ERMIYAASI 38 - Qullaawa Maxaafa

ERMIYAASI BALETE GIDDO TUNGI

¹ Maataani beetti Shefaaxiya, Pashihuuri beetti Gedaaliya, Shelemiya beetti Yehukaalinna, Malkiya beetti Pashihuuri Kaaliiqi kulinoe coye mannaho rosiisoommota macciishshitu.

² Anino, «Kaaliiqi, ‹Katamu giddo gatannoha baala bagadu, hudenna dhibbu gudanno; ha're Baabiloonootaho anga aannohu kayinni direyanno; lubbosino reyotenni gatisi'ranno› yiino» yoommo.

³ Qoleno, «Kaaliiqi, ‹Konne katama Baabilooni olantora sayise eemmo; insano katama amaddanno› yiino» yoommo.

⁴ Hakkunni gedensaanni gashshaano mootenniwa marte, «Kunni coyinni katamaho noo olantora wolqa hunanni no. Katamu giddo noo mannano togo assanni no. Mannaho bao agurranna mittono dancha coye halchannokki daafira, kuni manchi reya hasiissannosi» yitu.

⁵ Moote Sedeqiyaasino, «Ani dihanqeemmo'nena baxxini gede asse» yii.

⁶ Hakkunni gedensaanni, ane haadhe massite, mootete mine nootera mootete beetti Malkiya bale wayinnite giddora siiwotenni usurte dirrissue. Balete giddono sabba ikkinnina wayi dino; anino sabbaho lixummo.

⁷ Mootete mine soqqamannohu Itiyophiyu manchi Ebedimeleki balete tugginoeta macciishshi. Hatte yannara moote Biiniyaami Waalchira ofolle mannaho coye afanni no.

⁸ Ebedimelekino mootete mininni fule mare mootete,

⁹ «Moote mooticha'ya! Kuni manni himanaancho Ermiyaasi balete tuge lowo sao assino. Katamaho sagale nookki daafira hudetenni reyanni no» yii.

¹⁰ Mooteno Ebedimelekira, «Kawiinni 3 manna haadhe marte, Ermiyaasi reyikkinni balete giddonni fushshi» yee hajajisi.

¹¹ Ebedimeleki manna anga haa're mare, uduunnu mininni haa'rinoha akkala hocco siiwote aana xaaxe noommowa balete giddora dirrisi.

¹² Siiwo ittannoekki gede akkala hocco kikki'late wodheemmo gede kulie; anino yiino gede assi'roommo.

¹³ Insano balete giddonni siiwotenni goshooshshe fushshite, mootete mine agartannori heedhannowa keeshsheemmo gede assitinoe.

SEDEQIYAASI ERMIYAASI MALA XA'MI'RI

¹⁴ Moote Sedeqiyaasi manna soye woshshe"e, Qullaawa Mine sayikki waalchi mule hee'reenna, «Mitto coye xa'mammoheraatina, maaxittokkinni kulie» yiie.

¹⁵ Anino daware, «Halaale kulummohero shaattoe. Amaalummoherono dimacciishshattoe» yoommosi.

¹⁶ Moote Sedeqiyaasino, «Ani sheemmohekki gedenna shitannoherirano sayise eemmohekki gede, lubbo kalaqinonke Kaaliiqi su'minni xaareemmo» yee hashaashe kulinoe.

¹⁷ Hakkunni gedensaanni ani Sedeqiyaasira, «Israeelete Magani Olantote Mootichi Kaaliiqi, ‹Baabilooni moote roorrootira anga uyittoro atino gatatto; kuni katamino digiiramanno; atinna minikki manni baalu gattinanni.

¹⁸ Insara anga aa giwittoro kayinni, Baabiloonootu konne katama amadde giira qassanno; atino digatatto› yiino» yoommosi.

¹⁹ Moote Sedeqiyaasi qole, «Ani ninke gibbe Baabiloonootunniwa e'inore waajjeemmo. Baabiloonootu insara sayisse uyituero gawajjitannoe yee yaadoommo» yiie.

²⁰ Anino, «Sayisse diuyitannohena, kuleemmoheha Kaaliiqi yiino coye calla macciishshi; hakkunni gedensaanni qinaannohe; lubbokkino gattanno.

²¹ Insara anga aattokkiha ikkiro kayinni, Kaaliiqi anera ajuujatenni leellishinoeri no.

²² Kune, Yihudu moote mine gatino meento baala Baabilooni roorrootiwa haa'ne ha'nanni woyite, ‹Hexxoottoti jaallakki dogginohe; atera roorrensa leellishshinohe; xa kune sabbu amadinohe daafira, hakkuri hexxoottori jaallakki agurte hadhinohe› » yaanno.

²³ Qoleno, «Meento'nenna ooso'ne baala Baabiloonootunniwa haa'ne ha'nanni; atino insa anganni digatatto; Baabilooni mooteno amade usuranya assannohe; kuni katamino giiramanno» yoommo.

²⁴ Sedeqiyaasino daware, «Hee'ra hasi'rittoro konne coye ayerano cuqqi yitooti.

²⁵ Roorrootu ane ledo hasaawoottota affuro, hasaamboommore affara xa'mitannohe. Qolteno, ‹Moote xa'meennahe kuloottosire maaxittonkero, shineemmohe› yitannohena,

²⁶ ati kayinni, ‹Reemmona galagalchite Yoonaataani miniralla qoltootie› yee moote huucci'roommo yiinsa» yiie.

²⁷ Hakkunni gedensaanni roorrootu baalunku dagge xa'mitue; anino moote yii yiinoeta yoommonsa. Mootete ledo hasaambummore macciishshinohu nookki daafira ledde dixa'mitinoe.

²⁸ Anino Yerusaalame amadantu barri geeshsha mootete mini agaraasine heedhannowa usurame keeshshoommo.