ERMIYAASI 35 - Qullaawa Maxaafa

REKAABOOTUWIINNI ADHINANNI ROSO

¹ Iyosiyaasi beetti Iyoaaqeemi Yihudaho moohi waro Kaaliiqi ane Ermiyaasira,

² «Rekaabootu ayiddira marte, Kaaliiqi Mini holguwa giddonni mittu giddora eessite aggannota woyinete xajje uyinsa» yiie.

³ Anino, (Wolu Ermiyaasi ilinohunniha Habazaaniya beetto) Azaaniya, roduuwisinna oososi baalate ledo haa're abboommo.

⁴ Insano Kaaliiqi minira Maganu manchi Agidaaliya beetti Hanaani rosaano holgira haa're massoommo. Hakku holgino roorrootu holginni aane waalcho agarannohu Shaluumi beetti Maiseya holgira aleenni hige nooho.

⁵ Ani woyinete xajje wonshinoonni maaqquwanna finiinna albansaanni wore, «Hanni tenne woyinete xajje agge» yoommonsa.

⁶ Insa kayinni, «Ninke woyinete xajje diangeemmo. Rekaabi ilinohu anninke Iyonaadaabi ninkenna oosonke woyinete xajje angeemmokki gede hoolinonke.

⁷ Mine mi'nineemmokki gede, baatto loosi'neemmokki gede hattono woyinete kaashsho kaasi'neemmokki gede kulinonke; dukkana qasidhine heedhe. Hatto ikkiro, tenne xeeda galtinanni gobbara seeda diro heedhinanni.

⁸ Ninkeno anninke Iyonaadaabi hajajinonkere wonshinoommo. Ninke, meentinke, labballunna seennu oosonkeno woyinete xajje diangoommo.

⁹ Galleemmo mine dimi'ninoommo; woyine kaasi'nanniwinna gide loosi'nanniwi dinonke.

¹⁰ Dukkanu giddo hee'nanni anninke hajajinonkere baala wonshinoommo.

¹¹ Ikkollana Baabilooni moote Nabukadanatsoori daye tenne gobba amadi yannara, Baabilooninna Sooriyu olantowiinni xoonqe Yerusaalame daate hendoommo. Kunnira, kune dange Yerusaalamete hee'noommo» yitu.

^12-13 Israeelete Magani Olantote Mootichi Kaaliiqi ane Ermiyaasira, hadhe Yihudu manniranna Yerusaalamete heedhannorira, «Ki'ne ani yoommota macciishshitine hajajama mayira gibbinanni?

¹⁴ Iyonaadaabi ilama nafa woyinete xajje aggannokki gede anninsa hajajinonsare agadhite woyinete xajje diaggino. Ki'ne kayinni ani marro marro hige kuloommo'nere diagadhitinoonni.

¹⁵ Qoleno, ki'ne mittu mittunku busha doogo'nenni higgine dancha coye assitinanni gede, soqqamaano'ya himanaano marro marro hige soommo. Insano wole maganna hoode hadhine magansidhinannikki gede qorophisiissino'ne. Ki'neranna annuwa'nera oommo baattora heedhinanni gede kultino'ne. Ki'ne kayinni yoommo coye macciishshatenna haja assate dihasidhinoonni.

¹⁶ Rekaabi beetti Iyonaadaabi sirchi anninsa hajajinonsa hajajo wonshitinona, ki'ne manni'ya kayinni anera dihajajantinoonnie.

¹⁷ Kunnira, ani Israeelete Magani Olantote Mootichi Kaaliiqi, kuneeti abbeemmo yoommoha busha coye Yihudunna Yerusaalamete manni aana abbeemmo. Konne asseemmohu kuloommo'nere macciishshanna, woshsheennano yee yaa gibbinoonnihuraati» yii.

¹⁸ Hakkunni gedensaanni ani Ermiyaasi Rekaabootaho, « ‹Israeelete Magani Olantote Mootichi Kaaliiqi, anni'ne Iyonaadaabi uyino'ne hajajo wonshitinoonni. Rosiisino'nere baala assitinoonni; kulino'ne seera baala agadhitinoonni.

¹⁹ Kunnira, Israeelete Magani Olantote Mootichi Kaaliiqi anera soqqamannohu, Rekaabi beetti Iyonaadaabi sirchi giddonni hegere geeshsha dihooganno› yiino» yee kuloommonsa.