ERMIYAASI 30 - Qullaawa Maxaafa

KAALIIQI MANNASI GOBBANSA QOLATE UYINO HEXXO

¹ Kaaliiqi,

² «Ani Israeelete Magani Kaaliiqi kuloommohere baala maxaafaho borreessi.

³ Kune, qafadame nooha Israeelennihanna Yihudunniha manna'ya qole abbeemmo barri daanno. Akaakkansara iqqa asse oommo baatto galagalche qoleemmonsa; insano iqqansa assidhe heedhanno. Konne coye coyi'roommohu ani Kaaliiqaati» yii.

⁴ Kaaliiqi Israeeletenna Yihudaho coyi'reemmo gede kulinohe coyi kunninni aane nooho:

⁵ «Ani Kaaliiqi keerunnita ikkitukkinni, raarennitanna masillu huuro macciishshanni noommo.

⁶ Heddine la'e! Labbaahu gamaa'me ooso ilannoni? Mayiraatiyya labbaahu baalu, gamaa'mitanno mancho gede hallo cu'mi'rinohu? Mannu baalu albi xawulushshi mayira yiinoyya?

⁷ Bayisibao! Hakku shettote barri daanni no! Hakko barri gedeehu wolu dino. Ki'ne Yaiqoobi ilamara qarru barraati; ani kayinni hakkiinni gatiseemmo'ne» yii.

⁸ «Hakko barri daanno waro, ani Olantote Mootichi Kaaliiqi, haxo'ne qambara hiiqqeemmo. Usura'neno tattayiseemmo; hakkunni gedensaanni wole gosara borojje di"ikkitinanni.

⁹ Hatto ikka gatteenna ane Magani'ne Kaaliiqiranna, ani moohiseemmohura Daawiti sircho ikkinohura soqqantinanni.

¹⁰ «Kunni daafira, soqqamaancho'ya Yaiqoobi, waajjitooti! Israeeli, hexxo mudhitooti! Xeertote gobbanni gatise abbeemmo'ne; ooso'neno qafadantinowiinni qoleemmonsa; waajjishannori nookkiha, keerunni heedhinanni.

¹¹ Gatisammo'nera ani ledo'ne hee'reemmo; giddonsa billaallisummo'ne daga gudeemmo. Ki'neno qorichishummokkinni diagureemmo; kayinnilla digudeemmo'ne; halaalunni seejjeemmo'ne» yii.

¹² Kaaliiqi mannisira, «Mada'ne dihurtannote; hiiqqamme'ne didhaawantannote.

¹³ Ki'ne daafira coyi'ramannohu dino; mada'ne xagisannohuno dihee'ranno; hurreno diafidhinanni.

¹⁴ Jaalla'ne baala habbino'ne; ki'ne daafira haja dinonsa. Sao'ne batidhino daafiranna, cubbi'ne haammatino daafira, diinu gede asse gawajjoommo'ne; allaggichu gede asse qorichishoommo'ne.

¹⁵ Sao'ne batidhino daafiranna, cubbi'ne haammatino daafira, togo assoommo'nehu aneeti. Xisso'ne diwoyyaabbannotena, mada'ne daafira mayira raartinanni?

¹⁶ «Guddanni noo'neri kayinni gooffanno; diinna'ne baala qafadantanno; mulqidhu'neri baalu mulqantanno; saantu'nere baala ani saameemo.

¹⁷ Diini'ne, ‹Tsiyooni tugame gatino; caaqqi yee la"annosihu dino› yiino daafira, ani keere eemmo'ne; mada'neno hurseemmo. Konne coye coyi'roommohu ani Kaaliiqaati» yii.

¹⁸ Kaaliiqi lede, «Yaiqoobi ilama marareemmonsa; Yerusaalamete katami galagale minamanno; mootete minino haaroo'manno.

¹⁹ Hakko hee'ranno manni galatu faarso faarsanno; hagiirrunni ilillisanno; kiironsa batidhannota ikkinnina dixe'anno; ayirradda asseemmonsa; ajishe la"annonsahuno dihee'ranno.

²⁰ Bi're albi gede ikkitine heedhinanni; ilama'ne ane magansidhanno; gadadissanno'nere baala qorichisheemmo.

²¹ Ilama'ne ikkinohu gashshanno'ne; umi'ne fiixa ikkinohu gashshanno'ne; isono anewa shiqqi yaanno gede woshsheemmosi; ani woshshummokkinni anewa shiqqi yee afannohu nooni?

²² Ki'neno manna'ya ikkitinannie; anino Magano'ne ikkeemmo. Konne coye coyi'roommohu ani Kaaliiqaati» yii.

²³ Kaaliiqi hanqi bubbetenna, hombobolattete gede diiddo ga'nanni, bushuullu umi aana dirranno.

²⁴ Kaaliiqihu kaajjadu hanqi, wodanisi hedo wonshikkinni dihiganno; ki'neno dagganno yannara, konne coye buuxxinanni.