHA AFI'RATE HUUCCATTO

³³ Kaaliiqa ballo! Wogakki garinni hee'ra rosiisie; anino wo'manka woyite ha'runseemmo.

³⁴ Ayirriseemmo gedenna, wo'mu wodani'yanni agadheemmo gede seerakki xawisie.

³⁵ Hajajokki tashshi yitannoe daafira, wonsheemmo gede kaa'lie.

³⁶ Jiro afi'rate beellamammontenni, hajajokki agadhate halcho heedhannoe gede assie.

³⁷ Haafare laeemmokki gede agarie; qaalikki garinni heeshsho'ya haaroonsie.

³⁸ Hajajantannoherira oottoha hexxote qaale, ane soqqamaanchikkirano wonshie.

³⁹ Yookki lowo geeshsha dhaggennitena, waajjishshanno xonowiinni agarie.

⁴⁰ Wogakki agadha hasi'reemmo; ati keeraancho ikkootto daafira haaro heeshsho uyie.

KAALIIQI SEERA ADDAXXA

⁴¹ Kaaliiqa! Bagamannokkiha baxillekki leellishie; hexxonnihu qaalikki garinni gatisie.

⁴² Qaalekki addaxxeemmo daafira, xontannoerira baalaho tumo qola dandeemmo.

⁴³ Hexxeemmoti ate yoo ikkitinohura, wo'manka woyite halaale coyi'reemmo gede kaa'lie.

⁴⁴ Seerakki agurummokkinni hegere geeshsha agadheemmo.

⁴⁵ Wogakki wonsha hasi'reemmo daafira, keere hee'reemmo.

⁴⁶ Wogakki mootoollate kuleemmo; horonta disaalfateemmo.

⁴⁷ Hajajokki baxeemmo; hajajamatenni hagiirre afi'reemmo.

⁴⁸ Baxeemmota hajajokki ayirriseemmo; wogakkino marro hige hedeemmo.

KAALIIQI SEERA HAWAQI'RA

⁴⁹ Ane soqqamaanchikkira oottoha hexxote qaale qaagi; hakku qaalino anera hexxo'yaati.

⁵⁰ Hexxote qaalikki heeshsho'ya haaroonsinoehura, qarru yannara nafa sheshifachishinoe.

⁵¹ Boonaleeyye wo'manka woyite qacifattannoe; ani kayinni seerikkiwiinni difafoommo.

⁵² Kaaliiqa'ya, bi're hundinni kayisse noota yookki qaageemmo woyite, jawaante afi'reemmo.

⁵³ Bushuullu seerakki huntanna afeemmo woyite, lowo geeshsha aarameemmo.

⁵⁴ Harancho baattote aani heeshsho'ya baalantenni, wogakki anera faarso'yaati.

⁵⁵ Kaaliiqa! Ate hashsha nafa qaageemmohe; seerakkino agadheemmo.

⁵⁶ Hajajokki wonshatenni hagiirre afi'reemmo.

MAGANU SEERIRA AAMAMA

⁵⁷ Kaaliiqa'ya, hasatto'ya ate callaati; seerakki agadhate murci'roommo.

⁵⁸ Wo'mu wodani'yanni huucci'reemmohena, hexxonnihu qaalikki garinni elie.

⁵⁹ Xaa geeshsha hee'roommo gara egennoommo daafira, hajajokki gede ikke hee'rate murci'roommo.

⁶⁰ Keeshshummokkinni rahotenni hajajokki wonsheemmo.

⁶¹ Bushuullu woshshaado wortinoe; ani kayinni seerakki dihawoommo.

⁶² Halaalaancho yookki daafira ate galatate, hashshu taalootira kaeemmo.

⁶³ Ani atera soqqantannoriranna, wogakki ayirrissannorira jaalaho.

⁶⁴ Kaaliiqa'ya! Baattote bagamannokkihu baxillikki wo'mino; anera wogakki rosiisie.

KAALIIQI SEERI AYIRRINYE

⁶⁵ Kaaliiqa'ya! Hexxonniha qaalekki agaroottoe; ane soqqamaanchikkirano eloottoe.

⁶⁶ Hajajokki hawaqi'reemmo daafira, ogimmanna egenno uyie.

⁶⁷ Ati seejjattoera albaanni so'reemmoho; xa kayinni qaalikkira hajajameemmo.

⁶⁸ Ati lowo geeshsha shooshaqahonna shaqqadohona, wogakki rosiisie.

⁶⁹ Boonaleeyye beebbatenni su'ma'ya huntanno; ani kayinni wogakki wo'mu wodaninni agadheemmo.

⁷⁰ Insa wodana beebbinoreeti; anera kayinni seerikki tashshi yaannoe.

