ERMIYAASI 37 - Qullaawa Maxaafa

SEDEQIYAASI ERMIYAASI XA'MINO XA'MO

¹ Baabilooni moote Nabukadanatsoori Iyoaaqeemi hoole dargasi Iyosiyaasi beetto Sedeqiyaasi Yihudaho moohisi.

² Sedeqiyaasino ikko ledosi gashshaano woy gobbasi manni Kaaliiqi ane widoonni coyi'rino qaale dimacciishshitino.

³ Moote Sedeqiyaasi kayinni, «Maganonke Kaaliiqa huuccinke» yee Shelemiya beetto Yehukaalinna qeesicha Maiseya beetto Soffooniyaasi anewa soyi.

⁴ Hatte yannara usuru minira eessitinoekki daafira, mannu mereero ha'ramanni noommo.

⁵ Baabilooni olanto Yerusaalame doyissite heedhe, Gibitsete olanto dannansa tayisse sa'e dagganni noota macciishshite agurte badhera higgu.

⁶ Hakkunni gedensaanni Kaaliiqi,

⁷ «Israeelete Magani Kaaliiqi, ane huuccattoe gede manna soyihehura Yihudu mootera, ‹Kaa'litahera dagginoti Gibitsete olanto galagalte gobbansa higganno.

⁸ Hakkunni gedensaanni Baabiloonootu galagalte higge konne katama qasse amadde, aanaho giira qassanno.

⁹ « ‹Baabiloonootu galagalte daggara noona, agurte hadhinoha laweenna'ne dogantinannikki gede ani Kaaliiqi kuloommo'ne.

¹⁰ Baabiloonoota qeeltinanniha ikkiro nafa, madidhe dukkanu giddo goxxinori galagalte wolqa assidhe katama giirte huntanno› yiino yite kulisi» yiie.

ERMIYAASI AMANDE USURRI

¹¹ Hatte yannara Baabilooni olanto, Gibitsete olanto dagganni noota macciishshite Yerusaalame agurte badhera higge hadhe no.

¹² Anino ayiddi'yawiinni iillannoe iqqa adhammora Yerusaalametenni Biiniyaami gobba ha'rammora kaummo.

¹³ Biiniyaami waalcho iillanni hee'reennanni, agaraasinete roorrichi Hanaaniya beetti Shelemiya ilinohu Yiriya, «Baabiloonootunniwa fulte ba'anni nootto!» yee amadie.

¹⁴ Anino, «Dee'ni, ati yaatto gede ani Baabiloonootunniwa ba"anni noommoha di"ikkoommo» yoommo. Isi kayinni ani yoommota macciishsha giwe amade masse gashshaanote uyinoe.

¹⁵ Roorrootuno hanqite gansiissuehu gedensaanni, usuru mine assidhinohura borreessaanchu Yoonaataani minira eessite cuffue.

¹⁶ Hakkiichono baattote woroonni seekkinoonni darga lowo yanna usurame keeshshoommo.

¹⁷ Shiima yanna gedensaanni moote Sedeqiyaasi soye woshshiishe, «Kaaliiqi kulinohe coyi nooni?» yee calli'ya hee'reenna xa'mie. Anino, «Ee no» yee dawarummosihu gedensaanni lede, «Ati Baabilooni moote angara eatto» yoommosi.

¹⁸ Qoleno, «Ane usuru mine tugginiehu atera, woy ledokki gashshaanora woy mannikkira ma asseenna'neeti?

¹⁹ ‹Baabilooni moote ateranna gobbakkira bala dituganno› yite himantu himanaano hanni xa hiikko no?

²⁰ Moote mooticha'ya! Yeemmore macciishshattoe gedenna huucci'reemmore wonshattoe gede eegameemmohe. Ballo eeggatena usurranniwa hakka Yoonaataani minira sokkootie; hakkiira soyittoero reemmo» yoommo.

²¹ Kunnira, moote Sedeqiyaasi mootete mine agaraasinete mini giddo cunfannie gede hajajinoe; anino hakkiicho keeshshoommo. Katamu giddo intanniri horo hooga geeshsha barru barrunkunni tima diho'linoonnie.