ERMIYAASI 48 - Qullaawa Maxaafa

MOAABIRA IILLITANNO GOOFO

¹ Moaabi daafira Israeelete Magani Olantote Mootichi Kaaliiqi, «Katami'ne ba"anno daafira, Nebo Katamira heedhinanni mannira ki'nera aanne'e! Qiriyatayimi diinu angara eanno; jawaata qiisho'neno diigantanno; manni'neno saalaho uwanno.

² Moaabi ayirrinyi ba"anno; Hasebooni Katama diinu amade, ‹Amme layinkita su'minsa ka"annokki gede assinona› yaanno. Diinu gaadanno'ne woyite, ki'ne Madimeeni manni beeshshidhine sammi yitinanni.

³ Horonayimi manni, ‹Baonna goofo iillitunke› yee raaranno.

⁴ Ki'ne Moaabi manna diinu gudanno; ooso'neno raartanna macciishshitinanni.

⁵ Luhiiti Katama raartanni fultanno; Horonayimi eelallitte dirritanno woyite, goofotenni kainohunni dadillite urtanno.

⁶ Mimmitinsara, ‹Lubbo'ne gatisi'rate, gobba harre gede ikkitine xooqqe› yitanno.

⁷ Moaabi manna, ki'ne wolqa'nenna jiro'ne hexxitinoonni; xa kayinni ki'ne umi'ne qafadantinanni. Kamooshi yinannihu magani'ne, roorrooti'nenna qeesooti'ne ledo qafadamanno.

⁸ Ani coyi'roommonte gede, katamma'ne hunannohu daanno; mittu katamino digatanno; lagichanna taalo gobba co'o asse hunanno. Konne coye coyi'roommohu ani Kaaliiqaati.

⁹ Molo baatto ikkitanno gede, Moaabira aanaho maxine fince; katammansano mannu hee'rannokkita ona ikkitanno» yii.

¹⁰ Kaaliiqi looso lashshi assannohu rumaminoha ikko; bisesi mundeetewiinni hoolannohu rumaminoha ikko.

MOAABI KATAMMA CO'O YITE BA'ANNO

¹¹ Kaaliiqi, «Mittu uduunnichinni woleho galchinikkinni, coommilliseno soorramikkinni ofolte heedhanno xajje woyinennite gede, Moaabi gosano hundinni kayisse techo geeshsha wodahantukkinni heedhino; qafadanteno diegentino.

¹² «Xa kayinni kune woyinete xajje wolu uduunnichira galchine uduunnicho hiiqqine hunnannihu gede, ani Moaabi gosa wolewa qole galche gobba diigge huntannore soyemmo yanna daggino.

¹³ Beeteli Israeele irraawisinte gede, Kamooshino Moaabi gosa irraawisanno.

¹⁴ «Ki'ne Moaabi gosa, ‹Ninke bagadaasinete; olahono fullankoommoreeti› yitine mayira adawadhitinanni?

¹⁵ Moaabinna katammansa diigantanno; aju mannino gorramanno; Olantote Mootichi Kaaliiqi, ani Moote konne coyi'roommo.

¹⁶ Moaabira bao iillitino; diigamanno barrino rahino.

¹⁷ Maccaha ikkasi egentinoonniri, qarqarisira heedhinanni gosa baala, ‹Gashshootikki wolqa ayirrado, hiitto ikkite hiiqqantu?› yitinanni wi'lesi.

¹⁸ Qiishosi baala diigantanno gede assinohunna, Moaabi hunannohu konniicho noona, Dibooni Katamira heedhinanniri baalu, dirritine uulla bukote aana ofolle.

¹⁹ Aroeeri katamira heedhinanniri, doogote uurritine la'e; xooqanni noo mannanna, fule ba"anni noo meento xa'mitine ikkanni noore buuxxe.

²⁰ Moaabi baatto diigante shollinyeho ubbino daafira, diddine wi'le; Moaabi gobba diigantinota Arnooni Wayiwa lallabbe.

²¹ Alichichu Arnooni Lagichira aliyyeenni noo gobba Hoolooni, Yahisanna Mefa"aati Kaaliiqi hanqe qorichisharaati.

²² Dibooni, Nebonna Beeti Dibilatayimi,

²³ Qiriyatayimi, Beeti Gamuuli, Beeti Meooni,

²⁴ Qiriyotinna Bootsira yinannita mulenna xeertote noota Moaabi katamma Kaaliiqi hanqe qorichishanno.

