FAARSO 106 - Qullaawa Maxaafa

KAALIIQI MANNISIRA LEELLISHINO SHAQQILLE

¹ Kaaliiqa galattesi; isi shaqqadoho; bagamannokkihu baxillisino hegerehona, Kaaliiqa galattesi.

² Isi assinore kule guda dandaannohu ayeti? Ikkannosi geeshshi galata aasira dandaannohu nooni?

³ Hajajosi wonshitannorinna, wo'manka woyite halaale loossannori, hiitto baraadhinoreeti!

⁴ Kaaliiqa'ya ballo, mannakki kaa'latto yannara aneno habbootie; gatisaanchimmakkinni aneno towatie.

⁵ Atere ikkansanni naaxxitannori gede, aneno doorantinori qawaaxxo lae hagiidheemmo gede assie.

⁶ Akaakkanke gede cubbo loonsoommo; bunshe assinoommo; cubbammoommo.

⁷ Akaakkanke Gibitsete gobbara heedhe, assino dhagge baala diwodanchitino. Leellishinonsaha bagamannokkiha baxillesi habbino. Duumu Baari gama maahoyye gibbino.

⁸ Ikkollana wolqasi jawaante leellishara, su'misi daafira gatisinonsa.

⁹ Duumu Baari isi rufeenna mooli; mannasi baaru giddoonni moola baatto aanaanni qole sayisi.

¹⁰ Gibbannonsariwiinni gatisinsa; diinnansa angannino fushshinsa.

¹¹ Diinnansa kayinni wayi egemmi; mittu nafa digatino.

¹² Hakkunni gedensaanni mannisi hexxote qaale ammani; galatu faarsono faarsi.

¹³ Kayinnilla, assinonsa dhagge baala hakkawoyintenni habbino; isi seejjo diagadhitino.

¹⁴ Halallitte gobbara heedhe, sagale sinsinnaabbu; Maganono jiffe la'usi.

¹⁵ Isino, huuccidhinore uyinsa; kayinnilla, jaddote qoomama tuginsa.

¹⁶ Halallitte gobbara baxxisidhe heedhe, Musenna Kaaliiqira qullaawa soqqamaancho ikkinoha Aarooni hinaassu.

¹⁷ Baatto dadhante Daataani egemmitu; Aberooninna ayiddesi ittu.

¹⁸ Hoodensa hadhinori aanano giira dirritu; konne busha mannano giirtu.

¹⁹ Siina heedhe culku siito seekkidhu; hatte misileno magansidhu.

²⁰ Maganu ayirrinye, hayisso ittanno saada misilera soorritu.

²¹ Gibitsete heedheenna, maalaletenni gatisinonsa Magano habbu.

²² Gibitsete heedheenna hiittoo dhagge loosino! Duumu Baari aana hiitto waajjinannire assino!

²³ Maganu mannasi hunara kaita, doorinosihu Muse mereeroho uurre, hunannonsakki gedenna hanqosino aguranno gede Magano huucci.

²⁴ Maganu uyinonsa hexxo ammantinokki daafira, dancha baatto mishshu.

²⁵ Dukkaninsa giddo heedhe gunguntu; Kaaliiqi qaaleno macciishsha gibbu.

²⁶ Kunnira, angasi kayise xaare, halallitte gobbara hunannonsata kulinsa.

²⁷ Sirchonsa baala dagate mereero billaallisannotanna, manni gobbara reyitannota egensiisinsa.

²⁸ Hakkunni gedensaanni Maganu manni, Fegoori kaphu magano Ba"aali magansi'rate higi; lubbo noonsakki magannara shiqinshoonniha kakkalote maala iti.

²⁹ Bushu loosinsanni Kaaliiqa hanqissusi; kunninni kainohunni, qoomanno dhibbi mereeronsa uwi.

³⁰ Kayinnilla Finihaasi kae, sao assitinore qorichishi yannara, dhibbu uurri.

³¹ Kuni assootisi danchu loosira kiiramisi; ilamate ilamarano qaagamanni hee'ri.

³² Meriiba bu'a mule mannu Kaaliiqa hanqisisi; insanni kainohunni Muse qarru aana uwi.

³³ Lowo geeshsha aarsitinosi daafira, Muse hiddannaawe coy'ri.

³⁴ Kaaliiqi hajajinonsa garinni allagga ikkitinore shite diguddino.

³⁵ Saimanka, insaa ledo karsante, wogansa gede ikkite heedhino.

³⁶ Insa dagate maganna magansidhu; kuni coyino baonsara kaima ikki.

³⁷ Qoleno, oosonsanna seennensa, Kana"aani gobba magannara kakkaltu.

³⁸ Hakkore mittoreno affinokkire beebbaataamma oosonsa shitu; baattono mundeetenni battaabbu.

³⁹ Loosinsanni umonsa batteessitu; Maganohono ammanantinokkire ikkitu.

⁴⁰ Kunnira, Kaaliiqi mannisira hanqi; isino hashakki're giwinsa.

⁴¹ Allaggu angara sayise uyinsa; diinnansano gashshaanonsa ikkitu.

⁴² Diinnansa gadadissinonsa; insano diinnansara anga uyite galtino.

⁴³ Kaaliiqi wo'manka woyite mannasi gatisanno; insa kayinni isira maahoyye giwa doodhitu; kunnira, cubbu giddora higge lixxu.

⁴⁴ Kuni duuchu ikke hee'reennanni, huuccidhannosi woyite macciishshinonsa; qarransano laino.

⁴⁵ Insara yee gondoorosi qaagino; bagamannokkihu baxillisinni kainohunni mararinonsa.

⁴⁶ Gadadissannonsari baalu, marartannonsa gede assi.

⁴⁷ Kaaliiqa Maganonke ballo, gatisinke! Gobba baalatennino gamba assite gobbanke qolinke; hakkawoyite galanteemmohe; qullaawa su'makkino ayirrinseemmo.

⁴⁸ Israeelete Magani Kaaliiqi galataminoha ikko; xaano hegerera galattesi; mannu baalu, «Hamii'ni!» yoo. Kaaliiqira galatu iillosi!