ERMIYAASI 33 - Qullaawa Maxaafa

GOBBANSA HIGGANNO GEDE ISRAEELETE UYINOONNI HEXXO

¹ Ani Ermiyaasi usurame hee'reenna Kaaliiqi layinkimeeshsho,

² «Baatto kalaqoommohunna dargase ofoshshiishoommohu aneeti. Su'mi'ya Mooticha Kaaliiqaatina,

³ woshshi'rie; anino yee yeemmohena; affe egennoottokkiha jawanna maala'linanni coye leellisheemmohe.

⁴ Doyisse amadatenninna olunni Yerusaalamete minnanna Yihudunnihu mootete mini diigamanno. Konne coye coyi'roommohu ani Israeelete Magani Kaaliiqaati.

⁵ Bunshensanni kainohunni ani badhe wodheemmonsa. Hanqi'yanninna aari'yanni kainohunni Baabiloonootu reeshshansa minna wonshitanno gede asseemmo.

⁶ Ikkollana konne katamanna giddo noo manna hurseemmo; ani manni'yara fayyimma qoleemmo; lowo keerenna harshammo eemmonsa.

⁷ Yihudunna Israeelete manna qafadotewiinni qoleemmo; albi gede asseno uurriseemmonsa.

⁸ Anera hajajama gibbe loossino cubbiwiinni keereenseemmonsa. Haxawarrimmansanni kainohunni assitino sao agureemmonsa.

⁹ Hatte yannara, Yerusaalamete mannira asseemmoha dancha coye baala macciishshitanno gosa albaanni hagiirsiissannoe; ayirrinyenna galatano uyitannoe. Baattote aana noo gosa baala Yerusaalamete mannira asseemmoha dancha coyenna eemmonsa jiro affe waajjite qece yite huxidhanno» yii.

¹⁰ Kaaliiqi, «Ermiyaasi! Mannu, ‹Tini baatto mannunna saada heedhannokki onaati› yiinoti garaho; xa Yihudu katammanna Yerusaalamete doogga ontino; mannuno saadano dino. Ikkollana mitto barra,

¹¹ ani Kaaliiqi tenne baatto albi gede jironnita asseenna mannu Mini'yara galatu fushshaate haa're abbanni, hagiirrunninna qeexaalunni, adhatenna adhamate hagiirrira faarsinanni garinni, ‹Isi shaqqadoho; bagamannokkihu baxillisi hegerehona, Olantote Mooticha Kaaliiqa galatte› yaanni naggi yitino qoonqonni faarsanno» yii.

¹² Olantote Mootichi Kaaliiqi, «Tini mannunna saada heedhannokkita ona ikkitino baatto mitto barra allaalaasine saadansa allaa'litanno darga ikkitanno.

¹³ Gaaraame gobba, gaarrate lekkaalloonninna Yihudaho wodiidoonni noo katamma, Biiniyaami gobbara Yerusaalamete gaangaawira noo qachuwanna Yihudunniti shiimmaadda katamma galagalte saada towaxxinanniwa ikkitanno. Konne coye coyi'roommohu ani Kaaliiqaati» yii.

¹⁴ Kaaliiqi, «Israeeletenna Yihudu mannira oommota dancha hexxo wonsheemmo barri daanni no.

¹⁵ Hakka waro, Daawiti sircho ikkinoha, keeraancho moote dooreemmo; isino baattote aana halaalunni taashshe gashshanno.

¹⁶ Hatte yannara Yihudu gatanno; Yerusaalameno fooliishshidhe keere heedhanno; katamu su'mano, ‹Kaaliiqi Keeraanchimmankeeti› yinanni.

¹⁷ Daawiti sirchinni Israeelete moohannohu hoogannokki gede ani Kaaliiqi coyi'roommo.

¹⁸ Hattono shilqonnita, gidunnitanna wole kakkalo shiqishatenni soqqantannoe qeesootino Leewi sirchi giddo dihoogganno» yii.

¹⁹ Kaaliiqi anera,

²⁰ «Ani Kaaliiqi hashshunna barru yanna yannasira daanno gede gondooro oommo; kuni gondoorino horonta didiigamannoho.

²¹ Kunni garinni soqqamaanchi'ya Daawiti sirchinni moote ikkanno manchi hoogannokki gedenna Leewi sirchinnino qeesimmatenni soqqamannoehu hoogannokki gede gondooro oommo; kuri giddonnino diigamanno gondoori dihee'ranno.

²² Soqqamaanchi'ya Daawiti sirchonna Leewi sircho ikkitino qeesoota batiseemmo; batinyinsano gordu beeddahenna baaru shaafi gede kiirre anfannikkiha ikkanno» yiie.

²³ Kaaliiqi lede,

²⁴ «Mannu, ‹Kaaliiqi doorinonsare lamenka mine Israeelenna Yihuda agurinonsa; gosate gede dikiirrannireeti› yee manna'ya mishinota diafootto?

²⁵ Ani Kaaliiqi kayinni hashshunna barru ledo gondooro e"e, gordohonna baattote ikkanno seera oommo.

²⁶ Hattonni Yaiqoobi sirchinna soqqamaanchi'ya Daawiti ledo eoommo gondooro wonsheemmo. Abirihaami, Yisihaaqinna Yaiqoobi sirchi aana moohannoha Daawiti sirchinni dooreemmo. Manna'ya galagalche marare qawaaxxi're hee'ranno gede asseemmo» yii.