ERMIYAASI 51 - Qullaawa Maxaafa

BAABILOONI LENDE QORICHINSHANNI

¹ Kaaliiqi, «Baabilooninna mannasi, fiite huntannota wolqaataame bubbe kayiseemmo.

² Gidu gede woowansitannorenna baattonsa huntannore, wole gobba manna soyemmo. Ba'inanni barri daanno woyite, insano ragu ragunkunni bala tugge baatto mulla gatissanno.

³ Gaaddonsa digaana bedeeddaranna, siwiilu uddano uddidhara yanna uyitinoontensa; wedellansano marartinoonte; olantonsa baala shakki asse.

⁴ Madidhe katammansa dooggara ubbe reyitanno.

⁵ Ani Olantote Mootichi Kaaliiqi, Israeelete qullaawi aana saonsa batidhuro nafa, Israeelenna Yihuda diaguroommo.

⁶ Lubbo'ne gatisi'rate Baabilooninni fultine xooqqe; insa loossino cubbinni ki'ne beebba gooffinoonte. Ani insara malino qoricha eemmo yanna daggino.

⁷ Gosa baala dagge agganno gede, Baabilooni, culku finiinchooti; isira hanqi'yata woyinete xajje wonshoommo; daga baala woyinete xajje agge wodana sa'u.

⁸ Baabilooni hedeweelcho uwe cancanaminona wi'lesi; miteekke hursannosiha ikkiro, madasera buurranni xagicho hasse.

⁹ Hakko hee'rannohu wole gobba manni, ‹Ninke hursate wo'naalloommo. Ikkollana dihurino; Kaaliiqi lowo hanqinni co'o asse hunasira murci're kainona, agurre gobbanke ha'no› yaanno» yii.

¹⁰ Israeelete manni mimmitoho, «Kaaliiqi ninkera halaale fushshinonkena, amme Yerusaalame ha'ne, Maganinke Kaaliiqi assinore baala dudumbona» yii.

¹¹ Kaaliiqi Qullaawu Minisi daafira rabbisi'rate yee, Baabilooni huntanno gede Medooni mootoolla kayisino. Kunni daafira, maxxa'ne quxidhe; wonqo'ne amaxxe.

¹² Baabilooni huxxa diigate malaatisse; seekkitine agarre. Qotannohano worre; gaa'le agarannoha qixxeesse. Konne coye assitinannihu, Kaaliiqi Baabilooni mannira hedinore wonshateeti.

¹³ Ati jajjabbu wayi mule hee'rattohu, dureessu Baabilooni! Goofimarchikki dayino; qocci yite ta"atto yanna daggino.

¹⁴ Ani Olantote Mootichi Kaaliiqi, «Kanchafaru gede kiiro batidhino olanto soyemmo. Hatti olantono ate qeelte qeexaa'litanno» yee su'mi'yanni xaaroommo.

KAALIIQIRA SHIQINSHOONNI GALATA

¹⁵ Kaaliiqa ati, wolqakkinni baatto kalaqootto; egennokkinni kalqe xintootto; afakkinni gordo diriirsootto.

¹⁶ Ati hajajatto yannara gordoho noo wayibba luultanno; baattote qaccennino gomicho gamba assite abbatto; xeenu yannarano banqo beleqqanno gede assatto; bubbeno maaxoottowiinni fushshatto.

¹⁷ Kaphu maganna seekkidhannori, gowwootahonna balalootaho. Tini kaphunniti magannansa, lubbo afidhinokki daafira, insa seekkidhuri saalfattanno.

¹⁸ Tini maganna mullare ikkitino daafira, minshe hunnanni; ati Kaaliiqi qorichishattonsara daatto yannara ba'anno.

¹⁹ Ati baalankare kalaqoottohu, Israeelete Magani kayinni, insa gedeeha di"ikkootto. Israeelete manna umikki manna assidhe doodhootto; su'mikkino Olantote Mootichaati.

BAABILOONI KAALIIQI MEENCHOOTI

²⁰ Kaaliiqi, «Baabilooni, ati anera, meencho'yaatinna bagado'yaati; atenni daga gudoommo.

²¹ Faradonna faradaasine, faradi gaarenna guluffannore atenni runkutoommo.

²² Atenni meya labbaaha, ajanna akkala, oosonna seenne cancanoommo.

²³ Allaalaasinenna hoshsha, hawuudhannohanna hawuurranni handa, mootoollanna gashshaano atenni hiiqqaqqoommo» yaanno.

