ERMIYAASI 50 - Qullaawa Maxaafa

BAABILOONIRA HIMANNOONNI HIMANA

¹ Kaaliiqi Baabilooni gobbaranna giddo hee'ranno manni baalunkura kuleemmo gede ane Ermiyaasira,

² «Daga baalate duduwo kulle; ge'recho qassine lallabbe. Mittoreno gatissinikkinni, ‹Kune Baabilooni amadamaraati; maganinsa Marduki hiiqqamaraati; tiyyi'nanniti misillansano cancanantaraati.

³ Bala tugge Baabilooni mulla darga assitanno gosa, aliyyeenni ka'ino; saadano mannuno fule xooqanno; mitturino giddo digatanno› yiino yite kulinsa» yiie.

ISRAEELETE MANNI GOBBANSA HIGANNO

⁴ Kaaliiqi, «Hatte yannara, Israeelennihunna Yihudu manni gamba yee wi'lanni, ane Maganonsa hasi'ranni daanno.

⁵ Tsiyooni massitanno doogo xa'mitanni, hattenne doogo amadde hadhanno; ‹Layinkita didiingeemmo› yitanni, ane ledo hegere gondooro e'anno.

⁶ «Manni'ya ballehino ge'reewi gede ikkino; allaalaasinensa doogote aaninni soorriteenna, ilaallatenna gaarrate aana raataabbanni, fooliishshidhannowa hooggino.

⁷ Afihu baalu bala tuginonsa; diininsano, ‹Assitino cubbilla amadinonsana, ninke assinoommonsari dino. Halaalaanchu qanchinsara, akaakkansa hexxite heedhino Maganira, badhe wodhitino daafiraati› yaanno.

⁸ Ki'ne Israeele, Baabilooni gobbanni xooqqine fulle! Gobba agurtine hadhe! Wole balaxxine ki'ne fulle!

⁹ Aliyyeenni heedhanno gosa, Baabiloonira gaaddanno gede asseemmo; dagge amaddanno; insano olte disodhannoreeti.

¹⁰ Baabilooni gobba mulqantanno; mulqidhannorino illensanni leellinore baala, hasidhu geeshsha adhitanno. Konne coye coyi'roommohu ani Kaaliiqaati» yii.

BAABILOONI GAWALO

¹¹ Kaaliiqi, «Ki'ne Baabilooni gosa! Manna'ya mulqidhine hagiidhitinanni kukkubbitinoonni; kalote giddo burraaqqanno adde gede ikkitinoonni; misino farashshi gede himimmissinoonni.

¹² Ikkirono ayirradu katami'ne saalfatanno; gobba ama'ne shollitanno; gashshootu baalunkura woriidita ikkitanno; wayi hee'rannokkita moola ikkitanno.

¹³ Hanqi'yanni kainohunni Baabilooni gobbara mittuno dihee'ranno; diigame gatanno; mulesiinni sa"annohu baalu mase bararraaqanno.

¹⁴ «Ki'ne digaanunni olantinanni bagadaasine, Baabilooni qasate doyissitine amadde; ane Kaaliiqi aana sao assitino daafira, mittono gatissinikkinni maxxa baala, Baabilooni aana giggishshe.

¹⁵ Katamu qooxeessira alaakke; kune Baabilooni anga uyino; huxxisi baalu diigamino. Ani Baabilooni rabbisanni noommo daafira, ki'neno rabbisidhe; insano woloota assitu gede asse.

¹⁶ Baabilooni gobbara gide wixi'rannohunna, wixi'rinoha mixxannohuno hee'rannokki gede asse. Hatte gobbara hee'rannohu wole gobba manni, bagadaasine waajje gobbasi hige xooqanno» yii.

ISRAEELETE MANNI GOBBASI HIGANNO

¹⁷ Kaaliiqi, «Israeelete manni doobbiyu shorre billaallisino ge'reewi gede ikkino; balaxe Asoori moote gawajjinonsa. Hakkunni gedensaanni, Baabilooni moote miqichonsa quruuxino.

¹⁸ Kunnira, ani Israeelete Magani Olantote Mootichi Kaaliiqi, Asoori moote qorichishummonte gede, Baabilooni mootenna gobbasi qorichisheemmo.

¹⁹ Israeelete manna qanchinsa giddora qoleemmo; Qermeloosi Ilaaliranna Baasaani gobbara fulinore baala itanno; Efireeminna Geleaadi gobbara fulanno gide hasi'ri geeshsha itanno.

²⁰ Hatte yannara, reyotenni gatisoommoha, Israeelennihanna Yihudu manna maareemmo daafira, giddonsa cubbonna sao hanse dianfanni. Konne coye coyi'roommohu ani Kaaliiqaati» yii.

KAALIIQI BAABILOONI QORICHISHANNO GARA

²¹ Kaaliiqi, «Miratayiminna Feqoodi gosa aana bala tugge; shitine gudde. Ani yeemmo'nere baala asse. Konne coye coyi'roommohu ani Kaaliiqaati.

