ERMIYAASI 49 - Qullaawa Maxaafa

AMOONI GOSA DAAFIRA KULLOONNI HIMANA

¹ Amooni gosara Kaaliiqi, «Israeelete ragidhanno ooso dinoni? Molooki magani, Gaadi ga're giddonni fushshe hoole, Amoonootu amaddanno gede mayira assiyya?

² Ani Kaaliiqi yeemmota macciishshe: Kune Amooni gosa dannawu Katamira Raaba, olu luulo macciishshitanno gede asseemmo yanna dagganno. Katamu diigameenna gaangaawinsara noo qachi giiramanno; hakkunni gedensaanni Israeele adhantinota baattonsa qo'litanno.

³ Katami'ne diigamanno daafira, Hasebooni heedhinanni manni wi'le; Gayi katamino diigamanno. Molooki magani'ne, qeesooti'nenna roorrooti'ne ledo qafadamaraatina, ki'ne meentu garu baeenna'ne raataabbinanni wi'le; xiddu uddano uddidhine manchitte.

⁴ Ki'ne ammanama noo'nekki gosa, lagicha'ne mayira addaxxitinanni? Laashshannoha lagicha'ne mayira hexxitinanni? Qiniite'ne ku'litinanni, ‹Ayi kisannonke?› yitinoonni.

⁵ Kune ragu baalunkunni waajjille abbammo'neraati; baalunku lubbosi adhe xooqanno daafira, billaallino manna gamba assannohu dihee'ranno.

⁶ Ikkollana wole yannara, Amooni gosa galagalche duroonseemmo. Konne coye coyi'roommohu ani Kaaliiqaati» yii.

EDOOMI GOSARA KULLOONNI HIMANA

⁷ Edoomi gosa daafira Olantote Mootichi Kaaliiqi, «Edoomi gosara albi egenno ba'unsani? Amaalaasinensa mala aa hooggunsani? Egennonsa hiikka higgu?

⁸ Eesawu sircho gudeemmo yanna iillitinona, ki'ne Dedaani Katami manni, xooqqine ba'ine, godu giddo maaxamme.

⁹ Mannu woyinete laalo xinqi'ranno woyite, aanaho xaro gatisanno; hashsha e'ino mooraanono hasidhino geeshsha calla adhite hadhanno.

¹⁰ Ani kayinni ki'ne Eesawu sircho co'o asse mulqeemmo; maaxantinanni darga baala reqecci asseemmo; ki'ne, ooso'ne, fiixi'nenna oollii'neno gooffinanni.

¹¹ Giddo'ne noore annanna ama afidhinokki ooso anera agurre; galte afi'rinokki meentino ane hexxona.

¹² Qorichu malinokkiri aneha hanqu finiincho cingiishshidhannoha ikkiro, ki'ne qorichishantinikkinni gattinanniha lawanno'neni? Horonta gattinanni gari dino; ki'neno hanqu finiincho cingiishshidhinanni.

¹³ ‹Bootsira Katami diigame mulla darga, masillunniha, qacifantannihanna rumonniha ikkanno› yee ani su'mi'yanni xaaroommo. Qooxeessisira noo katamma baalano diigante gattanno» yii.

¹⁴ Ani Ermiyaasi Kaaliiqi ki'ne Edoomi manni daafira, «Olantonsa gamba assidhe ki'ne qassanno gede, kulannonsa sokkaancho dagate soommo.

¹⁵ Mannu baalu mishanno'ne gede, dagate mereero maa'ne, mannahono woriidire asseemmo'ne.

¹⁶ Ki'ne kinnaamu boonira heedhinanniri, ilaalu birxe geeshsha iillitinoonniri, waajjishiishshi'nenna wodani'ne boo'na doggino'ne. Allamurchu gede mine ilaalu aana mi'nitinirono, hakkiichinni dirriseemmo'ne. Konne coye coyi'roommohu ani Kaaliiqaati» yee coyi'ranna macciishshoommo.

¹⁷ Kaaliiqi qole, «Iillitino'ne bao lae, hakkaanni hige sa"annohu baalu bararraaqanno.

¹⁸ Soddoomunna Gomooru qooxeessinsara noo katamma ledo, diigantu wari gedee bao, ki'ne Edoomi manni aanano dagganno. Gobba'nera layinkimeeshsho mannu dihee'ranno. Konne coye coyi'roommohu ani Kaaliiqaati.

