ERMIYAASI 36 - Qullaawa Maxaafa

BAAROOKI ERMIYAASI KULANNA BORREESSINORE QULLAAWU MINI GIDDO NABBAWI

¹ Iyosiyaasi beetti Iyoaaqeemi Yihudaho moohihunni shoolki diro, Kaaliiqi ane Ermiyaasira,

² «Ani Kaaliiqi ate hasaawisummohehunni Iyosiyaasi moohi yannanni kayise techo geeshsha Israeelete, Yihudu manniranna wole gosa daafira coyi'roommo qaale xaanxoonni gogi aana borreessi.

³ Yihudu manni aanansa abbeemmo yoommo bao macciishshe miteekke higannoha ikkiro, anino saonsanna cubbonsa agureemmonsaha ikkanno» yiie.

⁴ Ani Ermiyaasino Neeriya beetto Baarooki woshsheenna, Kaaliiqi coyi'rinoere baala ani kulanna xaanxoonni gogi aana borreessi.

⁵ Hakkunni gedensaanni ani Baarookira, «Kunni ka'a Qullaawu Minira ea diuyinannie.

⁶ Ati kayinni Qullaawu Minira marte kulannahe borreessittoha Kaaliiqi qaale ita aga agure huucci'ranni noo mannira nabbawinsa. Yihudu katamma baalatenni dayino manni macciishshanna nabbawi.

⁷ Kaaliiqi lowo geeshsha aarame hanqe gudara kaino daafira, mannu baalunku miteekke gaabbe bunshesiwiinni hige Kaaliiqira eegamannoha ikkannona» yee hajajoommo.

⁸ Baarookino hajajoommosi garinni Kaaliiqi qaale Qullaawu Mini giddo nabbawi.

⁹ Iyosiyaasi beetti Iyoaaqeemi Yihudaho moohihunni ontikki diro honsikki aganira, Yerusaalamete hee'rannohunna Yihudu katammanni dayino manni baalu Kaaliiqi maaro afi'rate ita aga agure huucci'ri.

¹⁰ Mannu baalunku macciishshanna, Baarooki ani kulanna xaanxoonni gogira borreessino qaale nabbawi. Nabbawinohuno mootete mini borreessaanchi Saafaani beetti Gemaariya holgi widoonni hige saeeti. Kuni holgi noohuno Qullaawu Minira massannohu haaru huxxi waalchi mule aliidi nafari widoonniiti.

XAANXOONNI GOGIRA BORREESSINOONNI QAALE MOOTETE MINI ROORROOTIRA NABBAWI

¹¹ Gemaariya beetti Mikaya Kaaliiqi qaale Baarooki nabbawanna macciishshi.

¹² Mikayano mootete mini borreessaanchi holgira ei. Eeanno woyiteno, borreessaanchu Elishamai, Shamaiya beetti Delaya, Akiboori beetti Elinaataani, Saafaani beetti Gemaariya, Hanaaniya beetti Sedeqiyaasinna wolootu gashshaanono hakkiicho ofolte no.

¹³ Mikayano Baarooki mannaho nabbawanna macciishshino qaale baala kulinsa.

¹⁴ Gashshaanono, Baarooki mannaho nabbawinoha xaanxoonni gogira borreessinoonni qaale haa're abbanno gede, Yihuda sokku. (Yihudu Netaaniyaho, Netaaniya Shelemiyaho, Shelemiya Kuushiho). Baarookino borronniha xaanxoonni goga haa're abbi.

¹⁵ Insano, «Hanni ofolte, angakki noo qaale macciishshineemmona nabbawinke» yitusi. Baarookino nabbawinsa.

¹⁶ Nabbawe kaihu gedensaanni, waajjite mimmitonsa la'anni Baarooki, «Konne coye mootete kula hasiissannonke» yitusi.

¹⁷ Hakkunni gedensaanni, «Konne baala hiitto assite borreessoottoro kulinke. Ermiyaasi kulannahe borreessootto?» yite xa'mitusi.

¹⁸ Baarookino, «Ee, mitto mittonka qaale isi kulannae ani xaanxoonni gogi aana kuulunni borreessoommo» yee dawarinsa.

¹⁹ Gashshaanono Baarooki, «Atinna Ermiyaasi hadhine maaxamme; heedhinoonniwa ayerano kultinoonte» yitusi.

MOOTE XAANXOONNIHA BORROTE GOGA GIIRI

²⁰ Gashshaanono xaanxoonniha borrote goga massite borreessaanchu Elishamai holge worte, macciishshitino coye baala marte mootete kultu.

²¹ Mooteno hakkonne xaanxoonni goga mare abbanno gede Yihuda soyi. Isino borreessaanchu Elishamai holge worroonniha xaanxoonni goga haa're abbe, mootetenna mulesi uurrite noo gashshaanora nabbawi.

²² Hatti yanna hawado ikkitino daafira, moote mootete mine giira giirranniwa ofolle no.

²³ Yihudu 3 woy 4 gafa nabbawi kiironni, moote nabbambisi geeshsha shiimu billawinni mure giirate tugi. Togo assanni xaanxoonniha borrote goga giire huni.

²⁴ Mooteno ikko ledosi noo gashshaano konne qaale macciishshite horonta diwaajjitino; dadillitinota egensiisate imaanansano didartino.

²⁵ Elinaataani, Delayanna Gemaariya moote xaanxoonni goga giire hunannokki gede huuccitusi. Isi kayinni insa yitinota dimacciishshino.

²⁶ Hakkunni gedensaanni, moote beettosi Yirahime"eeli, Azirieeli beetti Serayinna Abidieeli beetti Shelemiya ledo ane Ermiyaasinna borreessaancho'ya Baarooki amaddanno gede hajaji. Kaaliiqi kayinni affannonkekki gede assi.

ERMIYAASI KULANNA BAAROOKI LAYINKIMEESHSHO BORREESSINO QAALE

²⁷ Moote Iyoaaqeemi ani kulanna Baarooki borreessinoha xaanxoonni goga giire hunihu gedensaanni Kaaliiqi,

²⁸ wole xaanxoonni goga haa're moote Iyoaaqeemi giire hunihu aana noo qaale layinkimeeshsho borreesseemmo gede kulie.

²⁹ Moote Iyoaaqeemirano, «Kaaliiqi, ‹Baabilooni moote daye tenne baattonna aanase nooha mannanna saada gudeemmo yiino yitanni mayira borreessootto?› yite xaanxoonni goga giirte hunootto.

³⁰ Kunnira, ate Yihudu mootera Iyoaaqeemira Kaaliiqi, ‹Sirchikki giddonni Daawitiha ayirrinyu barcima ragi'rannohu dihee'ranno. Reeshshakkino mullawa tungeenna barra arrishshote, hashsha qorraho hagamanno.

³¹ Cubbi'ne daafira ate, sirchokkinna ledokki gashshaano qorichisheemmo. Ani yoommota macciishsha gibbinoonni daafira, ki'nera, Yerusaalametenna Yihudaho hee'ranno manni baalaho hedoommo bao haa're abbeemmo› yiino yite kulisi» yiie.

³² Anino wole xaanxoonni goga haa're, borreessaanchu Baarookira oommo. Isino Yihudu moote Iyoaaqeemi giire hunihu aana noo qaale borreessi; mimmito lawannohu lowo qaali aanaho ledami.