²² Baattote aana olu luulo macciishshinanni; lowo bao iillitanno.

²³ Baattote aana noo manna baala, meenchu gede asse cancanino Baabilooni, xa kayinni umisi cancanamanno. Insa aana ikkanno coyi bararraanqanniho.

²⁴ Baabilooni! Ane Kaaliiqi ledo gaarantinoonni daafira, hedeweelcho woroommo woshshaado giddora e'inoonni.

²⁵ Ani Olantote Mootichi Kaaliiqi, Baabilooni gobbara looseemmo loosi nooe daafira, olu uduunne duunnanni mine fane, hanqu bagado fushshoommo.

²⁶ Ki'ne Baabilooni diinna, ragu baalunkunni daggine qasse; gide duu'nitino gootarra baala fanne. Adhitinoonnireno gidu gede assitine duunne; mittoreno gatissinikkinni shakki assitine gudde.

²⁷ Qorichinshanninsa yanna iillitinona, Baabilooni wedella, woraamma gorrinannihu gede assitine gorre.

²⁸ Baabilooni olanto Qullaawa Mine'ya diiggino; ikkollana ani rabbisi'reemmo. Hakkunni gedensaanni qafadotenni higgannori, ani Kaaliiqi assoommore Tsiyooni dudubbanno» yii.

²⁹ Kaaliiqi, «Digaana bedeeda egentino bagadaano, Baabiloonira gaaddanno gede woshshe. Ane Kaaliiqi Israeelete qullaawi ledo gaarantino daafira, mittuno gate fulannokki gede gaangeessitona. Bushu loosinsa daafira qorichansa uuyyensa; wole beebba assitunte gede, insano hatto asse.

³⁰ Kunni daafira, wedellansa dooggate aana shinanni; olantonsa baala hakko barra gooffanno. Konne coye coyi'roommohu ani Kaaliiqaati.

³¹ «Ki'ne boonaleeyye, ani Olantote Mootichi Kaaliiqi ki'ne aana noommo; qorichisheemmo'ne yannano iillitino.

³² Ki'ne boonaleeyye gosa, sarraaqantine ubbinanni; irkise gotti assanno'nehuno dihee'ranno. Katami'nera giira qaseemmo; qooxeessaho noori baalu giirame goofanno» yii.

³³ Olantote Mootichi Kaaliiqi, «Israeelennihunna Yihudu manni gadadamino. Qafadde haadhe hadhinonsari, fultannokki gede agare wortinonsa.

³⁴ Wodeemmonsahu ani Olantote Mootichi Kaaliiqi jawaataho; ani umi'ya insara golame, gobbansara keere dirriseemmo. Baabilooni heedhannori kayinni fooliishsho diafidhanno.

³⁵ «Reyo Baabilooni mannira! Reyo gashshaanonsara! Reyo masaalaasinensara!

³⁶ Reyo gowwootaho, kaphaano himanaanonsara! Reyo waajjite huxidhannorira bagadaanonsara!

³⁷ Goofo faradinsaranna faradi gaarensara! Reyo shashootaho, kiranyootu olantonsara! Goofo saammannitera jironsara!

³⁸ Moolleno gobbansara ikkito; wayibbansano gooffo. Gobbansara tiyyi'nanni maganna wo'mite, insano gowwoota assitinonsa.

³⁹ Baabilooni gobbara durriisu, gotunna awulo calla heedhanno; mannu layinkimeeshsho hakkiicho dihee'ranno.

⁴⁰ Soddoomanna Gomoora, qooxeessinsara noo katamma ledo diigummonte gede, Baabiloonino hatto asseemmo. Hakkiicho layinkimeeshsho mannu dihee'ranno. Konne coye coyi'roommohu ani Kaaliiqaati» yii.

⁴¹ Kaaliiqi qole, «Aliyye ragira qoltine la'e; kune fafo gobbara, wolqaataame daga olaho qixxaabbanni no.

⁴² Insa digaananna urde amaxxitinoreeti; kaajjaddahonna marartannokkireeti; faradinsa hirbi dambalu gedeeho. Baabilooni, kune insa ate qassara dagganni no.

⁴³ Baabilooni moote konne duduwo macciishshanno woyite, wolqasi daaqqanno; waajjillu amadeenna gamaa'mitanni noo mancho gede ikkanno.

⁴⁴ «Yordaanoosi mule noo dubbi giddonni fule, kalloonni hayisso giddora eanno doobbiichi gede ikke, hedeweelcho daye Baabiloonoota shorre, hasi'roommoha shoomeemmo. Hoolannoehu ayeti? Ane gedeehu nooni? Ittisannoe gashshaanchino hiikkonneeti?

⁴⁵ Kunnira, ani Kaaliiqi Baabilooni Kataminna, giddo heedhinanni manni ani hedoommore macciishshe; ooso'ne nafa goshoonshe haa'ne ha'nanni; la"annohu baalu bararraaqanno.

⁴⁶ Ubbinanna macciishshinanni luulinni kainohunni, baatto shafantanno; luuluno hakkiinni sae wole gobbara leellanno» yii.