ERMIYAASI 9 - Qullaawa Maxaafa1 Shinoonnihura manni'yara hashshanna barra wi'lammora, umi'ya wayi bale, ille'yano hindiiddote buicho ikkitoommero, hiitto baxeemmohu baino. 2 Manni'ya kaajjadonna ammana nookkiha ikkinohura, insawiinni fafe halallitte baatto ha're hee'rate, gallanni darga afi'roommoro tashshi yaannoe. 3 Worbichu digaanu giddonni fulannonte gede, manni'ya afiinnino kaphu fulanno. Kunnira baattote aana, halaalu darga kaphu moohino. Kaaliiqi, «Manni'ya bunshete aana bunshe ledanni no; ani Maganonsa ikkammora dihasidhino. 4 «Mittu mittunku rodii dogaancho, olliichu baalu hemaancho ikkinona, roduu rodoosi qoropho; jaalu jaalasi hexxoonke. 5 Mannu baalu jaalasi doge balalsanno; halaale coyi'rannohu dino; arrawinsa kapho coyi'ra rosino; cubbo loosatenni mannimmansa daafursitanno. 6 Bunshete aana bunshe, dogate aana doga leddanni heedhanno; aneno Maganonsa assidhaera dihasidhino» yii. 7 Kunni daafira, Olantote Mootichi Kaaliiqi, «Siwiila tume daashshannohu gede, ani manna'ya hatto asse fonqoleemmo; manni'ya busha coye assino daafira, hakkiinni sae wolere asseemmori dino. 8 Arrawinsa shaanno maxxaati; wo'mante yannara kapho coyidhanno; ku'u ko'onne goowi alinni keere haa'ranno; wodanunni kayinni woshshaadasira hedanno. 9 Halaalintanni konne manna qorichisha dihasiissannoe? Togoo manna dirabbisi'reemmo? Konne coye coyi'roommohu ani Kaaliiqaati. 10 «Ilaallate yaadeemmo; saada hossanno xawirano wi'leemmo; baalunkuri moole goofino. Hakkaanni hige sa"annohu mittuno dino; mannunna saadate hirbano dimacciishshinanni; ceanna moyichu baalu darame goofino. 11 «Ani hedoommore asseemmo barra, Yerusaalamenna Yihudu katamma baala, diigante duuno ikkite gattanno; yeedaala calla galtannowa asseemmo» yii. 12 Anino Kaaliiqa, «Konne coye wodanchannohu egennaamu manchi nooni? Woleho kulanno gede xawisattosihu ayeti? Baatto mannu hee'rannokkita mullichonna ona ikkite mayira ba'u?» yee xa'moommo. 13 Kaaliiqino, «Kuni ikkinohu oommonsaha Seera'yanna hajajo'ya agurtino daafiraati. Insa anera dihajajantino; qaale'yano macciishsha gibbino. 14 Haxawarroota ikkite, annuwansa rosiissinonsaha Ba"aali magansidhino. 15 Kunnira ani Israeelete Magani Olantote Mootichi Kaaliiqi, kunni mannira qaraaranno haqqa itiseemmo; shaanno waano hayikkiseemmo. 16 Insanna annuwansano affinokki daga mereero billaalliseemmonsa; co'o yite gooffa geeshsha shorreemmonsa» yiie. KAA'LO AFI'RATE YERUSAALAMETE MANNI RAARINO RAARE 17 Olantote Mootichi, «Hanni ikkanni noo coye wodana assitine la'e! Wi'lanno meentono gamba asse! Haarookkise kiiranno meentono woshshe» yii. 18 Mannuno, «Illenke hindiiddidhanno gede, baqqaallinkera hindiiddo daaddanno gede, haarookkise kiirannore rakkine woshshe» yii. 19 Tsiyooni manni, «Ninke diigammoommo; saalfantoommo daafira uurra didandiinoommo; minnanke diigantino daafira, baattonke agurre ha'neemmo» yii. 20 Anino, «Ki'ne meento, Kaaliiqi yaannore macciishshe! Macca'ne qaalisi widira qolle! Wi'linanni gara seenni'nera rosiisse! Haarookkise kiirranni gara jaalla'nera kulle! 21 Reyo waalchonke iillitino; qiishonke giddora e'ino; qaaqquulle doogote, wedellano gudumaaleho shitanno» yoommo. 22 Kaaliiqi, « ‹Mannu reeshshi ishinu gede base baalate tugamanno; minde worroonniwiinni, gamba assinannikki gidi gede ikkanno› yite, mannaho kuli» yiie. 23 Kaaliiqi, «Egennaamu egennosi, wolqaataamu wolqasi, dureessuno durummasi ku'loonke. 24 Ku'la hasi'rihu, ane egennasi, bagamannokki baxilliha ikka'yanna, halaalenna taalo yoo yeemmohu, ani Kaaliiqa ikkoommota buuxasi ku'lo; ane hagiirsiisanno coyi konneeti» yii. 25-26 Kaaliiqi, «Ani Gibitse, Yihuda, Edoomi, Amooninna Moaabi manna qorichisheemmo barri daanno. Kuni manninna wolu halalli manni baalu barciminoho. Ikkollana ane dimagansidhanno. Insano ikkito Israeelete manni giddonni ane gondooro agadhinohu dino» yii. |
© The Bible Society of Ethiopia; Sidama Holy Bible BSE-UBS 262 P 2014
Bible Society of Ethiopia