KAALIIQI BAABILOONI QORICHISHANNO

²⁴ Kaaliiqi, «Baabilooninna mannisi Yerusaalamete aana assitino bunshera, ki'ne la'inanna rabbisi'reemmo» yii.

²⁵ Qoleno Kaaliiqi Baabilooni gosara, «Ki'ne gobba baala huntinoonniri, ilaalu gede to'ine manna guddinoonniri Baabilooni gosa, anino ki'ne hatto asse gudeemmo. Buluushshe mulla darga asseemmo'ne.

²⁶ Diigamittohu gedensaanni, dhaawate woy safote ikkanno kinchi digatannohe; atino hegerera mulla darga ikkatto. Konne coye coyi'roommohu ani Kaaliiqaati» yii.

²⁷ «Ki'ne gosa baala, bala tugate malaatisse; xurumba ufuuffe; Baabilooni qasanno manna qixxeesse. Araaraati, Mininna Ashikenaazi gashshaano, bala tugganno gede kullensa; gaadaannuwano doorre. Kanchafaru gede kiiro bati'rino farado haadhine abbe.

²⁸ Baabilooni qasanno manna qixxeesse; Medooni mootoollawa, gashshaanonniwanna olu hajajaanowa, qoleno insa gashshitino gobbara noo olanto baalate manna sokke.

²⁹ Baabilooni mitturino hee'rannokkiha ona ikkanno gede, Kaaliiqi hedino coye wonshanno daafira, baatto qece yite huxidhanno.

³⁰ Katammansa cufannanna waawanna hiiqqaqqantino daafiranna, minnansa giirantino daafira, Baabilooni bagadaano ola uurrissanno; bareende ba'eennansa shashoota ikkitanno.

³¹ Baabilooni Katami raga baala diigaminota, mootete kultara sokkaano hoode hoodete doddanni dagganno.

³² Diinu olanto waa fulte dagge qiishote giira qassanno; Baabilooni gaaddono waajjite huxidhanno» yii.

³³ Israeelete Magani Olantote Mootichi Kaaliiqi, «Ayiddummete aana gannanni gide, mannunna saada kakkaddannohu gede, Baabiloonino diinu hatto asse sibbiiqanno. Gannanni gidi gede, gamba assinannisi barri rahe daanno.

³⁴ Baabilooni moote Nabukadanatsoori, Yerusaalame murmure itino; Katama mullichu gambayichi gedeeha assino. Moyichu gede asse egemmino; hasi'rino geeshsha adhe, gatinore hune agurino.

³⁵ Tsiyooni manni, ‹Ninkera iillitino beebba, Baabiloonira iillito!› yaanno. Yerusaalamete mannino, ‹Ninke mundee duntu gede, insano hatte beebba amaddonsa!› yaanno» yii.

KAALIIQI ISRAEELE KAA'LANNO

³⁶ Kaaliiqi Yerusaalamete mannira, «Ki'nera ani ha'leemmo'ne; Baabiloonootano rabbiseemmo'ne; bu'ansanna waansa baala mooshsheemmo.

³⁷ Baabilooni diigame duuno ikkeenna, aanaho yeedaala kukkubbitanno. La"ate bararraanqanniha ikkanno; giddosi mittu manchino dihee'ranno; afihu baalu qacifatannosi.

³⁸ Baabiloonootu baalu doobbiichimma ittantanno; doobbiichu gurba'nichi gede gurura'anno.

³⁹ Saankaabbe heedheenna, jilaho koyisoommonsa. Dimbita geeshsha hayikkisoommonsa; hakkunni gedensaanni goxxanno; galagalteno dika'anno.

⁴⁰ Saadate gede gorrantannowa haa're ha'reemmonsa. Konne coye coyi'roommohu ani Kaaliiqaati» yaanno.

BAABILOONI GAWALO

⁴¹ Kaaliiqi Baabilooni daafira, «Hatte yannara mannu, ‹Gobba baala jajjannosihu Baabilooni Katami amadami! Gosa baala bararraaqqannoha ikkino!

⁴² Baabilooni, diinu baaru dambali gede ikke egemmi.

⁴³ Katammasi wayi hee'rannokkita, moolanna mullicho ikkitanno. Hakkiicho hee'rannohu dino; heleqqi yaannohano dianfanni.

⁴⁴ Baabilooni magano Marduki qorichisheemmo; adhinore baala tushshiisheemmosi; layinkimeeshsho gosa diguwissannosi; Baabilooni huxxuwa to'ino› » yaanno.

