FAARSO 107 - Qullaawa Maxaafa

GAFA 5 ( Far 107—150 ) MAGANU SHAQQILLI DAAFIRA SHIQINSHOONNI GALATA

¹ Kaaliiqi shaqqado ikkino daafiranna, bagamannokkihu baxillisino hegereha ikkinohura, iso galattesi.

² Ki'ne Kaaliiqi gatisino'neri, iso galattesi; isi diini'ne anganni gatisino'ne.

³ Allaggu gobbanni galagalche abbino'ne; soojjaatinninna galchiminni aliyyenninna wodiidinni gamba assino'ne.

⁴ Mitu mitu faro habbe, halallitte gobbara raataabbu; heedhanno katama massitannonsa doogo affara didandiitino.

⁵ Hudenna goo'ro amaddinonsahura, hexxo mudhitu.

⁶ Qarrinsa yannara Kaaliiqiwa higge raartu; isino shettotenni gatisinsa.

⁷ Heedhanno katama, dhaawate doogo qole haa're ha'rinsa.

⁸ Assinonsahu dhaggete loosiranna, bagamannokkihu baxillisi daafira, Kaaliiqa galattosina.

⁹ Isi goodhinore kassi assannonsa; hudidhinoreno dancha coye ee duushshannonsa.

¹⁰ Mitu mitu usuranya ikkite beebbu tunsichira heedhino; usurante shettino.

¹¹ Kuni duuchu qarri iillinonsahu, Wo'munkura Aliidi Maganira hajajama gibbinohuraatinna, seejjosi adhitinokkihuraati.

¹² Kunnira loosu batinyinni kainohunni daafurtu; ubbu woyiteno kayisannonsaha diafidhino.

¹³ Qarrinsa yannara Kaaliiqiwa higge raartu; isino shettotenni gatisinsa.

¹⁴ Beebbu tunsichi giddonni fushshinsa; usurroonninsata siwiilu cagaageno tattayisi.

¹⁵ Assinonsa dhaggeranna, bagamannokkihu baxillisi daafira Kaaliiqa galattosina.

¹⁶ Mannasi fushshara, camotenni seekkinoonni cufannano hiiqqaqqanno; siwiilu waawannano murmuranno.

¹⁷ Mitu mitu gowwimmansanni kainohunni, cubbonna sao loosse qarrantu.

¹⁸ Kokke sagale gibbinonsa; insano reyote gambissino.

¹⁹ Qarrinsa yannara, Kaaliiqiwa higge raartu; isino shettotenni gatisinsa.

²⁰ Qaalesi soye hursinsa; baotewiinnino gatisinsa.

²¹ Assinonsa dhaggeranna, bagamannokkihu baxillisi daafira Kaaliiqa galattosina.

²² Kakkalo shiqishshanni galattosi; assinorirano ililleettetenni faarsitosina.

²³ Mitu mitu markaawe giddite baaru aanaanni hadhanni, dadda'litanni heedhino.

²⁴ Insa Kaaliiqi looso la'ino; baaru diime giddo loosino dhagge affino.

²⁵ Kaaliiqi hajajita hombobolatte ka'e, dambala milli assitu.

²⁶ Markabbansa dambalunni iimira higge ka'e, galagalte diimete giddo ubbu; tenne danonni kainohunni hexxo mudhitu.

²⁷ Dimbaanchu gede gatantarte ubbu; ogimmansa baala kapho ikkitu.

²⁸ Qarrinsa yannara Kaaliiqiwa higge raartu; isino shettote giddonni fushshinsa.

²⁹ Gugganno hombobolatte gabbi assi; dambaluno sammi yii.

³⁰ Harshammo afidheenna tashshi yiinsa; hasidhino lawono keerunni iillishinsa.

³¹ Assinonsa dhaggeranna, bagamannokkihu baxillisi daafira Kaaliiqa galattosina.

³² Songote mereero lowimmasi kultona; roorrootu songora galattosina.

³³ Kaaliiqi, hadhanno wayibba horonta mooltanno gede, bu'ano fultannokki gede assi.

³⁴ Hakkiicho hee'ranno manni bunshenni kainohunni, shaqqado gobba maxinete baatto gedeeta ikkitu.

³⁵ Galagalche halalla kofammate, moola gobba lolakkanno xashshuwara soorri.

³⁶ Hudi'rino manni hakkiicho hee'ranno gede assi; insano heedhanno katama mi'nitu.

³⁷ Gate gide wixidhu; woyinete haqqeno kaasidhu; lowo jajjano gamba assidhu.

³⁸ Mannasi maassi'rinsa; insano lowo ooso afidhu; saadansa kiirono xe'annokki gede assi.

³⁹ Shetto, qarrunna yaaddo amaddeennansa, shollitu yannara,

⁴⁰ Maganu gadadissunsare mishino; doogo nookkiwa halallitte gobbara raataabbanno gede assinonsa.

⁴¹ Qarraataamma shettote giddonni fushshannonsa; oosonsa kiiro ge'reewu hoshsha gede asse batisanno.

⁴² Wodana suwaddu konne coye la'e hagiidhitanno; bushuullu baalu kayinni saalfatte sammi yitanno.

⁴³ Egennaammu baalu konne coye huwatto; bagamannokkiha Kaaliiqi baxille wodanchito.