ERMIYAASI 20 - Qullaawa Maxaafa

QEESICHU PASHIHUURI ERMIYAASI USURSIISISI

¹ Qullaawu Mini agaraasine roorrichi Imeeri beetti qeesichu Pashihuuri ani himana kulanna macciishshe,

² amade gane, Qullaawu Minira aleenni Biiniyaami waalchira masse cagaagetenni usursiisie.

³ Layinki soodo Pashihuuri usurinoe cagaage tirieta, «Kaaliiqi kunni ka'a ate Pashihuuri yee diwoshshanno. Hatto yaa agure su'makki, Base Baalate Mogga yaanno.

⁴ Hatto yaannohehuno, ‹Ani Kaaliiqi umokkinna jaallakki baala masisattoha asseemmohe; insa baalanka diininsa shaanna illekkinni la"atto. Yihudu manna baala Baabilooni moote angara qoleemmo. Isino gama qafade Baabiloonira haa're ha'ranno; gama manna kayinni konniichonni shaanno.

⁵ Kunni katami jironna duu'nino jajja baala, Yihudu mootoollaha ayirrado uduunnenna jajjansa baala diininsa Baabiloonira gudhanno gede asseemmo.

⁶ Ati Pashihuuri, minekki noori baalu qafadantine Baabilooni hadhinanni. Atino kaphu himana kulittonsa jaallakki ledo reyite hakko madaaramatto› yiinohe daafiraati» yee kuloommosi.

ERMIYAASI KAALIIQA ABBOOSHSHI'RI

⁷ Kaaliiqa! Atino dogittoe; anino dogamummo. Ati ane roore jawaataati; wolqakkino anera aliidite; kune mannu baalu barra wo'ma arrassanni nooe.

⁸ Ani coyi'reemmo kiironni raare, haxawarrimmannirenna baonnire kuleemmo; Kaaliiqa'ya ate sokka kuloommo daafira, wo'manka woyite xonnoonnie; diqantoonnie.

⁹ «Kunni ka'a Kaaliiqi su'ma dikayiseemmo; isi su'minni dicoyi'reemmo» yuummorono, sokkakki giddo'ya giirate gede bubbanno. Anino sammi yee diafeemmo; giddo'ya sammi yee maaxi'rate hedummorono, beeshshe gatisa didandeemmo.

¹⁰ Lowo manni, base baalate waajjillu no yee, hashaashamanna macciishshoommo. Qoleno, «Amme isire gashshaanote kullona!» yitino; jaalla'yaati yoommori nafa, «Isi dongiro dogamannohona, dogamiha ikkiro amande rabbisi'neemmosi» yitanno.

¹¹ Kaaliiqi kayinni bareedu olamaanchi gede ikke ane ledo no; kunnira shorritannoeri sarraaqante ubbanno; ubbeno shollitanno; shollinyinsano kullanna hee'ranno.

¹² Olantote Mooticha! Ati keeraancho fonqolte la"atto; mulenna mudukko afattohuno ateeti. Coye'ya atera ku'loommona, diina'ya rabbissanna laeemmo gede assie.

¹³ Qarraataamma bushu manni anganni gatisinona, Kaaliiqira faarse! Kaaliiqa galatte!

¹⁴ Ilamoommo barri rumaminoha ikko! Ama'ya ane iltu barri maassamoonke.

¹⁵ «Labbaa beetti ilaminohena hagiidhi» yee, anni'yara duduwo kuli manchi rumaminoha ikko.

¹⁶ Hakku manchi, Kaaliiqi mararikkinni diige huni katamma gedeeha ikko. Soodimaroho raare macciishsho; barru taalootira olu duduwo macciishsho.

¹⁷ Ama'ya waamma ikkitannoe gede, godowise giddo hee'reennanni, mayira shee huna giwie? Ama'ya godobbinoe gedeenni mayira hee'ra gibbu?

¹⁸ Qarranna shetto afate, diro'ya saalunni gudate, hanni ama'ya godowi giddonni mayira fulummo?