⁷¹ Wogakki roseemmo gede assitinoe daafira, seejjokki anera dancha ikkitinoe.

⁷² Lowo culkinninna lowo birrinni roore, ati oottoe seeri woyyannoe.

MAGANU YOO HALAALAANCHIMMA

⁷³ Kalaqoottoehunna seekkoottoehu ateeti; hajajokki roseemmo gede wodancha uyie.

⁷⁴ Hexxote qaalekki hawaqi'reemmo daafira, ate ayirrissannori baalu ane affanno woyite hagiidhitanno.

⁷⁵ Kaaliiqa'ya, yookki halaalaancho ikkitinota afoommo; seejjoottoehuno halaalaancho ikkoottohuraati.

⁷⁶ Ane soqqamaanchikkira oottoehu hexxote qaali garinni, bagamannokkihu baxillikki sheshifachishinoe.

⁷⁷ Seerikki tashshi yaannoe daafira, lubbotenni hee'reemmo gede, maarokki soyie.

⁷⁸ Beebbatenni gereertannoeri boonaleeyye shollito; ani kayinni wogakki marro hige hedeemmo.

⁷⁹ Ate ayirrissannorinna hajajokki egentinori, anewa daggo.

⁸⁰ Qeelame saalfateemmokki gede, wogakki garunni agadheemmo gede kaa'lie.

KEERE AFI'RATE HUUCCATTO

⁸¹ Kaaliiqa'ya ballo, ati gatisattoera agadhanni, lowo geeshsha daafuroommo; ikkirono hexxo'ya qaalikki aana wodheemmo.

⁸² «Mamoote kaa'lattoe ikka?» yaanni, hexxonniha qaalekki agadhanna ille daafurtue.

⁸³ Wiliilanno mini giddo sutame qoromoddino ogori gede ikkoommo; tenne giddoonni kayinni wogakki dihawoommo.

⁸⁴ Mamooti geeshsha cinceemmo? Okkitannoere rabbisattohu mamooteeti?

⁸⁵ Seerakki agartannokkiri boonaleeyye, ane woshshaaddara balla untino.

⁸⁶ Hajajokki baala hawaqi'nannite; kaphaasine beebbatenni okkitanni nooena kaa'lie.

⁸⁷ Shite hoogginoehu gatoommo; ikkollana wogakki lashshi diassoommo.

⁸⁸ Bagaminokkihu baxillikkinni heeshsho'ya haaroonsie; anino hajajokki agadheemmo.

KAALIIQI SEERA HAWAQI'RA

⁸⁹ Kaaliiqa'ya, qaalikki hegereho; gordohono soorramikkinni hee'ranno.

⁹⁰ Halaalaanchimmakki ilamate ilama geeshsha heedhanno; baatto mitto darga uurrisittose; noowiinni milli yitukkinni heedhanno.

⁹¹ Baalunku soqqamaasinekki ikkitinohura, yookki techo geeshsha soorrantukkinni heedhino.

⁹² Seerikki hagiirri'ya buicho ikka hoogoommero, shetto'yanni kainohunni ree hoogoommo.

⁹³ Wogakkinni heeshsho oottoena, horontanni ise lashshi diasseemmo.

⁹⁴ Ani atehona gatisie; wogakkino agadhammora wo'naa'loommo.

⁹⁵ Bushuullu shitaera gaa'lite agartanno; ani kayinni hajajokki marro hige hedeemmo.

⁹⁶ Wo'munkuri gawalo afi'rinota afoommo; hajajokki kayinni hegere geeshsha disoorrantanno.

MAGANU SEERA BAXA

⁹⁷ Seerakki lowo geeshsha baxeemmo; barra wo'ma iso hedeemmo.

⁹⁸ Hajajokki wo'manka woyite ledo'ya no; baarigaarra'yanni roore wodancheemmoha assitannoe.

⁹⁹ Hajajokki marro hige hedatenni, rosiisaano'ya baalantenni roore wodancha afi'roommo.

¹⁰⁰ Wogakki baala wonsheemmo daafira, jajjabbunni roore hayyicha ikkeemmo.

¹⁰¹ Qaalikkira hajajama hasi're, busha hoshsha aguroommo.

¹⁰² Rosiisaanchi'ya ate ikkoottohura, yookki lashshi diassoommo.

¹⁰³ Qaalikki hiitto coommannoho! Malawu leonni roore coommannoho.

¹⁰⁴ Wogakkinni hayyo afi'roommo; kunnira, busha hoshsha giwoommo.

MAGANU SEERI HEESHSHOTE XAWAABBAHO

¹⁰⁵ Qaalikki lekka'yara caabbichoho; doogo'yara xawaabbaho.

