ERMIYAASI 21 - Qullaawa Maxaafa

YERUSAALAMETE QEELAMA DAAFIRA KULLOONNI HIMANA

¹ Yihudu moote Sedeqiyaasi, Malkiya beetto Pashihuurinna Maiseya beetto qeesicha Soffooniyaasi anewa soye,

² «Baabilooni moote Nabukadanatsoori qasankeraatina, hanni Kaaliiqi bi're gede maalale loose iso badhera qolannonkeha ikkiro xa'minke» yiie.

³ Hatte yannara, «Sedeqiyaasira,

⁴ ‹Ani Israeelete Magani Kaaliiqi, Baabilooni moote qasate qixxeessi'roottoha angakki noo bagado atera alba qolammoheraati. Bagaduno katamu mereero duunamanno gede asseemmo.

⁵ Anino jawaata anga'yanninna wolqaataame cigile'yanni qaseemmohe; hanqi'yano aanakki buwanna la"atto.

⁶ Kunni katamira hee'rannoha mannanna saada sheemmo; jaddote dhibbinni gooffanno.

⁷ Hakkunni gedensaanni Yihudu moote Sedeqiyaasi, ledosi gashshaanonna dhibbunni, bagadunninna hudetenni gatinoha katamu manna baala Baabilooni moote Nabukadanatsoorinna shita'nera hasidhannorira sayise eemmo. Isino shaqqillunni marare mitto manchono diaguranno. Konne coye coyi'roommohu ani Kaaliiqaati› yiino» yoommo.

⁸ Hakkunni gedensaanni Kaaliiqi mannaho, « ‹Kuneeti, alba'neenni heeshshonnitanna reyote doogo woroommo.

⁹ Kunni katamira gatanno manna bagadu, hudenna dhibbu gudanno; katama doyissite amadde noo Baabiloonootira anga aannohu gatanno; wole nafa hoogiro reyotenni gatanno.

¹⁰ Kuni katami gatara ikkikkinni ba"ara hedoommo; Baabilooni moote angara sayise eemmosi; isino giire hunanno. Konne coye coyi'roommohu ani Kaaliiqaati› yiino yite kuli» yiie.

YIHUDAHO MOOTETE MINIRA YINOONNI YOO

^11-12 Daawitihu Yihudu moote mine, Kaaliiqi ki'nera kuleemmo gede coyi'rinoere macciishshe! Kaaliiqi, «Soodo soodontenni halaale dawissinoonte; ku'u ko'onne gawajjannokki gede agarre. Hatto assa hoogginiro kayinni, loossinoonni bunshe daafira, hanqi'ya giirate gede buwanno; ayino xoyisse diafanno.

¹³ Kunni lagichira iimaanni, kinnaame tullora noottohu ati Yerusaalamete katama! Ani ate aana noommo; ‹Ane ayi kisannoe?› yootto; ‹Qiisho'ya giddora ayi eanno?› yootto.

¹⁴ Kunnira, loosikki garinni qorichisheemmohe; dubbokki giireemmo; qooxeessaho noori baalu digatanno. Konne coye coyi'roommohu ani Kaaliiqaati» yii.