ERMIYAASI 32 - Qullaawa Maxaafa

ERMIYAASI BAATTO HIDHI

¹ Yihudu moote Sedeqiyaasi moohihunni tonnikki diro, Baabilooni moote Nabukadanatsoori moohihunnino tonaa settikki diro, Kaaliiqi ane Ermiyaasira coyi'rie.

² Hatte yannara Baabilooni moote olanto Yerusaalamete bala tuggara doyissite no. Anino Yihudu moote mine noohura usuru mine usurame noommo.

³ Moote Sedeqiyaasi ane usuranya assinoehunna bushiishinoehu Kaaliiqi kulinoe himana, « ‹Baabilooni moote konne katama wolqatenni amadanno gede fajjammosiraati.

⁴ Moote Sedeqiyaasi gatanno gari dinosi; Baabilooni moote angara eanno; mootenniwano shiqe albasiinni uurre isi ledo hasaawanno.

⁵ Sedeqiyaasi Baabilooni haa'ne ha'nanni; hedoommore wonshammo geeshsha hakkiicho hee'ranno. Baabilooni moote ledo olamara hedirono diqinaannosi. Konne coye coyi'roommohu ani Kaaliiqaati› yiino» yee kuloommosi daafiraati.

⁶ Usuru mine hee'reennanni Kaaliiqi galagale,

⁷ «Rodiikki Hanaamieeli wosiilikki Shaluumi beetti Biiniyaami gobbara Anatooti noota loosi'nanni baatto hidhatto gede xa'mahera atewa daanni no. Ati isira gamba yootto fiixa ikkootto daafira, tenne baatto hidha hasiissannohe» yiie.

⁸ Kaaliiqi coyi'rinonte gede Hanaamieeli ani usurame noommowa daye, «Ayiddinke giddonni hidhate hasiisinohehu ate ikkootto daafira, baatto'ya ati hidhi» yiie. Kunninni kainohunni coyi'rinoehu Kaaliiqa ikkinota buuxummo.

⁹ Anino Hanaamieeliwiinni baatto hidhummo; 200 giraame ikkanno birra keene uummosi.

¹⁰ Sheemaatu woraqata malaatise haphaayyotenni qa'misummo; birrano mannu albaanni keene uummosi.

¹¹ Hakkunni gedensaanni, qa'minsoonnitanna qa'minsoonnikkita hirate sheemaati borro haa're,

¹² Mahiseya beetti Neeriya ilinohura Baarookira oommo. Tenne borro oommohuno, Hanaamieeli hirate sheemaatira naqaashshe ikkitinorinna gudumaaleho ofolle noo manni baalunku albaanniiti.

¹³ Kunni manni albaanni Baarookira,

¹⁴ «Israeelete Magani Olantote Mootichi Kaaliiqi, ‹Haphaayyotenni qa'minsoonnitanna fano noo borro haadhe bushshu uduunnichi giddo worte lowo yanna hee'ranno gede assi.›

¹⁵ Ani Israeelete Magani Olantote Mootichi Kaaliiqi, mannu tenne baattora mine, loosi'nanni baattonna woyine kaasi'nanni baatto hidhanno barri daanno yiino» yoommo.

ERMIYAASI KAALIIQIRA COYI'RINO COYE

¹⁶ Baarookira sheemaatu borro uummohu gedensaanni, Kaaliiqira,

¹⁷ «Kaaliiqa Mooticha'ya! Ati jawa wolqakkinninna jawaata cigilekkinni gordonna baatto kalaqootto; ati dandaattokkiri horonta dino.

¹⁸ Bagamannokkiha baxillekki lowo kumi mannira leellishootto. Ikkollana, annuwa loossino cubbira oosonsa qorichishatto. Ati jawahonna wolqaataamo Maganooti; ati Olantote Mooticha Kaaliiqaati.

¹⁹ Hedokki jawate; loosikkino wolqaataamoho; ninke assineemmori mitturino digo'lannohe; baalunkura loosisi garinni aatto.

²⁰ Bi're alba Gibitsete baattora dhaggenna maalale loosootto; techo geeshshano hattenne maalale Israeeletenna wole gosa mereero loosa diagurootto. Kunninni kainohunni su'mikki gobba baalate egennamino.

²¹ Maalaletenninna dhaggetenni, jawaata angakkinninna wolqaataame cigilekkinni, qoleno waajjishannohu xirchikkinni mannakki Israeele Gibitsete gobbanni fushshootto.

