ERMIYAASI QURTO 3 - Qullaawa Maxaafa

QORICHA AAGINTAAWANNA HEXXO

¹ Maganunni qorichishama, hiittootero afoommohu aneeti;

² Isi ane albisinni hoole, xawaabbu nookkiwa tunsichu giddo, egemmameemmo gede assinoe.

³ Maaro nookkiha barra wo'ma, lede lede ganinoe.

⁴ Goga'yanna maala'ya shoccoorraamo assino; miqqa'yano hiiqqaqqino.

⁵ Qarrunna shetto batidhino usuri mine cufinoe.

⁶ Bi're bi're reyino manni gede, tunsichu giddo hee'reemmo gede assinoe.

⁷ Kinchu huxxi giddo eesse, cagaagetenni usurinoe daafira, ani xooqe fulate hexxo nooekki usuranyaati.

⁸ Kaa'lo afi'rate qoonqo'ya naggi asse raarummoro nafa, Maganu raare'ya macciishsha dihasi'ranno.

⁹ Doogo'ya kinchu huxxinni cufino; qaafeemmo woyiteno gaggassinoe.

¹⁰ Dagunchu gede rie agarannoe; doobbiichu gede dugannoe.

¹¹ Doogotenni goshooshe fushshe, tattayise mullawa tuge agurinoe.

¹² Digaana bedeede, maxxisi alaami giddora eessinoe.

¹³ Maxxasino facci asse agure, mannimma'yara lixe eanno gede assino.

¹⁴ Mannu barra wo'ma anere assanni oso'lanno; insa baalunku ane sirbunni kissannoe.

¹⁵ Dombophicho afii'yara wo'mitanno gede assinoe; argiisu gede qaraartanno sagalenna ago duushshinoe.

¹⁶ Uulla tuge kakkadinoe; hinko'yano kinchunni hiiqqaqqi.

¹⁷ Lubbo'ya keere hooggeenna, qawaaxxote heeshshono hawoommo.

¹⁸ Ayirrinyi'ya baino; Kaaliiqiwiinni agadheemmorino gatino.

¹⁹ Qarra'yanna tootaayyaawa'ya qaaga, argiisanna dombophicho ikkitinoe.

²⁰ Wo'ma woyite konne coye hedanna, lubbo'ya yaaddanno.

²¹ Mitto coye hedeemmo daafira, hexxo'ya galagalte dagganno:

²² Ba'nummokkinni gantoommohu, bagamannokkihu Kaaliiqi baxilli hegereha ikkino daafiraati; maarosino gooffannokkite.

²³ Soodo soodontenni haarote; ammanamasino jawate.

²⁴ Aera nooehu Kaaliiqa ikkinohura, iso calla hexxeemmo.

²⁵ Kaaliiqi hasidhannosiriranna, hexxitannosirira shaqqadoho.

²⁶ Kunnira, mannu sammi yee cince, Kaaliiqi gatisaanchimma agadhiro danchaho.

²⁷ Tenne cincano anjenni hee'ne, rosiisi'ra danchate.

²⁸ Kaaliiqi fonqolannonke yannara, cincine sammi yine calluwinke ofollino.

²⁹ Hexxo heedhankera dandiitanno daafira, umonke heeshshi assino.

³⁰ Ganninkerono xonninkerono, wo'manka cincatenni adhino.

³¹ Kaaliiqi hegere geeshsha dihunannonke.

³² Yannate geeshsha dadillisinkerono, gedensaanni bagamannokkihu baxillisi jawaata ikkinohura mararannonke.

³³ Isi ninkera dadillenna shetto abbatenni, hagiidhannoha di"ikkino.

³⁴ Usuru mine hee'ne kadammannita, Kaaliiqi afanno.

³⁵ Mannaho malinore ho'line gadadinsannita, isi afanno.

³⁶ Songote darga halaale dawinsannita, Wo'munkura Aliidi Magani afanno.

³⁷ Kaaliiqi ikkona yaa hoogiro, mittoreno assa dandaannohu dino.

³⁸ Danchuno bushuno, Wo'munkura Aliidi Magani yiikkinni di"ikkanno.

³⁹ Cubbisi daafira qorichishamanno woyite, mannu isi mayira gungumanno?

⁴⁰ Doogonke xiinxalline la'no; Kaaliiqiwano hingo.

⁴¹ Gordoho heeranno Maganiwa qolle, wodanankenna anganke kayinse,

⁴² «Cubbonna bunshe loonsoommo; atino cubbonke diaguroottonke.

⁴³ Ati hanqikkinni shorroottonke; mararittokkinni shoottonke.

⁴⁴ Huuccattonke atewa iillitannokki gede, atenee go'michunni go'lootto.

⁴⁵ Gobba gosate albaanni, fiine fushshinoonni ishini gede assoottonke.

⁴⁶ Diinnanke baala xontanni qacifattinonke.

⁴⁷ Goofonna bao iilliteennanke, masillunninna waajjillunni qoqqowamme hee'neemmo» yine huucci'no.

⁴⁸ Manni'ya ba"anni kainohunni, ille'yanni hindiiddo xashshimma lolakkanno.

^49-50 Kaaliiqi iima gordoho hee're, la"ankenna towatanke geeshsha, hindiiddo'ya uurritannokki buicho gede ikkite lolakkanno.

⁵¹ Katamu meentira iillino shollinye baala laummo yannara, wodani'ya dadilli.

⁵² Beebbatenni gibbannoeti diinna'ya, ceate gede woshshaaddinoe.

⁵³ Reyummokkinni balete giddo tugge, balete afiira kincho tu'u.

⁵⁴ Wayi wo'me aana'yaanni du'namanna, reyo gambissinoha lawinoe.

⁵⁵ Kaaliiqa'ya! Qile bale giddo hee're, atewa hige raaroommo:

⁵⁶ Raare'ya macciishsha gibbootie; maccakkino ane widira qolie.

⁵⁷ Woshshi'rummoheta anewa dagge, «Waajjitooti» yoottoe.

⁵⁸ Kaaliiqa'ya! Wodattoera dagge, lubbo'ya gatisootto.

⁵⁹ Anera iillitino beebba afoottona, halaale'ya fushshie.

⁶⁰ Diinna'ya ko'mitinoe koma baalanna, anera gantino gano baala afootto.

⁶¹ Kaaliiqa'ya! Ane aana dirrissinota xononsa macciishshootto; gantinoe gano baalano afootto.

⁶² Barra baala amaalantannohunna, busha gantannohu ane hunateeti.

⁶³ Soodinni hawarro geeshsha, ane sirbunni kissannoe.

⁶⁴ Kaaliiqa'ya! Assitino coyira qoricha uyinsa.

⁶⁵ Rumokki aanansa dirrito; hexxo ba'annonsa gede assi.

⁶⁶ Hanqikkinni ugaaxxe ammadde, baattote aaninni huninsa.