FAARSO 103 - Qullaawa Maxaafa

MAGANUNNIHA BAGAMANNOKKI BAXILLE

DAAWITI FAARSO

¹ Lubbo'ya Kaaliiqa galati; wo'ma mannimma'ya qullaawa su'masi galati.

² Lubbo'ya Kaaliiqa galati; galatasino habbooti.

³ Cubbo'ya baala agurannoe; dhibba'ya baala hursannoe.

⁴ Jeennaate dirreemmokki gede agarannoe; bagamannokkihu baxillisinninna maarosinni maassi'rannoe.

⁵ Lubbo'ya danchu coyinni duushsheenna, wolqa'ya allamurchunnite gede haaroo'mitanno.

⁶ Kaaliiqi kadantinorira halaale coyi'ranno; maaxamino halaale fushshanno.

⁷ Hedosi Musera leellishino; Israeelete mannino dhaggenniha loososi la"anno gede assino.

⁸ Kaaliiqi maarannohonna cubbo agurannoho. hanqoho dimuddamannoho; bagamannokkihu baxillisino bati'raho.

⁹ Cubbonke marro marro hige dikulanno; hanqino gedeennino dihee'ranno.

¹⁰ Cubbinke deerrinni diqorichishannonke; saonke garinni dihanqannonke.

¹¹ Gordu baattotewiinni xeerti'rinohu geeshsha, Kaaliiqi waajjitannosirira bagamannokkiha baxillesi hatto asse halashshi.

¹² Soojjaati galchimiwiinni fafinohu geeshsha, Kaaliiqi ninkewiinni cubbonke fafisanno.

¹³ Annu oososi mararannonte gede, Kaaliiqino waajjitannosire mararannonsa.

¹⁴ Mayinni kalaqinonkero isi afino; bushsha ikkanke dihawino.

¹⁵ Heeshshonke hayissote gedeete; dubboho fultanno daraaro gedeereeti.

¹⁶ Ikkollana, diilallanno woyite hakkawoyintenni ba'anno; noota nafa anfannikki gede ikkitanno.

¹⁷ Kaaliiqi kayinni waajjitannosirira baalaho, hegere geeshsha bagamannokkiha baxillesi leellishannonsa; keeraanchimmasino ilamate ilamara iillishanno.

¹⁸ Konne assannohuno, gondoorosi agadhitannoriraatinna, hajajosi xeissukkinni wonshitannoriraati.

¹⁹ Kaaliiqihu ayirradu barcimi gordoho no; isi wo'munkura aliidi gashshaanchooti.

²⁰ Coyi'rannore macciishshitinanniri, hajajosi wonshitinanniri, ki'ne wolqaataammu sokkaasine Kaaliiqa galattesi.

²¹ Hedosi wonshitinanniri soqqamaanosi, ki'ne gordu olanto, Kaaliiqa galattesi!

²² Gashshootisi giddo heedhinoonni kalaqami baalu, Kaaliiqa galatte. Lubbo'ya atino Kaaliiqa galati!