FAARSO 111 - Qullaawa Maxaafa

KAALIIQIRA SHIQINSHOONNI GALATA

¹ Kaaliiqira galatu iillosi! Suwaddu xaadiwanna songote mereero, Kaaliiqa wo'mu wodani'yanni galaxxeemmosi.

² Kaaliiqi loosi dhaggenniho; assino dhaggenni hagiidhitannori baalu, ledde affara hasidhanno.

³ Kaaliiqi loosi ayirrinyunna gaamaarre wo'mitinoho; keeraanchimmasino hegerete.

⁴ Kaaliiqi shaqqadonna maarannoha ikkinohura, dhaggenniha loososi wo'manka woyite qaanganni gede assino.

⁵ Ayirrissannosirira sagale qixxeessannonsa; gondoorosino horontanni dihawanno.

⁶ Allaggu baatto mannisira ee, jawaata wolqasi leellishinonsa.

⁷ Isi assannori baalu halaalehonna garaho; hajajosino addaxxinannite.

⁸ Hegerera disoorrantannote; iseno halaalunna sumbete aana xintantinote.

⁹ Mannasi wolassinsa; insaa ledo hegere gondooro ei; isi qullaawahonna wolqaataamoho.

¹⁰ Kaaliiqa waajja egennote umoho; hajajantannosirira baalaho wodancha aannonsa. Kaaliiqira hegere galati iillosi.