ERMIYAASI 29 - Qullaawa Maxaafa

ERMIYAASI BAABILOONI HEE'RANNOHURA YIHUDU MANNIRA SOYINO SOKKA

¹ Ani Yerusaalamete hee're Nabukadanatsoori qafade Baabilooni haa're ha'rino qeesootira, himanaanote, albisootahonna qafadame ha'rino manni baalaho borrote sokka soommo.

² Tenne sokka borreessoommohu, moote Yoakiini, amasinna gashshootu mini amaalaasine, Yihudunna Yerusaalamete roorrooti angate ogimma afidhinorinna siwiila seekkitannori baalu qafadante hadhuhu gedensaanniiti.

³ Yihudu moote Sedeqiyaasi Baabilooni moote Nabukadanatsooriwa Baabilooni soyinori Saafaani beetti Eliaasinna Hiliqiya beetti Gemaariya anga borrote sokka soommo.

⁴ Borrote sokka, «Israeelete Magani Olantote Mootichi Kaaliiqi Yerusaalametenni Baabilooni qafadote soommo manni baalaho,

⁵ ‹Mine mi'nitine heedhe; gateno loosidhine laalinoreno itte.

⁶ Galte adhitine ooso ille; ilante batidhanno gede ooso'nerano seenne haadhe; seenne'neno uuyye. Hakkiicho kiiro lexxe ikkinnina ajjinoonte.

⁷ Woroommo'ne katami keere ikkannotanna qiniitaawannota halche. Heedhinoonni katamira qiniisiro ki'nerano qinaanno'nena ane Kaaliiqa huuccidhe"e.

⁸ Ani Israeelete Magani Olantote Mootichi Kaaliiqi yeemmo'neti tenneeti: Xa'midhinanniti giddo'ne noo himanaanonna masaalaano doggoonke'ne; ki'neno haaqeensa macciishshitinoonte.

⁹ Ani soyummonsakkinni, «Kaaliiqi soyinonke» yitanni kaphu himana coyidhanno› » yitanno.

¹⁰ Kaaliiqi, «Baabilooni heedhinannihu 70 diri goofanno waro, alba higeemmo'ne. Oommo'ne hexxo garinnino galagalche qae'ne qoleemmo'ne.

¹¹ Ki'nera hedeemmore ani egennoommo; hedo'yano hexxonna albillittete ikkitanno'ne gede, keerunnite ikkinnina bunshennita di"ikkitino.

¹² Hatte yannara woshshidhinannie; anewa higgine huuccidhinannie; anino macciishsheemmo'ne.

¹³ Hasidhinannie; wo'mu wodani'nenni hasidhiniero afidhinannie.

¹⁴ Anino leelleemmo'ne; qafadantinoonniwiinnino qoleemmo'ne; billaallisoommo'ne gobba baalatenni gamba asse haa're fushshe gobba'ne abbeemmo'ne. Konne coye coyi'roommohu ani Kaaliiqaati» yii.

¹⁵ Ki'neno, «Kaaliiqi Baabilooni himanaano kayisinonke» yitinanni.

¹⁶ Daawiti darga ofollino mooteranna ki'ne ledo qafadante hadhinokkirira, kunni katamira noorira baalaho,

¹⁷ ani Olantote Mootichi Kaaliiqi, «Kune ola, hudenna dhibba soyemmo. Bulaassino daafira itate seekkinokki laalo gede asseemmonsa.

¹⁸ Bagadunni, hudetenninna dhibbunni shorreemmonsa; daga baala la'e bararraaqqanno. Insa billaallisoommo gobbara noo manni baalu, ‹Insa gede ikke› yee rumanno; bararraaqanno; diqatannonna afoo cu'mi'ranno.

¹⁹ Kuni coyi daannonsahu, soqqamaano'ya himanaanote widoonni qole marro marro hige soommo sokka macciishshanna wonsha gibbino daafiraati.

²⁰ Kunnira, Yerusaalametenni Baabilooni soommo'neri baalu, ani Kaaliiqi yeemmore macciishshe.

²¹ «Israeelete Magani Olantote Mootichi Kaaliiqi, ‹Ane su'minni kaphu himana kultannore Qolaya beetto Akiaabinna Maiseya beetto Sedeqiyaasi, Nabukadanatsoori ki'ne ille'nenni la'inanna shaanno gede asseemmo.

²² Insanni kainohunni Baabilooni noohu Yihudu manni baalu rumanno woyite, «Kaaliiqi Baabilooni moote lubbotenni heedheennanni giiriri Sedeqiyaasinna Akiaabi gede assohe» yaanno.

²³ Kuni coyi iillannonsahu Israeelete giddo makki'nanni coye assitinohuraatinna jaallansa galte ledo foortino daafiraati; hattono ani soyummonsakkinni kaphu himana himantino daafiraati. Assitinore baala afoommo daafira ani umi'ya naqaashshete. Konne coye coyi'roommohu ani Kaaliiqaati› » yii.

KAPHU HIMANAANCHI SHEMAIYA

^24-25 Israeelete Magani Olantote Mootichi Kaaliiqi, Baabilooni noo manni giddonni mittichu ati Nehelaamichu Shemaiya ledokki noorira, Yerusaalamete noo manni baalaho, qeesichu Maiseya beetti Soffooniyaasiranna wolootu qeesootira borrote sokka,

²⁶ «Kaaliiqi himanaanchu Yoodahe darga qeesicha asse worinohe. Qullaawu Minirano roorrichu ateeti. Kunnira, ‹Ani himanaanchoho› yaanni awaawuranno macharaaraamo amadde, goowa cagaagetenni, lekka quwetenni usura ate loosooti.

²⁷ ‹Ani himanaanchoho› yaannoha Anatooti mancho Ermiyaasi mayira sammi yite laitto?

²⁸ Isi, qafadame Baabilooni noo mannira nafa, ‹Hakkiicho seeda diro heedhinanni daafira, mine mi'nitine heedhe; gateno loosidhine laalinore itte› yiino» yee soyi.

²⁹ Qeesichu Soffooniyaasi tenne borrote sokka ani macciishshanna nabbawino.

³⁰ Kaaliiqi,

³¹ «Nehelaamichu Shemaiya daafira, qafadame Baabilooni noo manni baalaho, ‹Shemaiya ani soyummosikkinni himana coyi'rino'ne. Kapho adda assidhinanni gede assino'ne.

³² Kunnira, ani Kaaliiqi Shemiyanna sirchosi qorichisheemmo. Manni'yara asseemmoha dancha coye afate sirchisi giddonni gatannohu dihee'ranno› yite layinki sokka soyi. Konne coye coyi'roommohu ani Kaaliiqaati» yii.