¹⁰⁶ Halaalaancho yookki agadhate, afii'yanni fullo qaale disoorreemmo.

¹⁰⁷ Kaaliiqa'ya ballo, shetto batidhinoe daafira, hexxonnihu qaalikki garinni lubbotenni worie.

¹⁰⁸ Kaaliiqa'ya ballo, baxe uyi'reemmota galatu kakkalo adhie; yookkino rosiisie.

¹⁰⁹ Lubbo'ya yaaddote giddo heedhuro nafa, seerakki dihaweemmo.

¹¹⁰ Haxawarrootu woshshaado wortinoe; ani kayinni wogakkiwiinni wirri diyoommo.

¹¹¹ Hajajokki geedote jiro'yaati; wodani'ya hagiirrino konneeti.

¹¹² Reyammo geeshsha wogakki, agadhate murci'roommo.

KAALIIQI SEERINNI AFI'NANNI KEERE

¹¹³ Lamu wodaninni heedhannore giwoommo; seerakki kayinni baxoommo.

¹¹⁴ Ati wonqo'yaatinna maaxameemmowaati; oottoe qaale hexxeemmo.

¹¹⁵ Ani Magani'ya hajajo agadhammora hasi'reemmona, ki'ne cubbaataammu anewiinni faffe.

¹¹⁶ Lubbotenni hee'reemmo gede, hexxote qaalikki garinni jawaachishie; hexxo'ya wo'ma hooggeenna ani saalfatoonke.

¹¹⁷ Keerunni hee'reemmo gede irkisie; wo'manka woyite hajajokkino wonsheemmona.

¹¹⁸ Hedonsa xagarro wo'mitinotanna kapho ikkitinohura, hajajokki agadhitannokkire baala giwatto.

¹¹⁹ Bunshe assitannore baala ishinu gede kiiratto; kunnira hajajokki ani baxeemmo.

¹²⁰ Ate waajjatenni kainohunni mannimma'ya huxidhino; yookkino lowo geeshsha waajjoommo.

MAGANU SEERIRA HAJAJAMA

¹²¹ Taalonna halaale ikkino coye assoommo; kunni daafira gadadissannoerira sayisse uyitootie.

¹²² Ane soqqamaanchokki kaa'leemmohe yiie; boonaleeyye gawajjitannoe gede assitootie.

¹²³ Gatisaanchimmakkinna, hexxonniha qaalekki agadhanni daafuroommo.

¹²⁴ Ane soqqamaanchokki bagamannokkihu baxillikkinni towatie; wogakkino rosiisie.

¹²⁵ Ani soqqamaanchokkiitina; hajajokki egenneemmo gede wodancha uyie.

¹²⁶ Kaaliiqa ballo, mannu seerakki diigino daafira, loosokki loosattoti yanna xaati.

¹²⁷ Hajajokki culkunni roorse baxeemmo; filu culkinnino aleenni asse baxeemmo.

¹²⁸ Kunnira wogakki baala agadheemmo; so'rote doogo baala giweemmo.

MAGANU SEERA AYIRRISATE HALCHO

¹²⁹ Hajajokki dhaggennite; anino wo'mu wodaninni agadheemmo.

¹³⁰ Qaalikki tiro xawaabba uyitanno; afa afidhinokkirirano wodancha uyitanno.

¹³¹ Hajajokki lowo geeshsha goo'roommo daafira, afoo ha'ha yee he'loommo.

¹³² Anewa higi; baxxannoherira assattonte gede aneno mararie.

¹³³ Hexxote qaalikki garinni uwatenni agarie; bushu coyi qeelannoe gede assitootie.

¹³⁴ Wogakki agadha dandeemmo gede, gadadissannoeri anganni gatisie.

¹³⁵ Muli'yara dagge maassi'rie; wogakkino rosiisie.

¹³⁶ Mannu seerakki diigino daafira, hindiiddo'ya wayimma lolakkanno.

MAGANU SEERI HALAALAANCHIMMA

¹³⁷ Kaaliiqa'ya, ati halaalaanchoho; yookkino taalote.

¹³⁸ Ati ootto seeri halaalehonna taaloho.

¹³⁹ Baarigaarra'ya hajajokki shotissinohura, lowo geeshsha aarame giiramoommo.

¹⁴⁰ Hexxonnihu qaalikki ximbiiwaminoho; anino lowo geeshsha baxeemmosi.

¹⁴¹ Ani bashiloommokkihonna mishamoommoho; ikkollana wogakki dideoommo.

¹⁴² Halaalaanchimmakki hegerera heedhanno; seerikkino wo'manka woyite halaaleho.

