ERMIYAASI 5 - Qullaawa Maxaafa

YERUSAALAMETE SAO

¹ Kaaliiqi Yerusaalamete mannira, «Hanni Yerusaalamete doogga baala kawanna ka'a higgine la'e; taalo coyi'rannohanna, halaale hasannoha mitto mancho nafa anfannini? Taalo coyi'rannohanna halaalaancho, mitto mancho nafa affiniro, Yerusaalame maareemmo.

² Ki'neno, ‹Heeshshote Magani Kaaliiqi halaaleeti› yitine, ane su'minni xaartinanni; xaartinoonni xaaro kayinni qoltine diigginanni.

³ Anino, ‹Illekki halaale la'annota ikkitinota afoommo; kaphinsa daafira mannakki qorichishatto. Insa kayinni be'eno diyitanno. Ati insa cancanoottonna qoomootto; insa kayinni roorenka haxawarroota ikkite, cubbinsawiinni higa gibbino› yoommo.

⁴ Hakkunni gedensaanni ani, ‹Kuni manni buxanetenna, egenno xe'ino hawanyaati. Kaaliiqi doogo diegennino; Maganinke Seerano diafino.

⁵ Xa gashshaanonniwa mare insa ledo hasaaweemmo; insa Maganinke Kaaliiqi Seeranna, assitara hasi'rinore baala seekkite affino› yee hedoommo. Insano affe heedhenni isira hajajama gibbino.

⁶ Mannu lowo geeshsha haxawarre Kaaliiqa agurino; kunnira diinu dubbu doobbiyi gedenna, halalli hiyyeeyye gede asse diddishannonsa; katammansara noore dagunchu daddarannonsa.

⁷ «Manni'ya ane agure kaphu maganna magansi'ranno; ani cubbonsa hiitto asse agureemmoyya? Ani manni'yara hasiissanno sagale itise duushshoommonsa. Insa kayinni foortannore ikkite, yannansa fooru meenti ledo guddanno.

⁸ Ki'ne saadatewiinni diwoyyitinoonnireeti; mitu mitu olliichisi galte foorrete hasiisanno.

⁹ Konne manna qorichisha dihasiissannoeyya? Togoo manna dirabbisi'reemmo?

¹⁰ Kunnira ani diinnansara, ‹Martine manni'yata woyinete kaashshi damatte karre; gudissine kayinni huntinoonte; sinna aneta ikkitinokki daafira murmurtine hunne.

¹¹ Israeeletenna Yihudu manni ane horonta agurinoe› yoommo. Konne coye coyi'roommohu ani Kaaliiqaati» yii.

KAALIIQI ISRAEELETE MANNA AGURI

¹² Himanaano kaphitanni, «Kaaliiqi mittono busha coye ninke aana diabbanno; keerella hee'neemmo; oluno hudeno diamaddannonke» yitanno.

¹³ Insa Kaaliiqi yiinokkire coyidhanno; kunnira coyinsa diilallo ikke gatanno; gibbanno coyi aanansa daanno.

¹⁴ Kunnira olantote Mootichi Kaaliiqi, «Ermiyaasi! Kuni manni togo yee coyi'rino daafira, qaale'ya afiikkira giirate gedeeha asseemmo; mannano haqqete gede ikkeenna giira ittanno» yiie.

¹⁵ Qoleno, «Israeelete manna! Kuneeti ki'ne aana bala tugganno daga, fafo gobbanni abbeemmo. Tini dagano wolqaataame bi're albi dagaati; afoonsano diegentinoonnireeti; coyidhannoreno diaffinanni.

¹⁶ Insa baalunku bagadaanote; bagadinsano diso'rannoho.

¹⁷ Gide'nenna sagale'ne mucuqqi assite ittanno; ooso'nenna seenne'neno shitanno. Saada'ne, ge'reewo'nenna me"e'ne itte guddanno; woyinete laalo'nenna haqqu laalo'ne baala ittanno; olantonsano hexxitinannita, qiishidhinoonni katamma guddanno» yiinsa.

¹⁸ Kaaliiqi anera, «Kuni baalu ikkanno barra nafa manna'ya co'o asse digudeemmo.

¹⁹ Ermiyaasi! Mannu, ‹Maganinke Kaaliiqi konne coye baala mayira abbinke?› yiihero, atino, ‹Konne assinohu ki'ne iso agurtine gobba'nera noota wole kaphu maganna magansidhinoonni daafiraati. Kunnira, ki'neno umi'neta ikkitinokki gobbara wolu mannira soqqantinanni› yite kulinsa» yiie.

KAALIIQI MANNA QOROPHISIISI

²⁰ Kaaliiqi, «Ki'ne Yihudu manna, Yaiqoobi sircho,

²¹ ‹Gowwootunna balalootu, hanni wodanche! Ille heedheennanni affinannikkiri, macca heedheennanni macciishshitinannikkiri, konne coye macciishshe› yite kuli.

²² Ane Kaaliiqa waajja mayira gibbini? Ane albaanni qece yaa mayira hooggini? Ani waa sae ha'rannokki gede assoommo. Wayi ayee geeshshano shafamiro, dambaluno kae luuliro, danna sa"ara didandaanno.

²³ Ki'ne kayinni hettisamaanonna, haxawarra manna ikkitinoonnihura, ane agurtine umi'ne doogo hadhinoonni.

²⁴ Umihanna gedeni xeena yannatenni eemmo'nehu, diru dirunkunni gide gamba assidhinanni yanna, iillisheemmo'nehu aneeti; ki'ne kayinni ane ayirrisa agurtinoonni.

²⁵ Tini loossinoonni bunshe atoote ho'litino'ne; danchu coyi baalu ikkanno'nekki gede assitino'ne.

²⁶ «Manni'ya mereero bushu manni no; insano cea woshshaaddannori gedeereeti; mannano hatto assite amaddara gaa'lite agartanno.

²⁷ Cea amade mine wonshi'rannohu gede, insano hanaaqqe gamba assidhino jiro mine wonshidhino; wolqaataammanna dureeyye ikkitinohu kunninniiti.

²⁸ Insa maqalloonni booti gede missino; bunshensarano gawalo dino; annanna ama afidhinokki oosohanna, qarraataammu halaale dawissanno.

²⁹ «Kunni baalunku coyira, ani Kaaliiqi insa qorichisha dihasiissannoe? Togoo manna dirabbisi'reemmo?

³⁰ Qarrisannohunna masisanno coyi, tenne baatto aana ikkino.

³¹ Himanaano kaphu himana coyidhanno; qeesootuno insa yiture assitanno; manni'yano insa yitannore baxanno. Qarru daanno barra kaa'lote mamira martannoyya?» yii.