ERMIYAASI 46 - Qullaawa Maxaafa

GIBITSE KARKEMIISHI KATAMIRA QEELANTU

¹ Daga baalate daafira Kaaliiqi anera coyi'rinoe.

² Gibitsete daafira: Iyoaaqeemi Yihudaho moohihunni shoolki diro, Baabilooni moote Nabukadanatsoori Gibitsete mooteta Nikau olanto Karkemiishi yinannihu Efiraaxisi Wayi mule hee'ranno katamira qeeli. Kunnira Kaaliiqi Gibitsete olantora:

³ «Wonqo'ne qixxeessidhine, olaho fulle.

⁴ Ki'ne faradaasine! Faradi'nera bixaala qassine, umoho siwiilu gullee wodhitine, darga darga'ne amadde. Bagado'ne gamaxidhine, olu imaanano uddidhe yite kulinsa» yiie.

⁵ Qoleno, «Kune anera kayinni qeelantinanniti leeltanni nooe; waajjitine badhera gugattinanni heedhinoonni; waajjillu doyisse amade noo'ne.

⁶ Ki'ne jawaatootaho; rakkine doddinannireeti. Ikkollana xooqqine difultinoonni; Efiraaxisi Wayi mule qeelantinoonni.

⁷ «Abbayi Wayi dambali gede ka'annotinna, wo'me qacce gudise amadanno wayi gede, ikkitino gosa tini hiittenneeti?

⁸ Abbayi Wayi dambali gede ka'annotinna, wo'me qacce baala amadanno wayi gedeeti Gibitsete. Tini gosa, ‹Kae baatto baala egemmeemma; katammanna giddo noo manna baala gundeemmo› yitino.

⁹ «Faradu alba hige ha'ranno gede, faradi gaareno waajjinanni garinni doddanno gede hajajje. Itiyophiyunninna Liibiyunni wonqo amaxxe dayino manni, maxxa amaxxe Liidiyunni dayinohu wolqaataamu manni ledo, jawaata olamaano sokke» yaanno.

¹⁰ Hakku barri, ani Olantote Mootichi Kaaliiqi diina'ya rabbisi'reemmo barraati; bise mundee agge goo'ro fulta geeshsha, lowo manna shakki assitanno. Ani Olantote Mootichi Kaaliiqi, aliyyeenni Efiraaxisi Wayi mule noo manna, kakkalamanno gede asseemmo.

¹¹ Seemo beetto lawattati Gibitse, xaggakki kaa'litannori dinoote; hursannoherino dinona, Geleaadi marte buudhinanni xagicho hasi'ri.

¹² Gosa baala saalakki affino; baatto baalate wi'lakki macciishshinoonni; olantokki insanaawa sarraaqante, mimmito haadhe ubbanno.

NABUKADANATSOORI GIBITSE DAYI

¹³ Baabilooni moote Nabukadanatsoori daye Gibitsete bala tugannota Kaaliiqi kulannie,

¹⁴ «Gibitsete katammara Migidoolira, Memfiisiranna Xafinaasira, ‹Baalanka bagadu guda'neraatina, umo'ne gargadhate qixxaabbe› yiiyye.

¹⁵ Worbu magani'ne, woraamu Apiisi mayira uwi? Ani Kaaliiqi xiiwe tugeennaatiwe!

¹⁶ Bagadaano'ne sarraaqante, mimmitu aana ubbanni, ‹Ka'e diinu bagadiwiinni xoonqe, gobbanke ha'ne manninke ledo xaandona› yitanno.

¹⁷ «Hakkiira marte Gibitsete moote Feriooni, ‹Afuu Callu› yite haaro su'ma fushshitannosi.

¹⁸ Ani Olantote Mootichi Kaaliiqi, mootete; qoleno ani Heeshshote Maganooti. Taaboori Ilaali ilaalla baalate aliidiha ikkinonte gede, Qermeloosi Ilaalino baaraho iimaanni noonte gede, ki'nera aleenni higinohu wolqaataamu daanno.

¹⁹ Ki'ne Gibitsete gosa, qafadantinaraatina uduunne'ne usudhe; Memfiisi Katamino diigame mulla darga ikkanno.

²⁰ Gibitse biiffino adde gedeete; ikkollana aliyyenni daanno torondi qasannose.

²¹ Kiranyootu olantoseno maqallanni hee'noonni middo gedeete; ikkollana badhe higge xooqqanno. Yoonnihunna baote barri iillinonsa daafira, uurrite olama didandiitanno.

²² Diinu olanto wolqissanni hadhu bikkinni, Gibitse xooqanni noo hamashshi gede xiixxanno. Dubbo dollannihu gede, meesane adhite daggannonsa.

²³ Diininsa kiirre dandiinannikkiha, kanchafaru gede bati'rinoha ikkino daafira, ulma dubbo ikkiturono, dolte shakki assitannonsa. Konne coye coyi'roommohu ani Kaaliiqaati.

²⁴ Gibitsete gobba aliyye manni qeeleenna saalfattanno; konne coye coyi'roommohu ani Kaaliiqaati» yaanno.

²⁵ Israeelete Magani Olantote Mootichi Kaaliiqi, «Ani Tebisiha kaphu magano Amooninna, woloota Gibitsete maganna, mootensanna roorrootansa hexxitannore baala, qorichisheemmo.

²⁶ Shitansara hasidhannorira Baabilooni moote Nabukadanatsooriranna olantosira sayise eemmo; ikkollana gedensaanni Gibitsete baatto mannu hee'rannota ikkitanno. Konne coye coyi'roommohu ani Kaaliiqaati» yii.

MAGANU MANNASI GATISANNO

²⁷ «Borojjichi'ya Yaiqoobi ooso waajjitinoonte; Israeelete manna massinoonte; qafadantinoonniwiinni fafo gobbanni gatise fushsheemmo'ne. Hakkunni gedensaanni waajjishanno'neri nookkiha, keere heedhinanni.

²⁸ Soqqamaano'ya Israeele, ani ledo'ne noommona waajjitinoonte. Giddonsa billaallisummo'ne gosa baala huneemmo; ki'ne higginara yee taalo qoricha eemmo'ne; kayinnilla co'o asse digudeemmo'ne. Konne coye coyi'roommohu ani Kaaliiqaati» yii.