¹⁴³ Qarrunna yaaddo amaddinoe; hajajokki kayinni hagiirre uyitannoe.

¹⁴⁴ Hajajokki wo'manka woyite garaho; lubbotenni hee'reemmo gede wodancha uyie.

DIINU ANGANNI GATATE SHIQINSHOONNI HUUCCATTO

¹⁴⁵ Kaaliiqa ballo, wo'mu wodani'yanni, atewa hige raareemmona macciishshie; anino hajajokki wonsheemmo.

¹⁴⁶ Atewa hige raareemmona, macciishshite gatisie; anino hajajokki agadheemmo.

¹⁴⁷ Arrishsho fultukkinni kaa'lo afi'rate atewa hige raareemmo; oottoe qaali garinni hexxeemmo.

¹⁴⁸ Qaalekki marro hige buuxate, hashsha wo'ma la"anni galeemmo.

¹⁴⁹ Kaaliiqa'ya ballo, bagamannokkihu baxillikki daafira yite macciishshie; yookki garinni heeshshonniha assie.

¹⁵⁰ Seerikkiwiinni faffinori, okkitannoeri kaajjaddu anewa gamba yitino.

¹⁵¹ Kaaliiqa'ya, ati kayinni ane mule nootto; hajajokki baalano halaaleho.

¹⁵² Hundinni kayise hajajokki rosoommo; atino soorrantannokki gede assootto.

MAGANUNNIWA HIGE WOXARATA

¹⁵³ Ani seerakki dihawoommo; kunnira qarra'ya la'e gatisie.

¹⁵⁴ Ane daafira coyi'rante tirie; hexxote qaalikki garinni gatisie.

¹⁵⁵ Wogakki agadhitannokki daafira, haxawarrootaho gatate hexxo dinonsa.

¹⁵⁶ Kaaliiqa'ya, maarokki lowote! Yookki garinni heeshsho'ya haaroonsi.

¹⁵⁷ Gibbannoerinna okkitannoeri batinyeho; ani kayinni hajajokkiwiinni wirri diyoommo.

¹⁵⁸ Qaalekki ayirrissannokki daafira, ate ammantinokkiriwa aana dibaxeemmo.

¹⁵⁹ Kaaliiqa'ya ballo, wogakki baxeemmota hedi; kunnira bagamannokkihu baxillikkinni heeshsho'ya haaroonsie.

¹⁶⁰ Qaalikki gudisame halaaleho; halaalaancho yookkino hegerete.

MAGANU SEERIRA HAJAJAMA

¹⁶¹ Gashshaano beebbatenni okkitannoe; ani kayinni qaalekki lowo geeshsha ayirriseemmo.

¹⁶² Lowo jajja afi're hagiidhanno manchi gede, hexxote qaalikkinni lowo geeshsha tashshi yaannoe.

¹⁶³ Kapho makki're giweemmo; seerakki kayinni baxeemmo.

¹⁶⁴ Halaalaancho yookki daafira, barrunni lamala hige galateemmohe.

¹⁶⁵ Seerakki baxxannorira co'o yiino keeri noonsa; horontanni mittu coyino sarraaqansara didandaanno.

¹⁶⁶ Kaaliiqa'ya, gatisaanchimmakki hexxotenni agadheemmo; hajajokkino wonsheemmo.

¹⁶⁷ Hajajokki agadheemmo; wo'mu wodani'yanni baxeemmo.

¹⁶⁸ Wogakkinna wodhokki ayirriseemmo; looseemmore baala ati afatto.

KAA'LO AFI'RATE SHIQINSHOONNI HUUCCATTO

¹⁶⁹ Kaaliiqa'ya ballo, kaa'lo afi'rate atewa hige raareemmo woyite macciishshie; hexxote qaalikki garinni wodancha uyie.

¹⁷⁰ Huuccatto'ya atewa iillito; hexxote qaalikki garinni gatisie.

¹⁷¹ Wogakki rosiisattoe daafira, wo'manka woyite galaxxeemmohe.

¹⁷² Hajajokki halaale ikkitinohura, qaalikki daafira faarseemmo.

¹⁷³ Wogakki doodhoommo daafira, ballo kaa'lattoera wo'manka woyite qixxaawi.

¹⁷⁴ Kaaliiqa'ya, gatisaanchimmakki quqquxameemmo; seerikkino tashshi yaannoe.

¹⁷⁵ Ate galatanni hee'reemmo gede diro'ya seedisie; yookkino kaa'litoe.

¹⁷⁶ Ballehino ge'reewi gede raataawoommo; kayinnilla hajajokki hawoommokki daafira, ane soqqamaanchokki hasie.