⁴⁵ Kaaliiqi qole, «Manna'ya, Baabilooninni xooqqine fulle! Waajjishannohu hanqi'yanni, lubbo'ne gatisi'rate fultine ba'e!

⁴⁶ Diru dirunkunni dudumbanniha, moote mootete ledo gaarantannoha, bunshete duduwo macciishshitineenna, wolqa'ne ba'oonke.

⁴⁷ Baabilooni maganna gudeemmo barri daanno; mannu baalu goofeenna, baatto saalfattanno.

⁴⁸ Baabilooni aliyyenni daanno diini angara eanno waro, gordunna baatto, qoleno aanansa noori ilillisanno.

⁴⁹ Baabilooninni kainohunni lowo gosa gooffino; Israeelete baorano kaimu isootina, Baabilooni uwanno. Konne coye coyi'roommohu ani Kaaliiqaati» yii.

BAABILOONI HEEDHANNO ISRAEELERA KAALIIQI SOYINO SOKKA

⁵⁰ Kaaliiqi Baabilooni hee'ranno mannira, «Ki'ne reyotenni gattinoonniri manni'ya, rakkine fultine hadhe! Manni gobbara heedhinirono, ane Kaaliiqanna Yerusaalame habbinoonte.

⁵¹ ‹Xonnoonninke daafira, saalu amadinonke. Qullaawu Dargira Kaaliiqi Minira, wole gobba manni eino daafira, sholline umo heeshshi yinoommo› yitinanni.

⁵² Baabilooni maganna gudeemmohunna, baattote aana madaanonsa uratto macciishshinanni barri daanno. Konne coye coyi'roommohu ani Kaaliiqaati.

⁵³ Baabilooni gordu iimira fule, qiisho qiishi'riro nafa, hakkiichira mare gudannosi diina soyemmo» yii.

BAABILOONI AANA LEXXITANNO BAO

⁵⁴ Kaaliiqi, «Baattote aana daggino bao daafira, Baabilooni manni raaranno raare macciishshe!

⁵⁵ Ani Baabilooni co'o asse gude, sammi yaanno gede asseemmo. Olanto dambalu gede ikkite luultanni dagge, hedeweelcho bala tugganno.

⁵⁶ Guddannosiri gaaddinosi daafira, gaaddosi qafadantu; maxxinsano hiiqqaqqami. Ani baalunkura loosisi garinni eemmoha ikkoommo daafira, Baabiloonino assino beebbara shetiseemmosi.

⁵⁷ Ejjeettosi, masaalaanosi, gashshaanosi, olu hajajaanosinna gaaddosi, agge dimbitanno gede asseemmo. Dimbituhu gedensaanni goxxanno; hakkiinnino layinkimeeshsho dika'anno. Ani Moote Olantote Mootichi Kaaliiqi konne coye coyi'roommo.

⁵⁸ Hala'ladu Baabilooni huxxi toe, baattote ledo xaadanno. Seeddaanna cufannasi giirantanno; mannisi daafurino mullawa gatanno. Mannisi daafure assinori baalu giirame ba"anno. Konne coye coyi'roommohu ani Olantote Mootichi Kaaliiqaati» yii.

ERMIYAASI BAABILOONI MANNIRA SOYINO SOKKA

⁵⁹ Mahiseya beetti Neeriya ilinohu Seeraya moote Sedeqiyaasira gamba yiino gashshaanchooti. Sedeqiyaasi Yihudaho moohihunni shoolki diro, Seeraya isi ledo Baabilooni gobba ha'ranna, biddishsha ikkannore anga woroommosi.

⁶⁰ Baabilooni aana dagganno baonna isi daafira kulloonni coye baala maxaafaho borreessoommo.

⁶¹ Seerayano, «Baabilooni iillitanni heedhenni, kunni maxaafira borreessoommore baala qoonqokki naggi assite mannaho nabbawi.

⁶² Hakkunni gedensaanni, ‹Mooticha'ya! Ati tenne baatto hunatto gede coyi'rootto. Kunnira lubbo afi'rino kalaqami: mannunna saada gooffeenna baatto hegerera ona ikkite gatto› yite huucci.

⁶³ Seeraya, konne maxaafa nabbabbe gudittohu gedensaanni maxaafa kinchu ledo usurte Efiraaxisi Wayi giddo tugge,

⁶⁴ ‹Kaaliiqi aanasi abbanno baonni kainohunni Baabilooni togo ikke uwe gatanno; layinkimeeshsho hakkiinni dika"anno› yii» yoommosi. Ermiyaasi hasaawi konne goofino.