²⁵ Moaabi wolqa hiiqqantino; dhukisino baino. Konne coye coyi'roommohu ani Kaaliiqaati» yii.

MOAABI GOSA SHOLLITANNO

²⁶ Kaaliiqi, «Moaabi gosa ane aana naaxxitinona, hayikkissine dimbisse; tufinsa aana gongo'mitanna mannu oso'lonsana.

²⁷ Israeele moorunni diamadantino; ki'ne kayinni mooraanchimmate kiirtinoonninsa. Oso'linannite gede assitine kiirtine coyidhinanni kiironni umo'ne shaffinanni.

²⁸ «Ki'ne Moaabi gobbara heedhinanni manni, katamma'ne agurtine fultine mine boonu gama mi'nitino ceicho gede ikkitine kinchu qarra suuqamme.

²⁹ Moaabi gosa boo'nitinota, naaxxitinota, xelleqqissinotanna fenjeejjitinota afoommo.

³⁰ Haxawarrimmansa afoommona, haafalla boo'nitino.

³¹ Kunnira, Moaabi manniranna Qiirihereesi manni baalunkura wi'leemmo.

³² Sibima Katami manna, sinnase Reyote Baara sa'e Yaizeeri Katami geeshsha iillitino haqqicho woyinennite gede hala'litinoonni. Kayinnilla, Yaizeeri manni woyinete laalonsa diinu huneenna wi'lannonte gede, ba'inanni heedhinoonni daafira anino ki'nera wi'leemmo.

³³ Shaqqado Moaabi gobbanni hagiirrunna hisanyootu baino; woyinete xajje huuncinanni darga mooshsheemmo; woyinete xajjeno hagiirrunni kukkubbanni huuncannohu dihee'ranno; hagiirru huurono diheedhanno.

³⁴ «Hasebooninna Eliaale manni qoonqonsa naggi asse raaranno. Raarensa Yahaatsi Katami geeshsha iillitanno; Zooaarinni Horonayimi Egilaati-Shilishiya geeshsha iillitanno; Nimiriimi Xashshi nafa moolanno.

³⁵ Moaabi gobbara gaarrate aana kakkaltannokki gedenna magannansarano hixaana giirtannokki gede hooleemmo. Konne coye coyi'roommohu ani Kaaliiqaati.

³⁶ «Suusulle ufuunfanni wi'linannihu gede Moaabira hururame wi'leemmo; afidhinori baalu goofinonsa daafira, Qiirihereesi mannira manchiteemmo.

³⁷ Ereeda mudhite, umono meexxite, anga bicidhe xiddu uddanono uddidhino.

³⁸ Moaabi hasi'nannikki uduunni gede asse hiiqqaqqoommo daafira minnanna gudumaalla wi'la callate.

³⁹ Moaabi gosa hiiqqantino! Saalfatte alba shawwu yitino gara la'e! Afihu baalu qacifatannore ikkitanno. Konne coye coyi'roommohu ani Kaaliiqaati» yii.

MOAABI GOSA GATTANNO DOOGO HOOGGU

⁴⁰ Kaaliiqi, «Qoola fane eela hige buuwanno allamurchi gede Moaabi aana doyanno diini daanno.

⁴¹ Katammanna qiisho baala amadantanno; hatte yannara Moaabi olanto game amaddino mancho gede ikkitanno.

⁴² Moaabi gosa ane aana naaxxitino daafira diigantanno; layinkimeeshsho gosate gede dikiirantanno.

⁴³ Moaabi gosa, ki'ne waajjillu, ubbinanni balenna amaddanno woshshaado agarte noo'ne. Konne coye coyi'roommohu ani Kaaliiqaati.

⁴⁴ Moaabi huneemmo barri daanni noona, waajje xooqannohu balete uwanno; balete giddonni fule xooqannoha woshshaado amaddanno.

⁴⁵ Xooqqanni daafurtinori Hasebooni caa'litara hasidhanno. Hasebooni Katami kayinni giiramanno; giirano hakkiinni fulte Moaabita gaaraame gobba ittanno.

⁴⁶ Moaabi gosa, ki'nera aanne'e! Kamooshi maganira kumbuultannori baalu gooffino; oosonsa seennunna labballu qafadantanno.

⁴⁷ Ikkollana Moaabira adhinoonnisire baala qoleemmo yanna dagganno. Moaabi daafira kuloommo himani konneeti. Konne coye coyi'roommohuno ani Kaaliiqaati» yii.