²² Akaakkansara ootto hexxo garinni, tenne danchanna shaqqado adonna malawu lolahanno baatto ragisiisoottonsa.

²³ Insa kayinni dagge tenne baatto ragidhuhu gedensaanni, atera hajajamanna seerakki agadha gibbino. Hajajoottonsareno diwonshitino; konne busha coye baala abboottonsahu kunni daafiraati.

²⁴ «Kune, Baabiloonootu katama amaddara gaangaawaho bushsha duunte doyissite no; bagadu, hudenna dhibbu katama angansara eanno gede assanno. Atino coyi'roottori baalu ikkanna la"atto.

²⁵ Ati Kaaliiqa Mooticha'ya! Katamu Baabiloonootu angara eanni hee'reenna mannu albaanni baatto hidheemmo gede assoottoehu ateeti» yee coyi'roommo.

KAALIIQI QOLINO DAWARO

²⁶ Kaaliiqino anera,

²⁷ «Mannu baalu Magani ani Kaaliiqaati; ani dandeemmokkiri horonta dino.

²⁸ Kunnira ani Kaaliiqi konne katama Baabiloonootunna mootensa Nabukadanatsoori amaddanno gede sayise insara eemmo.

²⁹ Insano konne katama amadde giira qassanno. Manni'ya ane hanqisara minu iima Ba"aalira hixaana giirannowanna wole magannara agattote fushshaate shiqishanno dargi ledo mitteenni giiramanno.

³⁰ Israeelennihunna Yihudu manni bi're hundinni kayise bunshe ikkinnina danchumma asse diegennino; assitino coyinni ane hanqissinoe.

³¹ Kuni katami xintaminkunni kayise techo geeshsha giddosi hee'ranno manni hanqise aarsinoe daafira, katama hunate murci'roommo.

³² Togo asseemmohuno Israeelennihunna Yihudu manni, mootoollansa, roorrootinsa, qeesootinsanna himanaanonsa loossino bunshe daafiraati.

³³ Insa anera badhe wodhitinoe; marro marro hige rosiiseennansano dimacciishshitino; diseejjantino.

³⁴ Ane magansi'rate minnoonni Mini giddo tiyyi'nanni maganna worte batteessitino.

³⁵ Labballonna seenne oosonsa Molooki yinanni maganira kakkaltara Hinoomi Lagichira Ba"aalira kakkalote darga seekkitino. Ani togo asse diyoommonsa; togo assite Yihuda cubbu giddora eessitanno yee dihedoommo» yee dawarie.

ALBILLITTETE HEXXO

³⁶ Israeelete Magani Kaaliiqi anera, «Ermiyaasi! Kune mannu, ‹Konne katama olu, hudenna dhibbu Baabilooni moote angara eanno gede assitaraati› yaanni no. Ani yeemmore kayinni macciishshi.

³⁷ Buwanno hanqi'yanninna aari'yanni billaallisoommonsa gobba baalatenni gamba asse abbe, keere heedhanno gede asseemmonsa.

³⁸ Insano manna'ya ikkitanno; anino Maganonsa ikkeemmo.

³⁹ Insaranna oosonsa oosora seyansara, ane waajjitannoe gede mitto wodananna mitte hedo eemmonsa.

⁴⁰ Hegere gondoorono insa ledo e"eemmo; insara danchare assa diagureemmo. Anewiinni wolewa higgannokki gede wodaninsara ane waajja woreemmo.

⁴¹ Anino insara danchare assatenni hagiidheemmo. Qoleno insa halaalinta tenne baattora teesse heedhanno gede asseemmonsa.

⁴² «Tenne lowo bao abbummonte gede, coyi'roommonsaha dancha coye baala eemmonsa.

⁴³ ‹Baatto Baabiloonootu angara e'anno daafira, mannunna saada heedhannokkita ona ikkitanno› yini baatto mitto barra loosi'rate hidhinannita ikkitanno.

⁴⁴ Mannu baatto hidhanno; sheemaate malaatinse mannu albaanni cunfanni. Biiniyaami gobbara Yerusaalamete gaangaawira noo qachi baalaho, shiimmaadda Yihudu katammara, gaaraame gobba katammara, gaarrate lekkaalloonninna Yihudaho wodiidoonni noo gobba baalate hatto assinanni. Mannano gobbansa qoleemmo. Konne coye coyi'roommohu ani Kaaliiqaati» yiie.