¹⁹ Yordaanoosi mule noo dubbi giddonni fule, daffitino kalo giddora eanno doobbiichi gede ikke, hedeweelcho daye Edoomoota shorre, hasi'roommoha shoomeemmo. Hoolannoehu ane gedeehu ayeti? Ittisannoe gashshaanchino hiikkonneeti?

²⁰ Kunnira, ani Kaaliiqi Edoomi manniranna Temaani Katamira heedhannorira hedoommore macciishshe; ooso'ne nafa goshoonshe haa'ne ha'nanni; la"annohu baalu bararraaqanno.

²¹ Ubbinanna macciishshinanni luulinni kainohunni, baatto shafantanno; luuluno hakkiinni sae Duumu Baari geeshsha leellanno.

²² Allamurchu qoola fane eela buuwannohu gede, diinu Bootsira gawajjara qoqqobbisanno. Hatte yannara ki'ne Edoomi olanto wodani, game amaddino mancho wodani gedeeha ikkanno» yii.

DEMAASIQOTE KATAMIRA HIMANNOONNI HIMANA

²³ Kaaliiqi Demaasiqote Katami daafira: «Hamaatinna Arfaadi katamma manni, Demaasiqonniha busha duduwo macciishshanno woyite, wodaninsa dambalu shafino baari gede ikke hembeelamanno.

²⁴ Demaasiqote mannira wolqa ba'anno; waajjite xooqqara ka'anno; gamaa'mitanni noo mancho gede, qarrunna shetto amaddannonsa.

²⁵ Hakku maccahunna hagiirraamu katami, hee'ranno manni hoogeenna ona ikke gatanno.

²⁶ Hakka waro Demaasiqote wedelli reeshshi dooggate waxaaxanno; olantosino gooffanno.

²⁷ Demaasiqote huxxira giira qaseemmo; Benihadaadiha mootete mine giira ittanno. Konne coye coyi'roommohu ani Olantote Mootichi Kaaliiqaati» yii.

QEEDAARINNA HATSOORI GA'RE DAAFIRA HIMANNOONNI HIMANA

²⁸ Kaaliiqi Baabilooni moote Nabukadanatsoori anga galtinorira Qeedaari ga'reranna Hatsoori gobbara, «Ka'ne Qeedaari ga'rera gaaddine, soojjaati manna gudde.

²⁹ Dukkannansanna saadansa baala adhe; dukkonsanna uduunnensa baala adhe; gaallansano adhitine, ‹Kune mogga gaangeessite noo'ne› yitine kullensa.

³⁰ Ki'ne Hatsoori manna, Baabilooni moote Nabukadanatsoori, ki'nera busha gano ganinona, xeerto gobba hadhine godu giddo maaxantinanni gede, ani Kaaliiqi kuleemmo'ne.

³¹ Ani Kaaliiqi Baabilooni mootera, ‹Daggine huxxu, cufannanna waawanna nookkiha fano heedhenni, bashshi assitukkinni hawaqidhe noo gosara bala tugi› yee kuloommosi.

³² ‹Gaallansanna saadansa adhe; umo qooxidhannore baala billaalliseemmo; ragu baalunkunni qarra abbeemmonsa› yee kuloommosi.

³³ Kunnira, Hatsoori yeedaala heedhannowa ona gobba ikke gatanno; layinkimeeshsho hakkiichira heleqqi yaanno manni dihee'ranno. Konne coye coyi'roommohu ani Kaaliiqaati» yii.

ELAAMI GOBBA DAAFIRA KULLOONNI HIMANA

³⁴ Yihudu moote Sedeqiyaasi moohanni hee'reennanni, Kaaliiqi Elaami gobba daafira,

³⁵ «Ani Elaami wolqaataame assitinota bagadaano'ne sheemmo.

³⁶ Elaamira shoolente maddenni bubbe kayiseemmo; mannano base baalate billaalliseemmo; insa iillitannokki dargino dihee'ranno.

³⁷ Elaami manna shaara hasanni noo diini, waajjishiishanno gede asseemmo; lowo hanqi'yanni co'o yite gooffa geeshsha, bagado soye shorreemmonsa.

³⁸ Mootensanna gashshaanonsa hune, ayirrado barcima'ya hakko wodheemmo.

³⁹ Ikkollana, mitto barra dargansa qoleemmonsa. Konne coye coyi'roommohu ani Kaaliiqaati» yii.